III Nzuá 1 - O Mikanda Ikola

Umenekenu

¹ Eme kikulakaji kia Ngeleja, nga sonekena mukuetu Ngaio, kamba diami, nga mu zola mu kidi.

² Kamba diami dia kazola, ngala mù samba kua Nzambi, phala eie u bhanduluke mu ima ioso, mbé u disanze o mukutu, uila ki ua bhanduluka ue mu nzumbi.

³ Kuma nga sanguluka kiavulu, kia ngi sange o jiphange ja ku bhela umbangi ua ufiiele u uala na-u mu kidi kié kioso ki uala kuenda izuua ioso mu kidi.

⁴ Kana kima ki kala kota mu ku ngi bhekela ngalasa, ki kale ngó kienʼ iki, o kuivua anʼ ami kuma ala kuenda mu kidi.

Kuximana Ngaio

⁵ Kamba diami dia kazola, o kimbamba kia ufiiele ki uene mù bhanga, kioso ki uene mu kudikila o jiphangeʼojo, né kiá a kala asonhi, a tundu ku ixi ia dikanga.

⁶ Asonhi enʼ ió, ene muène ene ku ku bhela umbangi ua henda ié bhu pholo ia Ngeleja kunu. Ki uabha ue o ku a kuatekesa ku njila iâ, kala kia fuama o muthu ua Nzambi, nga ku diondo.

⁷ Mukonda o dijina dia Kristu, diene dia a bhekela kuenda mu uenji, sé kutambula kima ku akua ʼxi, a kambe o kuijiia Nzambi.

⁸ Athu a kala kiki, etu tua xikana, tua fuama kua a tambulula, ni ku a kuatekesa mu kukalakela o kidi, phata etu tu kale ni mbandu mu kikalakalu kiâ.

Diiotelefo, mukua mangonha

⁹ Eme nga sonekena o Ngeleja tu maka tuofele. Diiotelefo-phe, uendi o ukota mudiâ, ka tu tambulula.

¹⁰ Kienʼ iki, se ngaii-ku, nga kà mu lembalesa o ima iê ioso iene mù bhanga, ni kusabhula kuê kua phulu, kua ku tu balukila etu, ni makutu ene mù tanga. O kieniokio-phe ngó, ki kia mu soko, maji uate-ku dingi o kudituna kutambulula jiphange joso jiia koko. Se bhu kata muthu uambe ku a tambulula, muène ka ki ehela; o muenʼ ió u mu kaia mu Ngeleja!

¹¹ Kamba diami, mukuetu, kana kufikisa phulu, inda o kufikisa mbote. Uoso u bhanga mbote, muène mukua Nzambi; o uoso u bhanga phulu, ió kala kumona Nzambi.

¹² Demétrio, athu oso ata ku mu zuela kiambote; oso muène ata jimbangi jê, o kidi kiene ue, ki ata mbangi iê. Etu uetu tua mu mu zuela kiambote, kuma tuala tu jimbangi jê, eie-muène ua kʼijiia kuma o umbangi uetu ua kidi.

Kumenekena, ni kulekela

¹³ Ngata dingi ni maka mavulu ma ku ku sonekena, maji ki ngandala-phe ku ki bhanga, o ku ku sonekena-u ni tinda, ni pena.

¹⁴ Nga kinga-phe kuila ngi ku sanga koko kindala, ni tu di kunde pholo, ni pholo.

¹⁵ Ku kale paze ku ualʼ oko. Makamba mé kunu, a ku menekena. Menekena o makamba metu koko, ku majina-majina mâ.