Hozeia 9 - O Mikanda Ikola

Ibhidi ia kituxi kia Izalaiele

¹ Kana-phe kutumbujuka ni ngalasa, eie Izalaiele! Kana kukala mu kutana kala o miji ia mukuá kʼejiia Nzambi! Mbata eie Nzambi ié ua mu baluka kala muhatu ua kidianzunga; o futu ia kidianzunga iene i u a fulamena bhu mazanzu oso a kuanekena o tiliku.

² Maji ni dizanzu dia kuanekena o tiliku ni ditangi dia kukamena vinhu ki dia kà bhana huta i dikila muthu, o maluvu a ka mi kamba.

³ Mʼoxi ia Jihova ka kà nanga-mu; kuma Ifalaíme ua-nda kualukila ku Ijitu, o mu ixi ia Asídia a kà dia-mu makudia a kasana.

⁴ Jihova kanda kuenda dingi ni ku mu bhangela ilumbu ia vinhu, o jisata jâ ki ja-nda ku mu uabhela dingi; o mbolo iâ ia kèla kala mbolo ia thambi, oso a dia-ku a di kasanesa, mbata o mbolo iii ia kà soka ngó phala kudia kuâ, o mʼonzo ia Jihova ki ia kà bokona-mu.

⁵ Enu-phe mua-nda kuila kiebhi bhu kizuua kia matunda, ni bhu kizuua kia fesa ia Jihova.

⁶ Mukonda nga mono kuila ene ai mbé o kulenga kibuika, maji o Ijitu-phe ua-nda ku a tambulula, o Mefize ua-nda ku a funda mu kina; o phalata ia solele miẋima iâ, ia kà kituka undundu ua ngene ua kasau-sau, o mu jinzo jâ mua kà sabhuka minha.

⁷ Kuma izuua ia ku a zungila ia bhiẋila, izuua ia kuvutula phonzo ieza-bhu; o Izalaiele ua-nda ku di muena-kiu hé u kʼijiia, kuila o polofeta iê ua di bhange kiôua, o mukua kuzambula u xingila makutu; mukonda ua di vudisila o ikuma iê, kiene uê kia kà mu vudixila o luma.

⁸ O polofeta, ku mbandu ia Nzambi iami ua di bhange mulangidi ua kubilukila Ifalaíme, mukua ni mubhetu ua dinhanga dia jinjila, mu uendelu uê uoso, kifua kisuéia mʼonzo ia Nzambi iê.

⁹ A di bolesa kinéne kala mu izuua ia Jibeia; Jihova-phe ua-nda kulembalala o mangonha mâ, anga u a bhana o kaxtiku kala kia fuama o ituxi iâ.

¹⁰ Izalaiele nga mu tuuama kala isaka ia ji-uva mu mikáu ia kukuta, o jitata jenu ki nga a muene, edile kala ibundu ia sambatende ku mufiku ua kindala; maji ene-phe a lengela kua Baale-piiole, ia a di kasanesa ni mahamba a kuatesa jisonhi javulu, ene uâ ia a kasana kiá kala o dihamba diene dia a uabhelele ene.

¹¹ O Ifalaíme-phe kijingo kiê kia-nda kutuka mukuâ ni njila; ki bhua-nda kukala luvualu, ki bhua-nda kukala mona, ki bhua-nda kukala kuimita mba ngó kusangita, lémbua.

¹² Némbe-phe a sasa ana, eme nga-nda ku a katula-nâ, phala ki bhu subhuke diiala. Ni kidi muene, kokolo diâ! Kioso eme ki nga-nda ku a tunda bhu mbandu iâ.

¹³ Kala ki nga ki mono, Ifalaíme ua di bhange kala Tilu, kuma a mu phaphe bhu kididi kia matunda; maji o Ifalaíme-phe anʼê ua-nda kuia ni ku a tutila kua mubuikixi uenda ni ku a katula o muenhu bhu xingo.

¹⁴ Jihova, Ngana, a a bhane; maji ihi-phe i uanda ku a bhana? A a bhane, Ngana, divumu di kamba kuvuala ni mele a kukuta muene uokón!

¹⁵ Phulu iâ ioso u i sanga mu Jidingale, muenhomo muene mu nga di kumina-nâ; o mukonda dia usuéia ua ibhangelu iâ, nga-nda ku a kaia mʼonzo iami; ki nga-nda ku a zola dingi, kana! Mukonda o ilamba iâ ioso, ala ngó athu a bhukumuka.

¹⁶ Ifalaíme a mú kuama, O jindanji jê joso ja kukuta; muene ka kà bhana dingi ibundu; xi, né-mbe hanji a vuala ana, Eme ana oso a matunda a tunda mu vumu diê, nga-nda ku mu jibhila-u.

¹⁷ Nzambi iami ua-nda ku a ta kiá dikunda, mukonda ene ka mu xikina ku mu ivua kia zuela. A kʼenda ni kutakujuka ngó muʼaxaxe ka akua jixi jengi.