Hozeia 7 - O Mikanda Ikola

O ikuma ia jisobha ni makota a jingana

¹ O ki ngedi-ze ngʼilule Izalaiele, kua tukuluka o phulu ia Ifalaíme; kua tukuluka ue o ikuma ia Samádia; mukonda ene a bhange mangonha; mbata o muii u bokona mʼonzo, o kilômbo kia ingumba ki bhûndila kunu ku kanga.

² Mu muẋima uâ a lémbua kutongolola kuma ngi lembalala o ituxi iâ ioso; o ki tualʼiki-phe ikalakalu iâ ia a kondoloka, ia lulama muene bhu pholo iami.

³ Muenexi a mu sangulukisa ni usuéia uâ, o ilamba iâ a i sangulukisa ni makutu mâ.

⁴ Ene oso muene ala ati a jiphànda; a difangana ni forno iouike kuala mubhangi-a-jimbolo, hé u zumbuka kiá kuphopha túbhia, nʼa kinge o dikende dia masana ni felemendu katé ki di nana.

⁵ O bhu kizuua kia fesa ia sobha ietu, jingana ja di katesa ni vinhu, ià nuina enhoso kumoxi mu kilunga kia jisemenhi.

⁶ Kuma muẋima uâ a u uamesa kala forno, enda ni ku batamena akuá; o mumbi a jimbolo usuku uoso u zeka kilu kiê; o mu kimene forno ia uama kala mulengu ua túbhia.

⁷ Ene oso a tema kala forno, a jikinisa afundixiʼâ; jisobha jâ joso ja bhuku; muaxaxi kâ ki mua moneka dingi ngó muthu umoxi u di tenda koʼkuami.

⁸ Ifalaíme ua di fungisa kiá ni athu engi; Ifalaíme ua di bhange kala mbolo iabhi ngó mbandu imoxi, kuma ka i bilula.

⁹ Akuaʼxi jengi a mu di jinguzu jê, o muene-phe ka kiʼjiia; muene ue uedi kiá kukululu ni jimvi, maji muenephe ua lémbua ku ki ijiia ngó.

¹⁰ O Izalaiele, izala iê ia-nda ku mu jimbulukila muene ku mesu mê; maji mu ioso iii ene ka-nda kualukila kua Jihova Nzambi iâ, né ngo ku mu sota.

¹¹ Ifalaíme ue uedi kala diembe dia kilalu, kilunji kala na-kiu; a di tenda kua Ijito, aia ni ku di texila kua Asídia.

¹² Kioso ki aia, nga-nda kuzala o uanda uami ku thandu diâ, anga ngʼa tulula mukuâ ni jinjila ja bhulu; nga-nda ku a bhana kaxtiku, kala ene kiene mu kuívua jinga mu ionge iâ.

¹³ Lamba diâ! kia ngi balukʼokio! Kibuika kia a tula muene! mbata a ngi bhukumukina; Eme nga a kula, maji ene a ngi tatela ima ia makutu.

¹⁴ Ene ka mu dikola ko kuami ni muẋima uâ uoso; o kiala-bhu, mikemu ia bhela bhu jihama jâ, mukonda ene a bhongolokela ngó masa ni vinhu, eme a ngi bhukumukina.

¹⁵ Eme ngedi ni ku a longa, ni kukolesa ni kusuinisa o maku mâ; maji ene aia ni ku ngi xinganeka kiaiibha, a ngi kiti ngi kisuéia.

¹⁶ Ene, o kia vutuka, kana, ka vutuka kua Suke-ku; a di bhange kala uta ua mufula ua ngangamana, u landukisa ngó; o ilolo iâ ia kà laúka ku xibhata, mukonda dia isuéia uâ ua a kala bhu dimi; o kienhiki hinu a-nda ku a tela-kiu kabáxia mʼoxi ia Ijitu.