Hozeia 6 - O Mikanda Ikola

O kudiela kua makutu

¹ A kèla: Izenu, tu alukile kua Jihova, mukonda muene ua tu sasujula, muene ue ua-nda ku tu ilula; kia tu kuamʼiki, kiene ue kia tumba o fidila ietu.

² Bhu bhita izuua iiadi, o ki i bhua u tu bhana dingi muenhu; mu kizuua kia katatu u tu fukununa, anga tu kala jinga kiá bhu pholo iê-muène.

³ Jihova-phe tu mu ijiie, tuende ni kujijila jinga ku mu ijiia; mukonda iú uiza, o kuxindumuka kuê mukuâ ni ukielu ua kizuua; ua-nda ku tu zungila mukuâ ni mvula, kala mvula ia isanga i kaiela ku mvula ia kudinji, ienda ni kutekela oxi.

⁴ Eie Ifalaíme, tata, Eme ngi ku bhanga kiebhi? Eie, Juda-phe, Eme ngi ku ila kiebhi? Mukonda o henda ienu iedi kala dituta dia kimene, kala dimume dia kimene-mene, di bhita lusolo.

⁵ Kiene-phe ki nga a tozela ni nguzu iavulu mu kanu dia jipolofeta, eme nga a jibha muene ni hundu ia tundu mu kanu diami; o mabatuilu mami kokué, a-nda kutunda muene mukuâ ni mukengeji.

⁶ Kuma Eme nginda o kukuatela henda, ki ngindi sata; o kuijiia Nzambi ue kota, o kuoha ibhaku ia jisata, ndenge.

⁷ Maji ene o kikutu a ki matuka, kala kia bhange Adá; ia a ngi balukila, ni ku ngi bhanga phulu.

⁸ Jiliiade iene o sanzala ia akua kubhanga o phulu, usanga ia sotama ni manhinga.

⁹ Kala kilômbo kia ingumba kia batamena muthu, kiene ue kiala o kilunga kia jinganga, ji kuata kujibha athu mu kikoka kia Xikeme; xi, kuma ala kubhanga usuéia.

¹⁰ Mu dibhata dia Izalaiele nga diuanamu kima kia kisunji; mukonda u sangamu o undumbu ua Ifalaíme, o Izalaiele ua di kasanesa.

¹¹ Eie ue, Juda, kua ku xikamena o ku ku muna, kioso ki ngi bhuisa-ku o ubhika ua mundu uami.