Hozeia 5 - O Mikanda Ikola

Ni jinganga ni jingana a a bazela, hé a a bhana kaiula ka kudiela

¹ Ivuenu-kiu, enu mu jinganga; batekelenu, enu mu dibhata dia Izalaiele; enu ue, mu mbèle ia muenexi, bhanenu mátui, kuma mulonga iú ua mi tokala enu; mbata enu mua di bhange mu dibhèbhe mu Mixipa, muedi kala uanda ua di zale ku thala ia mulundu ua Tabole.

² Akua kubhanga iaiibha a selumuka muene katé mua zongo, mu kijibha; maji-phe eme nga-nda a bazela ene oso.

³ Eme Ifalaíme nga mu ijiia kiambote, o Izalaiele ue ua di kasanesa.

⁴ Ngua-uâ kuiukisa o ikalakalu iâ phala nʼa vutukile kua Nzambi iâ; mbata o nzumbi ia undumbu iene iala muaxaxi kâ, o Jihova a tokoka ku mu ijiia.

⁵ Izalaiele o ízala iê ia-nda ku di jimbulukila mu pholo iê muene; ni Izalaiele ni Ifalaíme a kà dibhala-phe mu ituxi iâ; o Juda ue ua kà dibhala-nâ kumoxi.

⁶ Eneʼá à kʼ aia ni Jimbudi jâ ni jingombe jâ mu kusota Jihova; maji a kà tokoka ku di mona-nê; mukonda Jihova ua a tundu kiá bhu mbandu iâ.

⁷ Kuma Jihova a mu bhange mangonha, mbata a vuala anʼa jiphànda; mu kindalʼu-mu, ki moneka mbeji, a kà buika ni ima ioso iala na-iu.

⁸ Xikenu mbungu mu Jibeia, koloneta i tende mu Lama! Kolenu nzongo mu Bet-avene! Aluka-phe eie Bejamí, kia ku iza-ze!

⁹ Ifalaíme ua-nda kubhondalala, bhu kumbi dia ku mu bazela, kuma ua kà xala ngùndu; kienhiki-phe nga ki tende muʼaxaxe ka ibuka ia Izalaiele, kuila kia-nda kubhita muene.

¹⁰ O ilamba mua Juda a soko ni akua kusondolola o jimbambe; kala kiki o kutema kuami nga-nda ku ku lundulula kala menha ku thandu diâ.

¹¹ Ifalaíme a mu xina katé kia mu bueta mu kufundisa; mukonda kima kia vondadi iê muene, kia kaiela, o kubheza mahamba.

¹² Uila kiki, Ifalaíme nga-nda ku mu kesa, kala ki kesa o kabamba; o Juda nga-da ku mu lutula kala ki lutuka o kima kia bolo.

¹³ Kioso Ifalaíme kia mono o uhaxi uê, ni Juda kia mono dibhebhu diê, Ifalaíme ua bande kusota Asídia, ua tumu muene jiphunga kua sobha Jalebe, phala nʼa tene ku a kudila; maji muenephe ka tena ku mi saka, né ngó ku miʼlula o dibhebhu dienu.

¹⁴ Mbata eme nga-nda kubalukila Ifalaíme mukuâ ni hoji, anga dibhata dia Juda ngi di hamena kala ngi munzangala ua hoji; Eme, eme-muène nga-nda ku a sasujula muene, anga ngiiʼami kiá; Eme nga-nda ku a sumbununa kala kiama kia ambatela ku mazu, u a kudila ka-nda kumoneka.

¹⁵ Anga ngi katuka, hé ngi vutuka ku bhata diami, katé kia-nda kumona kuila a zange, anga a sota o pholo iami; mu kuila a bhondalala kiá, a-nda kudimeneka ku ngi sota.