Hozeia 4 - O Mikanda Ikola

Ni Izalaiele ni Juda a a kanena ku a bhana kaxtiku mukonda dia ikuma iâ. O uximba ni uluami ua mundu

¹ Ivuenu kizuelu kia Jihova, enu mu anʼa Izalaiele, mbata Jihova ua kuata mvunda ni jitungi ja tunga ku mundu, mukonda mu ngongo ki muala kidi, ki muala henda, ki muala kuijiia Nzambi.

² Maji kiala-mu ngoho o kuloka mu kingoho ni kutanga makutu, ni kujibha, ni kunhana, a ta jiphanda, kutunda ufumbe, kubhingana ufumbe ni ku di jibha.

³ Kienhiki oxi ia-nda kuditenda, ió uoso u tunga-mu u botomoka; katé ni iama ku mukáu, ni jinjila ja bhulu, ni jimbiji ue ja kalunga a kà ji katula-mu.

⁴ Ki bhuala muthu-phe u zoka, ki bhuala u bazela mukuá; mukonda o mundu ué a sokoʼâ ngó mukuâ ni ió a zoka ni nganga.

⁵ Mukonda dia kiki, eie u nganga ua-nda kudibhala mu muanha uatu, o polofeta ua kà dibhala kumoxi ni eie mʼusuku; o mamʼenu ngi mu buikisa ue.

⁶ Mundu uami a a buikisa mukonda dia kukamba kuijiia. Mukonda eie-phe ua ditunu o kuijiia, eme ue nga-nda ku ku dituna, phala ku kale dingi u nganga bhu pholo iami; kala kiki, kuma o kitumu kia Nzambi ié eie ua ki jimbi, eme uami ue ané nga-nda ku a jimba.

⁷ Kala ene kioso kia di sokolola, kiene ue kia te o ituxi iavulu ko kuami; eme-phe nga-nda ku a lungulula o kijingu kiâ, hé a ka bonga malebhu ni jisonhi.

⁸ A di dikila ituxi ia mundu uami, miẋima iâ iezala kaluaki-luaki, kuma a bhindamena kumona akua mundu uami kubhanga kiaiibha.

⁹ Kienhiki-phe kioso kikala o mundu, kikala ue o nganga; eme nga kà mu bhana kaxtiku mukonda dia mauendelu mê, nga kà mu bhana o futu ia tokala ikalakalu iê.

¹⁰ O mundu kudia, a dia, maji a kà lémbua kuikuta; a kà di bhakula muene mu kubhanga undumbu, maji ka tena kusokoloka; mukonda a ditunu kusuua Jihova, ni ku mu bheza.

¹¹ O uhabhu, ni vinhu ni maluvu, a katula kilunji.

¹² Mundu uami a zambuila ku kiximbu kia muẋi, o mbangala iâ anga ienda ni ku a lomboluela; mukonda o nzumbi ia uhabhu iala kuia ni ku a nganala, ene anga aia ni ku di kasanesa, o Nzambi iâ a mu xisa dikanga.

¹³ A bhana jisata ku thandu dia milundu, a bhanga dixi dia uasu ua dizumba ku malundu onéne, ni bhu ixina ia miẋi ia di zandela ia mikaluvádiu, ni jixopo, ni jitelebindo, mbata o kilembeketa kia di xala-bhu; kiene ki bhekela anʼenu a ahatu ku kituka jihabhu, ni akaji a anʼenu kuta jiphànda.

¹⁴ Eme, anʼenu a ahatu kia bhanga uuaia, ni akaji a anʼenu ki a ta jiphànda, ki nga-nda ku a kaxtikala-ku; mbata o malʼâ ene, ni jitata jâ, a di texi ni idianzunga, o mu kubhana jisata aia kumoxi ni iuaia; mukonda o mundu ua kambe kilunji ua kʼaia mu dibuikilu.

¹⁵ Eie-phe, Izalaiele, se ua solo o kudikasanesa, Juda-phe kana ku mu ta mu kituxi kié; kana kuiza bhu Jidingale, ki mu bande ue ku Bete-Avene, ki mu loke kuamba: Ni Jihova muenhú!

¹⁶ Mukonda Izalaiele ua baluka kala ki baluka o mamʼa ngombe; o kiki-phe Jihova ua-nda ku a enga kala kambudi mu kikála kia zanze.

¹⁷ Ifalaíme ua di bhakula kiá ku mahamba; mu ehienu!

¹⁸ A mu kuila kia zubha o kúnua, a di bhakula kiá ku undumbu; o itatakaji iâ u uabhela o lusebhu, kene mu kuinda o kuuabha kua Jihova.

¹⁹ Kitembu kia kibhungu kia a ambatela mu mabhabha mê; jisonhi hádia ja-nda ku a kuata mukonda dia jisata jâ.