Hozeia 2 - O Mikanda Ikola

¹ Phange ienu ia diiala, mu lukiʼenu Ami (Mundu-Uami); ni phange ienu ia muhatu, mu lukiʼenu Luhama (A-tu-kuatela-henda).

² Mamʼenu mu bazedienu, mu bazedienu, mbata muene ki muhatuʼami dingi kana, eme ue ki ngala dingi ngi munumiʼê; maundumbu mê a ma tule, phala a mu bhue ku mesu, ka jijile dingi jiphànda bhu jitulu jê.

³ Mbé eme ki ngi-ze ku mu zula, ni ngi mu tadike kala bhu kizuua kia mu vualele, hé ngi mu bhanga kala kikangalakata, ngi mu kitulula kala oxi ia kukuta, anga ngi mu fuisa ni dinhota.

⁴ Mbata katé-phe ni anʼê ngi dituna kiá o ku a lendukila; mukonda ana a tundu mu undumbu.

⁵ Kuma mamʼâ ua te jiphànda; ió uoso ua emitine ua bhange isunji; o ujitu uoso ua di katula-u; mukonda muene uambe, uixi: Eme nga-nda kulandula o jisaii jami, ene mu ngi bhana o mbolo iami, ni menha ami, a ngi bhana o lâ ni linhu iami, a ngi bhana o majiʼami ni maluvu a kúnua.

⁶ Kala kiki, njila iê nga-nda ku i sakela ni minha, anga ngi bhitisa-ku lumbu, anga u lémbua kumona dingi o jihoka jê muene mu ku di tela.

⁷ Phala o muene kia kèla ngi kaiela o jisaii jami, ka tena dingi ku di bonga-nâ; uila u a sota, maji utokoka ku a sanga; bhenhobho-phe anga uila uixi: Ngi vutuka, nga kʼàia kua munumeʼami ua diangele; mukonda, o mʼokulu, nga betele kuzediua ni muene, o kiki kana.

⁸ Mbata muene, ki kia mu tetulukila kuma eme nga mu bhele o masa, ni maluvu a kúnua, ni maji; eme nga mu vudixile o phalata ni ulu, ia zangela kua Baale.

⁹ Kala kiki, eme ngiʼzó, phala bhu thembu ia tokala, ngi mu tambula o masa mami, bhu thembu ia tokala o kubela kuê; ngi mu tambula o maluvu ami a kúmua; nga-nda kuolola ue o lâ iami, ni linhu iami, ia kexi kudivungila O tuẋi iê.

¹⁰ O kiki lusebu luê ngi lu tadika muene ku mesu ma jisaii jê; kana muthu u tena ku mu kudila bhu lukuaku luami.

¹¹ O kusanguluka kuê kuoso nganda ku ku bhuisa-ku, ni jifesa jê, ni mbeji jê ja thethama, ni jisabalu jê, ni mabhongolokelu mê moso ma izuua ia jifesa.

¹² O mivide iê ni mifiku iê nga ka i buikisa, ioio iambe muene, uixi: lene o futu iami ia ngi bhana kuala o jisaii jami. Eme-phe nga-nda ku i kitula mixitu, anga iama ia mukáu ia kà i dia.

¹³ O izuua ia bheza jinga Baale, nganda ku mu bhela-iu muene o kastiku kê, kia kexe ku mu bhangela o dixi dia dizumba, ni ku mu kembela ni jibixa ni malenge moso, hé uia ni kukaiela o jisaii jê, iu ua ngi landuka jinga, eme ngi Jihova.

¹⁴ Talesa, eme-phe nga-nda ku mu sunga, anga ngiia-nê ku mukáu mu kikangalakata, o kuenhoko anga ngi mu tela maka ma mu sungisa kilunji, a mu tula mu muẋima.

¹⁵ Bhene-phe bhu nganda ku mu bhela dingi o mábhia mê, ni dikôlo dia Akole ngi mu bhana-diu, di kala muelu ua ku mu dielelesa. Bhenhobho ua kà kala mù kuimba, mukuâ ni mu izuua iê ia unzangala, uila kala bhu kizuua kia bandele mu kutunda ku Ijito.

¹⁶ Anga kia kà bhita mu kizuua kiókio, kiambe Ngana, eie ua kà ngʼila kiá: “Muadi uami”, kua kà ngiʼxana dingi: “Baale diami”.

¹⁷ O majina ma mahamba mê, mu kanu diê nga-nda ku ma katula-mu, majina ma iteka ioio ka kà muiza dingi mu kilunji kiê.

¹⁸ Mu kizuua kiná o mahamba mê nga-nda ku a tesela kikutu ni iama ia mukáu, ni jinjila ja bhulu, ni iama i huhutila bhoxi ku mavu; o mufula ni xibhata ni ita nga kà i buikisa-ku mu ngongo ioso. Anga ene nga kà a zekesa muene ni kukondama kuoso sé muthu ku a kuatesa uoma.

¹⁹ Anga eme ngi ku sakanena-ku kiá muene, nʼeie nʼeme tu sakanaʼté ku hádia ni hádia; o kusakana kuetu nʼeie nʼeme anga kuenda kiá ni kidi ni kutetuluka, kuexi ni kudituma kiambote ni jihenda.

²⁰ Nga-nda kusakana nʼeie ni kuila eie u kala kiá u fiiele kokuami, eie anga uijiia kiá Jihova.

²¹ Kia kà bhita-phe mu kizuuʼokio, kuma eme nga kʼevua, eme ngi Jihova, nga kʼevua o maúlu anga ngʼa vutuila, ene ue a kʼevua kioso kiendi o ixi.

²² Oxi ue ia kʼevua hé ia kà bhana o masa ni maluvu ni maji; o iá ue a kʼevua nʼa ka bhakuila Jezelele.

²³ Izalaiele nga kà mu phapha mu ngongo phala eme; Lo-Luhama nga kà mu kuatela henda, ió ka mu kuatelele henda ia kima; Lo-Ammí, ió ka kexile povo iami, nga kʼèla kiá: Eie u povo iami; o muene ue ua kʼèla: Eie u Nzambi iami.