Hozeia 13 - O Mikanda Ikola

O kituxi kia Izalaiele ni kaxtiku kê

¹ Mʼokulu kioso Ifalaíme kia zuela jinga, athu a teketa; anga u kala muene ni ditala dia kijingo mua Izalaiele; maji muene-phe ua di bhale mu kuêla kua kubheza Baale anga ufua.

² O kiki-phe ituxi ia mu di vuala dingi, a nomona ku phalata iâ anga a di bhangela kiteka kia kuzunza, a di bhangela muene iteka ia solo ku miẋima iâ, iene ioso-phe ima iòkalakale ku maku ma jihete ja ufunu, anga aia ni kuila: Enu mu athu satelenu ku jinzambi jiji, bhanenu jibeju ku tungombe tutu.

³ Kienhiki ene a-nda kukala mukua ni dituta dia kimene, kala dimume dia kamene-mene, ki diene mu kunanga kubhita; ela kala ibhiate bhu dizanzu dia kubetela, a i ambata kuala o kitembu kia suina; a di bhanga kala dixi dia mu tunda mu xaminé.

⁴ Sumbala kiene, hanji tunde koxi ia Ijito, eme Jihova Nzambi ié; kala kiki, kana ku di tambulula dingi ni nzambi iengi nʼu ngi xi eme, mbata ki kuene dingi Mubhuludi uengi, kale eme-muène ngó.

⁵ Eme nga kuijidila kioso hanji ki uala mu kikangalakata, mʼoxi ia kukuta.

⁶ O kiala mu nzungule ia sabhelela, a di, ekuta; o kia zubha kudia ni kuikuta, muẋima uâ ua zangalala, kiene kia a bhekesa o ku ngi jimba eme.

⁷ O kikiphe nga-nda ku a kitukila kala hoji; ngenda ni ku a batamena mu njila kala ingo.

⁸ Ngi di takuila kua ene kala mama ia kitôto a mu nhana tuana tuê, ngʼa sana-sana o jingoji ja phumbulu; ngʼa dila bhenhobho mukuâ ni hoji, ngʼa sasujula muene kala ki bhanga o iama ia mukáu.

⁹ Ua di bhange-kiu-ze, eie Izalaiele, ki ua ngi kitukila emeʼokio, eie ua ngi balukila eme ngi Mukuatekexi ué.

¹⁰ Kindala-phe o sobha ié iú kuebhi, phala mu jimbonge jé joso nʼende ni ku ku langa? O afundixi é ala kuebhi, u ua bhingile, uixi: Ngibhienu sobha ni ilamba?

¹¹ Mu njinda iami nga ku bhele sobha, o kia ngi kuata kutema nga ku katula-iu.

¹² Ikuma ia Ifalaíme iokute dibunda, o kituxi kiê kiʼólunde kididi.

¹³ Hinu ku mu tulukila misusu kala mika ia muhatu uala ku isénda, o mu kuvuala-phe u vuala kilalu kia mona, kuma ka bhiẋila luua bhu kithangana kia ku mu vuala nʼa tunde ku kanga.

¹⁴ Hinu eme ngʼa kula ku uzonda ua mbila, hádia eme ngʼa tambula dingi kua kalunga-a-ngombe. Eie kalunga, o hadi i ua talesa jinga athu iii kuebhi? Eie mbila, o kusengulula kué kuebhi? O kudiela kua-nda kusuama, ki kua kà moneka dingi ku mesuʼami.

¹⁵ Ifalaíme né-mbe u zanda anga u bhana ibundu muʼaxaxe ka jiphange jê, hanji-phe, kua keza kitembu kia thunda, kitembu ki tunda kua Jihova, ki balumuka mu kikangalakata anga kiza ni kubanda; kiene kia kà kukutisa otho iê, o dijiia diê di thothuena; o ima ioso ia matunda iala naiu a kà mu bhunda-iu.

¹⁶ O Samádia kuêla kua kikuma kiê ua kʼenda na-ku, kuma ua kà senguluka, mukonda ua kitukila Nzambi iê; anʼê a ka a sasujula mbata a kà di bhala ku xibhata, o mavumu ma akajiʼâ oso emita, hinu a kà a tandula muene muaʼaxaxe.