Hozeia 12 - O Mikanda Ikola

¹ Ifalaíme uala ku di dikila ni kitembu, kumbi dioso dia kambamba u kaiela kitembu kia thunda; u nangena ku vudisa makutu ni kibuika izuua ioso; o kikutu u ki ta ni Asídia, maji mê uia mu ku mabheka ku Ijito, kuma diene o dibhôko dia mu bhana.

² Jihova hádia uiza mu kufundisa ioso iene mu kubhanga Juda; o Jakobo a kà mu bhana kaxtiku kala kia fuama o uendelu uê; a kà mu futa muene kala kia fuama o ibhangelu iê.

³ O kia kexi hanji mu divumu ua naminine mu kasènde ka phangʼiê, o kia bhixila kiá mu ukota, mu kuvula nguzu ua bhânge ni Nzambi.

⁴ Ua di bhange kilolo mu kubhânga ni anju katè kia i tolola; ua didi, iú ua dionda ku mu kuatela henda. O bhu Betele bhene bhua di bongela ni Nzambi, o bhenhobho Nzambi bhene bhua tu zuelesela.

⁵ Kidi-ze, Ió, Jihova, Nzambi ia Ilombo Ieta, dijina diê Jihova ngó, diene di kalelà-ku.

⁶ Eie-phe vutukila kua Nzambi ié, jijila kubhanga mbote ni kubatula milonga mu kidi, kuata-phe kuxibhidila jinga Nzambi ié ni kukinga kua muene mu thembu joso.

⁷ Ifalaime ua di banga ngenji ia kufuna mauenji, o pezo ia kufumba naiu athu iene ia mu kala bhu maku mê; ua uabhela kudia mangonha.

⁸ Anga u kala mu ku di thatha, uixi: Ni kidi nga kituka ngi mvuama, nga funu jimbongo ja nzungule; maji mu ikalakalu iami ioso ienhiʼii, ki bhuala uà tena ku ngi kuata ni ungulungumba ua kuila kituxi ki nga te, lémbua.

⁹ Maji eme-phe, tunde mʼoxi ia Ijito, eme ngi Jihova Nzambi ié; hanji eme nga-nda ku ku bhangesa kuzekela mu jifundu kala bhu izuua ia jifesa.

¹⁰ Hé o jipolofeta nga kà a tela maka, ngi vudisa o ijimbuete ni isuma; o ku ukunji ua jipolofeta kuene ku nga kà tela ifika.

¹¹ Ngiliiade manhi ua kambe ikuma? A di bhange-phe lusebu ngó kuabhu. Mu Jidingale ala kusatela jingombe, maji jikalatódio jâ ja di bhange kala jindunji ja matadi a hatu, mu jimbondongolo ja mibhanga ku mábhia.

¹² Jakobo ua lengela mu mukáu ua Sídia; Izalaiele ua bhikila ku ungamba mu kukalakela ku mu bhana muhatu, o mu kukalakela muhatu, a mu bhele kuinga ibhaku.

¹³ Maji Jihova-phe ua tumine o polofeta iú ua tombola Izalaiele ku Ijitu, o ku lukuaku lua polofeta kuene kua kondekela jinga o mundu uê.

¹⁴ Ifalaíme ua lokalala kiavulu muene o njinda ia Jihova, maji o manhinga mê ma bhubhisa a-nda ku mu lunduluila-u ku thandu dia mútue uê, o Ngana iê ua-nda ku mu bhana o futu ia fuama o maufusa mê.