Hozeia 11 - O Mikanda Ikola

Izalaiele ua kambe kisakidilu. O jihenda ja Nzambi

¹ Izalaiele kioso kiala hanji kamona ka ndenge, Eme nga mu zolo kiá; o mu Ijitu muene mu ngexanena monʼami.

² Uila Eme ki nga jiji ni ku a exana, ene uâ kiene kia kuata kuendelela dingi ni kusondoloka bhu mbandu iami; a bhakula jisata ku jibaale, oha uasu ua dizumba ku iteka ia kusonga.

³ Sumbala kiene, maji Eme Ifalaíme nga mu longo kuenda; nga a lela bhu maku mami, maji ene a lémbua ku kʼijiia kuila eme ngala mu ku a sasa.

⁴ Mu ku a kuata, nga a kuata jinga ni uthu, nga a tekula ni henda, mu ku a babata nga di bhange kala kifulu ki tula ni kulembakata, mu pholo iâ; nga a disa jinga.

⁵ O mu Ijitu ka-nda kuvutukila-mu dingi, maji mukua Asídia muene u kala sobha iâ; mukonda a di tunu kudiela.

⁶ Xibhata ia-nda ku di ta mu jisanzala jâ, hé ia kà bula jisabhi ku mabhitu mâ, anga ia kà a jikinisa, mukonda dia jiphangu jala kuia ni ku di longesa mudiâ.

⁷ Mbata o mundu uami uejidila ku ngi baluka; o kia exana kuiza kua Suke-ku, ki bhuala muthu u xikina ku ki bhanga.

⁸ O kiki-phe eie Ifalaíme, ngi kuehelela kiebhi? Ngi ku bhakula kiebhi, eie Izalaiele, tata! Ngi ku bhanga kiebhi kala kia bhiti kua Adama, mba ngi ku kitula kiebhi kala Nzeboíme? Muẋima uami moxi ki u xikina, o henda jami ja bambuka kala túbhia.

⁹ Ki nga-nda kubhanga kia tumu o njinda iami; Ifalaíme ki nga-nda ku mu sengulula; mbata eme ngi Nzambi, ki ngi muthu, kana; kuma eme ngi Kôla muʼ ʼaxaxe kenu, ki ngene kuuabhela kuia ni kubuikisa.

¹⁰ Ene a kʼenda ni kukaiela jinga Jihova; muene ua-nda kukoma kala hoji; o kia koma, tuana tuoso tuene ku mufuila-kumbi a kʼèza ni kuteketa.

¹¹ Akua Ijito a kʼèza ni kuteketa kala tunjila, o akua ixi ia Asídia a kʼèza ue mukuâ ni diembe, anga eme ngi a bhangesa kutunga mu jinzo jâ ene,—kiene kia tange Jihova.

Jakobo muene phangu ia mundu ua Izalaiele

¹² Ifalaíme ua ngi kondoloka ni makutu, o Izalaiele uezala ni mangonha; maji Juda hanji ala kutumina ni Nzambi, muene uala fiiele kua Ió Ukôla.