Hozeia 10 - O Mikanda Ikola

Izalaiele ua kunu usuéia, ua-nda kubhongolola kusenguluka

¹ Izalaiele ua di bhange muvide ua di zandela, uala kuima ngó ibundu phala muene; kia vulu ibundu iê, kiene ue kia di vudixila jikalatódio jê; kala kia uabha oxi iâ, kiene ue kia di iudikila o iteka iâ ia matunda.

² Muẋima uâ ua a kala luiadi, kiene kia kexila ni kuêla; Jihova phe ua kà bula-bula jikalatódio jâ, o iteka iâ u i lunduluila muene bhoxi.

³ Mu kienhiki-phe, ene kindala anda kuzuela, kuamba: Etu ki tuala ni sobha, mukonda etu Jihova ki tuala ku mu xila; o bhu tualʼabha-phe Sobha i tu bhangela dingi kima kiahi?

⁴ O mu kuta ikutu ni akuâ, a vudisa maka ma kingoho ni kuloka ngó makutu; bhuanda ku a tula-phe kaxtiku ka a sabhukila kala ki buingita o kisasa kia ikolakola mu mbondongolo ja mibhanga, ku mábhia.

⁵ Akua bhata mu Samádia a-nda kuteketa mukonda dia kiteka kiâ kia kangombe ka Bete-Avene; o mundu uê ua kà ta jingololo mukonda diê, o kibuka kia jinganga ja iteka iâ a kà teketa mukonda dia matunda mâ ma di boto.

⁶ Asídia ue a kà mu bhakula kala ujitu kua sobha Jalebe. Ifalaíme ua-nda kubonga malebhu, o Izalaiele sonhi janda ku mu kuata mukonda dia mahamba mê.

⁷ Samádia a mu buikisa, o sobha iê a-nda ku mu jikinisa kala kifulufulu ku thandu dia menha.

⁸ O matala ma Avene, a-nda ku a sengulula mukonda kiene o kituxi kia Izalaiele; o ku thandu dia jikalatódio jê kua-nda kusabhuka minha ni hokokoso; ene à kʼambela o milundu, exi: Tu vunginienu! O tumilundu tuofele a kà tu ambela, exi: Lundumukinenu kuthandu dietu!

⁹ Tunde mu izuua ia Ngibeia ni kuta ituxi, eie Izalaiele, tata! Eie ua xikamʼé kienhokio. Manhi o mvunda ia anʼa isuéia, eie ki ia-nda ku ku kuatela mu Ngibeia?

¹⁰ Eme o mundu nga-nda ku a bhana kaxtiku katé ku muẋima uami kua zele; akua jixi a-nda ku a bhongolokela mu kúlua-nâ mvunda, kioso eme ki nga-nda ku a bhana kaxtika mukonda dia kutondala kuâ mu luiadi.

¹¹ Mbata Ifalaíme ua di bhange mukua ni kangombe kʼolonge, kʼejidila kiá kutitidila masa ni tiliku bhu dizanzu; maji mu xingu iê muene mua uabhʼomo, muene mu nga-nda kutula o kanga iami; Ifalaíme nga-nda ku mu kutila ku dikalu kala kabalu; o Juda ua-nda kudima, jakobo anga u kaiela ni kubula makende.

¹² Kunenu jimbutu jenu ja kuiuka phala mu bhongolole ja henda; bakenu mavu enu a maxinde, kuma thembu iii ia kusota Ngana, katé muene kieza, nʼa mi nokene ima ia kuiuka kala mvula.

¹³ Mua dimi phulu, enu mua bhongolola ituxi; ibundu i muá-di, ia tundu ku makutu; mbata mua dielela ku ima i mu funha mu ilunji ienu, ni ku ndumba ia makuenze a ita a mi vudila.

¹⁴ Kala kiki, mu jimbanza jenu mua-nda kubalumuka kibulukutu kia ita, o jimbonge jenu a-nda ku mi muangena-ju, mukuâ ni Xalumane kia muanga-muanga Bete-Halubele mu kizuua kia ita; bhu kumbi dienhódio bhene bhua sasujuila o mama ni tuana tuê.

¹⁵ Betele kiene ue kia-nda ku mi bhanga, enu mu akua bhata dia Izalaiele, mukonda dia kuiibha kua ituxi ienu; o kibuika kia sobha ia Izalaiele kia kà di meneka muene mu kimene-mene munhá.