Habakuke 2 - O Mikanda Ikola

Jihova u vutula

¹ Nga-nda kukala bhu kathôndo kami ka kikangidilu, ngi kala muene kuthanduʼa mbonge, anga ngi kala mu ku langidila, phala kumona uoso u ngi zuelesa, ni kiki ki nga kâ vutuila uoso u ngi ibhula.

² Bhenhobho-phe, Ngana ua ngʼitaia, uixi: Kisunji ki ua mono, soneka na-kiu; u ki seta muene ki lomboloke kiambote ku mabaia, phala a tene ku ki tanga, né hanji ku muthu ua mu lenga lusolo.

³ Mukonda kisunji kiki kia-nda kubhita bhu thembu ia tokala, ni kidi muene kuma bhu thembu iaxindi kia kà bhita muene, ki ki fulu, kana; se ua mono kia laleka mu kuiza, eie-phe kinga na-kiu, kuma ni kidi muene kia kà bhita, ki kia-nda ku kokoloka, kana.

⁴ Talesa muthu ua di zangeleka! O muẋima uê u nanuka ni ukumbu, kuma ki ua iukila kua muene; muthu uaiuka-phe u laiela mu kuxikana kuê.

⁵ Kala kiki, muene mu ku di uabhela kiavulu ni vinhu, ua kituka mukua mangonha; uala muthu uezala ni ukumbu; vondadi iê iia ni kuvula dingi mukuâ ni mbila iajikuka; uasoko ni kalunga-a-ngombe, kana-ku kima ki mu kuma, miji ioso u i bhongoluela kokuê, o ifuẋi ioso ku mundu u di kongela na-iu muene.

O makokolo atanu ku Jikaldeu

⁶ Ene osoʼá ka ka mu balumukina ni a mu tele o Sabhu ni kizuelu kiasuina mu ku muila, exi: Kokolo dia ió uoso u di sokoluela o mbote ni ima iangene ki ia mu tokala! Katé bhebhi, tata! Xi, lamba dia ió uoso u di vudixila o makongo!

⁷ Mbé athu ió ku uadi o makongo, ka kʼèza lusolo kokué? A ku talesa hadi, kua kà a tukumuka a bhiẋila? Eie-ze ua kà kituka u mbole iâ.

⁸ Kala ki ua bhûnda jinga ku miji iavulu, enʼoso ku mundu a kà ku bhûnda ue eie; mukonda dia manhinga ma athu mu ua bhubhisa, ni kutatesa ku ua tatesa jinga na-ku o jixi, ni mabhata, ni oso kiá a tungu momo.

⁹ Lamba dia muthu uoso u izalesa mʼonzo iê ni jimbote ja tundu mu nganhu ia kubhanga kiaiibha, phala nʼa tena kuta o kikalanga kiê bhua di leka kinéne, phala ngó nʼa tena ku di sukununa bhu lukuaku lua kubhindama ki mu tundila o hadi iene ku mundu!

¹⁰ O ki ua bhangʼiki, inzu ié ua i bhekela jisonhi; eʼmuene mu kubuikisa o mundu ua nzungule iú, ua te kituxi ku muenhu ué.

¹¹ Mukonda ni ditadi diòsokeke ku phalelu dia kà di kola, o muẋi ua dilèka bhu hongo iaʼnzu anga ua kʼètaiela.

¹² Kokolo dia uoso u tunga o mbonge ni manhinga, ua bhingi mu kumateka kutunga o dibhata u di mateka ni phulu!

¹³ Abha, ki kiejila kua Jihova dia Ifuẋi, kia kuila o mundu ukalakala ngó phala túbhia, o ifuẋi iʼathu na iokojoke mu kingoho?

¹⁴ Mukonda o ixi ia kʼèzala ni kuijiia kua fuma ia Nzambi, mukuâ ni menha ki ezalesa o musanza ua kalunga.

¹⁵ Lamba dia ió uoso u bhana mukuá kunua uhólua! Eie uala ku mu zukamesa o kisudi kié, anga u mu kodiuisa, phala kioso kia zula ni u mu tale tuẋi iê.

¹⁶ Bhu kididi kia kijingu, ua kà sebuluka katé ki ki ku kuma; nuá-ku ue, u kale kala u mukua dibôlo a kambe ku mu saia; o dikáu diene bhuʼkuaku lua dilu lua Nzambi dia kà ku bilukila, o fuma ié ia kà laukila lusebu mukua ni ima iòluse anga i zangiua.

¹⁷ Mukonda o usuéia ua bhange kua Libanu ua kà ku vungina eie, o kia buidisa o iama ia misalanganda kia kà ku bhekela uoma; mukonda dia manhinga ma bhubhisa ma athu ni usuéia uavulu ua bhange kulu dia mundu, ni mu jimbanza, ni ku athu oso kiá atungu-mu.

¹⁸ O kiteka-phe kiósonge kualʼo hete ia kusonga, kia sedivilaʼhi? O kiteka kia kuzunza ue, ki longa o makutu, kia sedivilaʼhi phala o ua ki bhange a dielele o kikakalalu kiê, na kuate kubhanga ima ki itena kuzuela?

¹⁹ Kokolo dia ió uambela o muẋi, uixi: Balumuka! o ditadi dia kambe o dikanu dia kuzuela anga u di ambela, uixi: Phaphumuka! Manhi kiteka ki tena kulonga? Sumbala a ki bhange kiua ni ulu ni phalata, maji moxi diê ki muala nzumbi, lémbua.

²⁰ Jihova-phe uenʼiê mu Tembulu iê ikôla; ixi ioso i dixibhe bhu pholo iê.