Habakuke 1 - O Mikanda Ikola

O Kikuma kia Juda; Jikaldeu a ka mu kaxtikala

¹ O kinemenu kia mono Polofeta Habakuke mu kisunji kia Diulu.

² Ngi dikola katé bhebhi, Ngana, eie ki ua mu fula ku ngivua? Ngi ta mutendu, ngixi: Usuéʼiê: Eie-phe u kamba ku bhulula?

³ Phalahi u ngi muesa o ufusa ni lusebu, anga u ngi bhangesa kutala ungulungumba? Kuma ku pholo kua ngi xikamena kibuika ni kubhondalala; sai ue a vulumuna jimvunda ni ku kuata kuzoka.

⁴ Mukonda dia ima ienhiʼii kitumu kia zondo, o kubatula mu kidi ki kua moneka. Kuma mukua ituxi u bhondeleka uaiuka, o kutetulula mu kidi anga a ku lémbua.

O kuvutula kua Jihova

⁵ Kengelelenu mu kaxi ka miji, talenu mu diuane hanji; kuma nga-nda ku bhanga kikalakalu mu izuua ienu muenhumu, kia bhingi mu lémbua ku ki xikana se a mi jimbuila-kiu.

⁶ Mukonda ngi balumuna o muiji ua jikaldeu, muiji ua temanana, uazanzuka, o ixi u i endela bhu kuzanza kuê, anga uia mu ku bhingana mabhata ki ma mu tokala.

⁷ Muiji uenhú kutema kuahi, u kuata uoma; uene kiá u di bhangela o itumu iê ni mabatuilu ma unêne uê.

⁸ O jikabalu jâ, mu ku bhebhuluka ni ku sangama, jingu ndenge; mu ku dimuka ue kota, o itôto mu ngoloxi ndenge; o a mondala-ku enda ni ku di muangena kuene kuoso; kiene muene, amondadiʼê a kà tunda makanga, a di leka lusolo mu kubhita bhulu mukua ni jiholokoko ki jilengela ku mbole mu kúdia.

⁹ Ene oso a kà di lukula ni nguzu; pholo jâ ja kà kala mu sota ku tundila o dikumbi, anga a bhongolola jipelezu kala museke.

¹⁰ Muiji uenhú jisobha joso a ji tobhesa, a bhanga kasekelu ku anʼa jimbanza, o kia talesa o jimbonge jâ, a jiʼolela, kuma mu ku ji tutila nzungule ia mavu, a kà ji tolola hé a ji tambula.

¹¹ Hé a bhita mukuâ ni kitembu kia kibhungu, anga endelela muene nzaká; enhá-phe à kala mu kuêla muene, kuma a fika a ki bhange ni nguzu ia tundu kua nzambi iâ.

Polofeta u mu bhingila

¹² Tunde mʼokulu Eie kʼemuene u Jihova, Nzambi iami, Ukôla? Ki tualʼiki, Ngana, ki tua-nda kufuila-bhu; kuma Eie Ngana, o muiji iú ua u te phala kufundisa ni kubatula, kiene ki ua ki bhangela, Eie u ndanji ia kidi, kuma muiji iú ua u xindi kienhiki phala kulonga.

¹³ Kuzela kuene, Ngana, ku mesu mé, kuma Eie kutené kuiala ima iaiibha mba kutonginina kioso athu kiala kutatesa akuá; abha-phe, Ngana, u lendukila kiebhi athu a bhanga kiaiibha, anga u dixibha muene kioso mukua ituxi kia minha ió ua beta kuiuka kiambote, o muene ndenge?

¹⁴ Pbhala-hi, Ngana, athu a a kita mukuâ ni jimbiji ja kalunga, mba mukuâ ni ibamba ia kambe u i tumina?

¹⁵ Ene oso muene nguma u a zangumuna ni nzolo iê, u a komba ni uanda uê anga u a kuata muene; mu kienhiki muene uàkala mu kutana ni kusanguluka kiavulu.

¹⁶ Anga, mukonda dia kiki, uanda uê u u satela, o kibhongoluelu kiê u ki ohela ima ia mazumba, kuma ni imʼiii mbandu iê ia jingi kiengi, o kúdia kuê kua vulu dingi.

¹⁷ Manhi uenda jinga kienhiki ni kusukumuna o uanda uê, anga u kamba kuzumbuka mu kujibha mundu ni lujiji sé ngó ku a kuatela henda?