Filipe 4 - O Mikanda Ikola

Kutetuluka, kusanguluka, kusamba. Kuxinganeka ioso iauabha-bhu

¹ Uila kiki, enu jiphange jami nga mi zola, nga mʼindi kiavulu, o ngunzu ue iavulu i nga mi kala na-iu! Enu muala mu ngalasa iami, mu kitundu kiami, kolokotenu kiá kieniiki mua Ngana, enu akuetu.

² Ni Evodia, ni Sindike nga a diondo, adi luulule, a kale muẋima umoxi mua Ngana.

³ Ni eie ue u soko diami dia kidi, nga ku diondo, ua a kuatekesa, ahatu enʼió. Kuma ene a ngi bande mu sedivisu ia kusambukisa o Njimbu Iambote, kumoxi ni Kelemende ue, ni amukuâ dingi u nga kalakala-nâ, majima mâ moso mala mu divulu dia muenhu, dia tokala Nzambi.

⁴ Enu-phe, sanguluka jingʼ enu mua Ngana. Ngi tona o ku ki zuela: Sangulukenu!

⁵ Kalenu mu athu mua tetuluka, athu oso a mʼ ijiie na-kiu. Ngana ua zukama.

⁶ Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena.

⁷ Bheniobho o kutululuka kua Nzambi kua somboka o kitongoluelu kioso kia muthu, kuanda ku mi bateka miẋima ni ilunji, mu ukamba ni Kristu Jezú.

⁸ Mu ku mi bhana-phe o mahezu, jiphange jami, ioso ima ia kidi, ioso ima ia ujitu, ioso o ima iaiuka, ioso o ima iazele, ioso ima iauabha, ioso o ima iene ku i tumbula, se sai-ku uthu, se sai-ku kia kuximana, iene ima i mu xinganeka.

⁹ Ioso ima i mua di longo kokuami, i mua ngʼ ivu na-iu, i mua ngi muene na-iu, iene kiá o ima i mu bhanga jinga. O Nzambi mukua ku tu bhana o paze, anga u kala ni enu.

Phaulu u sakidila akua Filipe o mbote ia mu bhange. Kumenekena ni kulekela

¹⁰ Kusanguluka kuahi ku ngala naku mu muenhu uami mua Ngana! Mukonda hanji ki mua di xibhile, lelu mua buingita dingi kiengi ni ku ngi xinganeka. Kuma ki mu kambele muẋima, maji mua kambele kithangana kia kulondekesa o muanu u mua ngi kala na-u.

¹¹ Maji ki nga mu ki zuelela kubhindama, kuma nga di longo kiá kuila uoso ukalelu u ngala, ki uidi kima, ua ngi soko.

¹² Ngejiia kutunuka ni kukala mu kubhindama, ngejiia ue kukala mu kiavulu. Kuene kuoso nga di longo kuila ku ima ioso kia ngʼ ijidila o kuikuta, mba kukala ni nzala, o kukala ku nzungule, mba o kukala ni katolo.

¹³ Ima ioso nga soko na-iu mua Kristu ió mukua ku ngi bhana o kutena.

¹⁴ Maji-phe, enu ue mua bhange kiambote, kuma muala mu kisangela ni eme mu jihadi jami.

¹⁵ Enʼuenu mua kʼijiia, mu akua Filipe, kuma bhu dimatekenu dia Njimbu Iambote, thembu i nga katukile ku Masedonia, kana Ngeleja i nga kexile na-iu mu kisangela kia kubhana ni kutambula, kikale enu ngó ubheka uenu. Ngeleja ienu iene ngó ia ngi kuatekesa.

¹⁶ Katé ni mu Tesalonika, kioso ki nga kexile ni kubhindama, enu mua tumine lumoxi ni luiadi ku ngi bhindumuna.

¹⁷ Kana, ki mukonda ngalù sota a ngi bhana; maji ngalù sota enu mu ime ibundu i mi nganhalesa ku konda ienu.

¹⁸ Kiki-phe ima ioso i mua ngi tumikisa, nga i tambula, eme ngala na-iu kala ia ngi vudila. Ngezala ni imbamba ia ngi bhekela Epafrodito i mua mu tumu na-iu, kifua mukuâ ni dizumba di nuha kiambote, sata i tambulula Nzambi, i mu uabhela kiambote.

¹⁹ O Nzambi iami ue, u mi dikila enu mu kubhindama kuoso ku mu kala na-ku, kala kia fuama mu jinzungule jê mu fuma mua Jezú Kristu.

²⁰ O fuma-phe i kale ia Nzambi ietu, Tata ietu, katé ku hadia ni hadia. Amén.

Umenekenu

²¹ Athu angene a Nzambi koko a tokala Ngana Jezú Kristu, ene oso a menekene. O jiphange u ngala-nâ kunu, a mi menekena.

²² Akua Ngana Nzambi oso kunu a mi menekena, kota-kota ala ku mbèle ia Sézalu.

²³ O kiadi kia Ngana Jezú Kristu, ki kale ni nzumbi jenu enuʼoso.