Filipe 3 - O Mikanda Ikola

O kueha ima ioso mu kubhanduluka ni Kristu

¹ Mu kubhana o mahezu-phe, phange jami, nga mi ambela kuila Ngana a mi bhane kusanguluka kua soko. O mu ku mi sonekena o maka ene amoxi, eme ki kia ngi kumu, mbata, phalʼ enu kukondama.

² Alukenu akua midimu iaiibha, edi kala jimbua, aku kujijila o ku di ta jiphoko ku mikutu.

³ Kuma o kusaia kua kidi, etu tuala na-ku, tu akua kubheza Ngana ni Nzumbi ia Nzambi, ki ene, kana! Kuma etu o kujinga kuetu kuala mu kudituma ni Kristu Jezú. Ki tu dielela kima ki bhanga athu ku kanga mu xitu.

⁴ Sumbala eme se ngambele kudielela mu xitu, nga soko-bhu uami. Se bhu kala muthu uengi ua fika kudielela ima i bhanga athu ku kanga mu xitu, eme kotʼ èlele, mukonda ngala ni ima iavulu i ngi bhekela kuxinganeka kieniiki.

⁵ Ngi muthu a ngi saia mu kizuua kia kanake, tunde bhu kumbi dia ku ngi vuala. Nga tundu ku mbutu ia Izalaiele, ku muiji ua Bejami, ngi Hebeleu ia kidi mu ʼaxaxe ka Jihebeleu. Mù kuibhula ki kala o kukumbidila Kitumu kia Jijudé, eme nga kexile ngi Falizé.

⁶ O mu muanu ua kualuka o Kitumu, nga kexile ngi muzukutixi a Ngeleja. O mu kuibhula o kulunga kua kulungila mu kukumbidila o Kitumu, eme ki ngi ki tondala ni kima.

⁷ Maji-phe o ima ioio, ia ngi kexile kijingo, nga i kiti kingoho mukonda dia Kristu.

⁸ Kidi kiene, ima iosololo ngi i kita kingoho mu ujitu ua kuijiia Kristu Jezú, Ngana iami. O mukonda dia muène, ima i nga kuatele, nga i texi dikanga, ioso ia di boto. Ememuene-phe nga i kiti dixilu, phala ngi nganhale Kristu, nda ngi kondamene kua Muène.

⁹ O kulunga kuami, ku ngi kala na-ku, ki ku kale kua kulungila mú kualuka o Kitumu, maji kua kulungila mù xikana Kristu, kuene o kulunga ku tunda kua Nzambi, kuijiia mu kuxikana.

¹⁰ Mukonda ngendi ngó kuila Kristu ngi mu ijiia muene, ni nguzu ia kufukunuka kuê, ni ngi kale mu kisangela kia jihadi jê, ngende ni kudifangana-nê mu kufua kuê;

¹¹ ni kudielela kuila sumba ku matelu-matelu nga kà bhixila bhu difukunukinu dia madifundu phala kutambula o muenhu.

O kulengela o kubhiẋila, Kusukamena ki kuenda

¹² Eme ki ngedi kuma nga zubha kiá kutolola, ki ngedi kuma nga tenena kiá. Maji nga jiji ni kuenda, phala nga kà tambule kioso eme kia ngi kuatela Kristu Jezú.

¹³ Enu jiphange, eme ki ngi di fika luua kuma nga kuata. Maji ngi bhanga-phe kima kimoxi: Ngiia ni kujimba o ima ia xala ku dima, ni ku di sungila ku ima iala ku pholo.

¹⁴ Eme nga suina ni kulengela kubhiẋila bhu mbambe bhua kà bhana o dilau dia tu ixanena ku diulu kuala Nzambi, mua Kristu Jezú, phala o muenhu ki uabhua.

¹⁵ Ndokuenu kiá, etu oso-ku tua kulu kiá mu nzumbi, tu kadienu ni kilunji kia kuxinganeka jinga kala kiki. O ki kala sai ni bhuma bhu mua kuatela kilunji kiengi, kieniokio ue Nzambi u mi jimbuluila-kiu.

¹⁶ Maji bhuoso kiá bhu tua suku, tu kuatienu uendelu umoxi.

¹⁷ Enu jiphange, suinenu mu kukala mu afikixi ami eme, mu tongolole ue oso akua kuenda kienkiki, kala etu ki tua mi bhana o phangu.

¹⁸ Kuma sai-ku avulu enda kala ki nga mi tangela jinga luavulu kiá, ni kiki ngi mi tangela dingi, ni kudila, kuila ala jinguma ja dikulusu dia Kristu.

¹⁹ O dizubhilu diâ kutexika mu infernu; nzambi iâ o imbamba ioso inda o mukutu uâ. Thathe iâ, o imbamba i kuatesa jisonhi; a xinganeka ngó ima ia bhoxi.

²⁰ Maji-phe, etu kokuetu ku diulu, ku tua kinga ku tunda Mubhuludi uetu, Ngana Jezú Kristu.

²¹ Muène, o mukutu uetu uasebuluka ua kalunga, ua kà u bhana kidifua kiòbhe, phala u di fangane ku mukutu uê Muène ua kubenha, kabasa o kutena kuê kuala na-ku, kuasoko mú tolola ima ioso ni i mu belesela muène.