Filipe 2 - O Mikanda Ikola

O unéne ua Kristu ni kuditululula kuê

¹ Uila kiki, mua Kristu se muala o kulunga, se muala kutululuka kua henda, se muala ukamba ua Nzumbi, se muala jihânji ni jihenda,

² ndokuenu mu ngi tenesene o ngalasa iami mu kukala ni ilunji ia sokelela, mu kale ni muenhu umoxi, ni muẋima umoxi.

³ Ki mu bhange kima ni masunga a kusota ngó mbote ienu, mba izala ia ku mi ximana. Maji ni kubatama, kala muthu a kite mukuâ kota diê; Kana ku di fika kuila mua beta kuiuka o akuenu ndenge.

⁴ Ki bhu kale ue muthu a xinganeke ngó ima iê-muène, maji enu oso mu xinganeka ue ima ia akuenu.

⁵ Mu kaxi kenu, kuatenu muẋima iú kala ua kexile na-u Kristu Jezú;

⁶ muène kia kexile, o kidifanganu kiê kiene kimoxi ni Nzambi, maji ka sotele mu nguzu o kusokela ni Nzambi.

⁷ Inda-phe Muène ua di tolesa, anga u tambula kididi kia mubhika, hé u di bhanga kidifua kimoxi ni athu,

⁸ o kia zubha kutukuluka mu kidifua kia muthu, muène ua di tununa, anga u tumaka katé mu kufua—kufua-phe kiá kua sebuluka kua dikulusu.

⁹ Mukonda dia kiki, Nzambi ua mu zangeleka kiavulu, iú ua mu bhana dijina dia tundu o majina moso.

¹⁰ Uila kiki, mu kujingisa o dijina dia Jezú, ene oso a di fukamena, kixi ió ala mu diulu, kixi ala mu ngongo, kixi ala koxi a mavu mu ʼalunga.

¹¹ Ki bhu xala dimi di kamba kufisala kuma Jezú Kristu muene Ngana, mu kubhana o fuma kua Nzambi, Tata.

Jikidistá ala mukengeji ua mundu

¹² Uila kiki, enu akuetu, kuma enu mu akua kutumaka jinga, kana ngó bhu pholo iami kioso ki ngi kala-bhu maji mua fuama mu kala dingi kota mu ku ngi tumaka, kiki ki nga tundu-bhu. Mu kieniiki, tutumbenu ni ujitu uoso ni uôma, phala mu mone o kubhuluka.

¹³ Kuma Nzambi muène u kalakala moxi dienu, mu ku mi solesa ni ku mi bhangesa kutumaka kioso kia mu kala mu vondadi iê iambote.

¹⁴ Ima ioso i mu bhanga i kale sé kufunda, mba kukuata kuzoka,

¹⁵ phala mu kale mu athu ki mu moneka kuêla, ki mu moneka kulokalala, mu anʼ a Nzambi mua tenena sé kikuma, mua di lungu ni muiji ua athu a bhengalala, ezala ni ituxi.

¹⁶ Mu ku a tela o Maka ma muenhu, muenda ni kumoneka mu ʼaxaxe kâ kala mu mikengeji ia jithethe-mbua ku diulu. Se kiene ki mu bhanga, eme ue ngi kala ni kia kutela thathe bhu kizuua kiná kia Kristu. Phala ki ngà kèle kala nga huha dikanga dioso, maji nga tale ngó hadi ia hatu.

¹⁷ Kuma sumba anda ku ngi zunzumuna o manhinga, o muenhu uami anga a u bhana kala sata iòbhakuile kua Nzambi mukonda dia kuxikana kuenu. O kieniiki se ki bhita, eme ngi ki tanena, hé ngi sanguluka kumoxi ni enu oso.

¹⁸ Enu uenu tanenu, mu sanguluke kumoxi ni eme.

Timote a mu ximana, ni Epafrodito

¹⁹ Nga fika-phe, mua Ngana Jezú, kuma kindala ngi tuma Timote ku mualʼ oko, phala o muẋima u ngi uabhe mù kuivua o jinjimbu ja kioso ki muala kubhita.

²⁰ Kuma ki ngala dingi ni muthu ua sokela-nê muẋima, u mi kala ni muanu ua kidi mu ku mi tambula konda.

²¹ Mukonda akua ene oso a bhindamena ima iâ-ene, ka bhindamena ima ia Jezú Kristu.

²² Enuenu-phe, muène mua muijiia kioso kia tundu kiambote mu ku mu lola. Kuma mukuâ ni mona u di tuma ni tatʼ â, muène kiene ue kia di tumu ni eme, mu ku sambukisa o Njimbu Iambote.

²³ Kieniiki-phe, nga fika ku mu tuma lusolo ku mualʼ oko. Nga kinga ngó kuijiia kiambote kioso kianda ku ngi bhita eme kuku.

²⁴ Maji nga dielela mua Ngana, kuma ni eme-muène nga kà mi sanga kindala kueniʼoko.

²⁵ Nga ki mono-phe kuila kia bhingi ngi tuma ue Epafrodito kueniʼoko, phangʼ iami, mukalakadi, disoladi ni mukuetu mu ita, oko muène mukunji uenu mua mu tumine o ku ngi bhindumuna.

²⁶ Kuma muène ua mʼindi ku mi mona enu oso, ua di suku kiavulu, mukonda mua mu ivu ni kukata.

²⁷ Kukata muene kua kidi, ueji kufua. Ngana Nzambi-phe ua mu kuatela henda. Maji ki muène ngó ubheka uê, ni eme uami ue a ngi kuatela henda, mukonda ngejù kala ni lamba dia di bande kuʼ lamba.

²⁸ Epafrodito kiene ki nga lengulukila ku mu katula, phala ki muanda kudimona-nê mu sanguluke luamukuâ, eme uami o malamba ma ngi tebhunuke.

²⁹ Mu tanesienu-phe mua Ngana ni ngalasa ioso. Mukonda athu oso a kala kiki, mu enda ni ku a xila.

³⁰ Kuma o sedivisu ia Kristu, Epafrodito ia mu bhekele mu kukamba ngó kʼofele phala kufua. Muène-phe ua zembe o muenhu uê, mu ku ngi dikila eme, bhu kididi kienu mua kambele-bhu.