Filipe 1 - O Mikanda Ikola

Umenekenu

¹ Eme Phaulu, ni Timote, abhika a Kristu Jezú, tua tumikisa o mukanda iú ku mundu uoso ua Nzambi mua Kristu Jezú, a tungu mu mbanza ia Filipe. Mukanda uia ue ku adiakime a Ngeleja, ni kua ió a mu kalakala-mu, o Jibispo ni Madiiakono.

² O kiadi ni kutululuka ku tunda kua Nzambi, Tata ietu, ni kua Jezú Kristu, Ngana ietu, kukale jinge ni enu oso ku mualʼ oko.

Phaulu ua sakidila Nzambi mukonda dia akua Filipe

³ Ngene mú sakidila jinga Nzambi iami, kioso ki ngi kala mu ku mi xinganeka.

⁴ Ithangana ioso mu kusamba kuami, kioso ki ngi mi bhingila enu oso, ngi bhinga ni ngalasa.

⁵ Mukonda dia kikexilu kienu kia ku di banda kokuami mu ku ngi kuatekesa mu kusambukisa o Njimbu Iambote, tunde mu kizuua kiadianga katé lelu.

⁶ Kuma ngedi ni kudielela kima kiki, kuila: O Nzambi, ua mi andekela o kikalakalu kiambotʼiki mu mienhu ienu, uanda ku mi zubhila-kiu katé bhu kizuua kia Jezú Kristu.

⁷ Enu mua ngi kala ku muẋima izuua ioso! Nga fika kia ngi tokala muene ku mi xinganeka kieniiki enu oso, mukonda ni ku malubhambu, ni mu kuzokela o Njimbu Iambote, ni mu ku ijidisa kia fuama, enu oso mua nomona ni eme ku kiadi kia ujitu iú ua ngi bhana Nzambi.

⁸ Nzambi muene uala mbangi iami, ia hânji iavulu i nga mi kala na-iu mu jihenda ja Kristu Jezú.

⁹ Mu musambu uami nga bhingi-phe kiki: Kuma o henda ienu i vule dingi kinéne, mbé mu kale ni kuijiia, mu kale ni kilunji kia tongoloka,

¹⁰ phala mu tene kusola o ima ioso iauabha, nda mu kale sé kadia, sé ngó kima ki mi fudisa, katé bhu kizuua kia Kristu.

¹¹ Muime kiavulu ibundu ibundu ia tokala o kuiuka, iijiia kua Jezú Kristu, i bhekela kujingisa ni kuximana Nzambi.

O upelezu ua Phaulu ki ua O fudisa o maka ma Nzambi. O kulaia Kristu, o kufua kubhanduluka

¹² Nga tumu-phe ku mʼ ijidisa, jiphange, kuma o ima ia ngi bhiti ki i fudisa, kana, inda ia bhekela o Njimbu Iambote kusambuka dingi kiengi.

¹³ Katé o malubhambu mami ma di monekena ku akua kulangidila mu lumbu luoso lua palasiu ni ku athu amukuâ oso, kuma ma Kristu.

¹⁴ O ku jiphange mua Ngana, avulu muene mukonda dia upelezu uami, abhu dingi o hele mu kubeta kudielela Ngana. Kieniiki, a suina dingi kiengi ni kutanga o Maka ma Nzambi sé uôma.

¹⁵ Amoxi-mu mu kutanga Kristu, a ki bhangela ngó dixinga ni mvunda; amukuâ-phe a mu tanga ni vondadi ia muẋima uambote.

¹⁶ Iá a ki bhangela henda, kuma a kʼ ijiia kuila eme o Ngana Nzambi ua ngi bhana o kikalakalu kia ku bhangela o Njimbu Iambote.

¹⁷ O iá-phe a tumbula Kristu, maji a ki bhagela ngó mukonda sai kia bhindamena, inda ngiia ala ni kàdia. Ene a fika kuila a ngi tatesa dingi kiavulu ku malubhambu ku ngalʼuku.

¹⁸ O kiki, ngiia-phe kiebhi? Ku ifua ioso, kixi ku kidi, kixi ku makutu, kabasa Kristu muène a mu tange kuene kuoso. Eme nga ki sangulukila, hanji ngenda ni kusanguluka.

¹⁹ Kuma nga kʼ ijiia kuila muene muoso mu ngʼ ijila o kujituka, kixi mu kubhinga kuenu ku mualù ngi bhingila, kixi mu kukudila kua Nzumbi ia Jezú Kristu.

²⁰ Mukonda eme o kia ngi kate kiavulu, ki ngendi ni kudielela kuami kuoso, o kuila ki ngi lémbue kubhanga kioso kia ngi tokala, kala ki ngene kiá mù bhanga tunde ukulu, kota-kota mu kindala mumu, mbé ngi kale muene ni kubhua o uôma, phala ngi tene kufumanesa Kristu ku mukutu uami, kixi ku muenhu, kixi mu kufua.

²¹ O muenhu-phe, kima kiahi? Kuma eme ki ngalʼ iki, o muenhu muène Kristu. O kufua, kubhanduluka.

²² O ki kala-phe kia ngi bhana o kukola muenhu mu xitu, ku tunda dingi kuima kuavulu mu kukalakala kuami—kioso ki ngi sola-bhu-phe ki ngi kʼijiia.

²³ Ngala-phe bhu kibhidi kia ngi phopheka ku mbandu ni mbandu, mukonda ngala ni vondadi iavulu ia kukatuka kunu, phala kuà kala-mi kiá ni Kristu; kuma ujitu uê u kala kotʼ èlele.

²⁴ Maji o kuxala-phe kunu, mu xitu, kua bhingi mukonda diʼenu.

²⁵ Sai-phe kudielela ku ngala naku, kua ngʼ ijidisa kuma nganda kuxala, ngi xikama hanji ni enu oso, mu ku mi bheka dingi ku pholo, ni ku mi bhekela kusanguluka mu kuxikana.

²⁶ Phala o kutana kuenu kuvule dingi mua Kristu Jezú, mù kuiza kuami kukala dingi ni enu kumoxi.

²⁷ Kala kiki, hé kima, o uendelu uenu u kale uendelu ua fuama mu Njimbu Iambote ia Kristu. O ki kala ngi mi sanga koko, mba ngi kamba ku mi sanga, kimuua ngʼivua jinga kioso ki muala kubhita na-kiu, kuma mua kolokota ni muẋima umoxi, muedi ni muenhu umoxi mua suinina kubhangela o kuxikana ku tunda ku Njimbu Iambote.

²⁸ Kana kukala ni uôma ua jinguma. Maji múbhua jinga uôma, phala ki kale kijimbuete kia ku a edikiza kuila anda kutoloka; phala enu-phe, kiedikiza kuila muanda ku a tolola, mbata o kubhuluka kuenu ku tunda kua Nzambi.

²⁹ Mukonda Nzambi muene ua mi bhana o ujitu ua kubhiẋila Kristu, kana ngó o ku mu xikana, maji ni ku mu talela ue hadi.

³⁰ Kuma kindala enu ue mu tena kutambula mbandu kumoxi ni eme mu ita. Mukonda o ita iene imoxi i mua muene ko kuami, iene hanji i muala ku ngʼ ivua na-iu kindala.