Filemone 1 - O Mikanda Ikola

Umenekenu

¹ Eme Phaulu, hutile mukonda dia Kristu Jezú, kumoxi ni phange ietu Timote, tua sonekena Filimone tua mu zola, mukalakadi ni mukuetu, ni Ngeleja ioso ialù bhongoloka ku bhata diê.

² Mukanda iú uia ue ni kua phange ietu ia muhatu Afiia, ni Arkipo disoladi ni mukuetu mu ita i tuala kulua.

³ Ku kale kiadi ku ualʼoko, ni paze i tunda kua Nzambi, Tata ietu, ni kua Ngana Jezú Kristu,

O henda ni kuxikana kua Filimone

⁴ Kamba diami Filimone, kioso ki ngi ku lembalala, ngene mù sakidila jinga Nzambi, ni ku ku tumbula mu kusamba kuami.

⁵ Kuma o henda ié i ua kuatela akua-Ngana oso, ngevu ku i zuela; ni kuxikana ku uene na-ku kua Ngana Jezú.

⁶ Ngalù bhinga ue Ngana Nzambi phala o kuongama kuetu mu kuxikanʼoko kua tu kutu kumoxi ni eie, kubhekele o kuijidisa dingi kiasoko o mabesá moso mu tuene mu kutambula ku muenhu, mukonda dia kisangela kietu ni Kristu Jezú.

⁷ Kuma eme ngala ni ngalasa iavulu ni kutululuka mukonda dia henda ié, mukuetu, kuma iene ku ngi suinisa. Mukonda eie uene mu kubhetula o miẋima ia mundu ua akua-Ngana oso.

Phaulu u diondela Onézimo

⁸ Uila kiki, kuma ngi phangʼié mua Kristu, nga-bhu uôma ni ngi tene ku ku tumina kioso ki ua tokala kubhanga.

⁹ Inda-phe ngi ku dionda, mukonda dia henda ié i nga ku kuatela, maji ngandala ngó ku ku bhinga kima kimoxi. Sumbala ngala ngi Phaulu dia muthu Uokulu kiá, ngunza ia Kristu Jezú, hutile iê.

¹⁰ Mu kienhiki, nga ku diondela Onézimo, ua di bhange monʼami ua kidi nga mu vuala mua Kristu Jezú. Mukonda kioso ki ngala ku malubhambu muʼaleia, kiene ki nga di bhange ngi tatʼâ mu nzumbi.

¹¹ Onézimo muenhú sumbala mʼokulu ua kambele ku ku kuatekesa, maji o kiki-phe, u tu kuatekesa kiavulu, ni eie ni eme.

¹² Muenié-iú nga mu kutumikisa-né dingi, kifua muène ualuia kumoxi ni muẋima uami eme-muène.

¹³ Sumbala ngendile kuila ngi kala-nê kunu, mbé bhu kididi kié-eie, muène ende ni ku ngi kuatekesa, kiosuʼiki ngala mu kaleia mukonda dia Njimbu Iambote.

¹⁴ Ki ngi mesena-phe ku ki bhanga, kuila ngi xala-nê sé kuivua kioso ki ua xinganeka, phala o mbote i u ngi bhanga, ki i kale ia ku ku bhinjika, maji ia vondadi.

¹⁵ Sumbala kiene ki mua di batukila ni Onézimo mu kithangana ngó, phala o kia vutuka a kale muthu u xalela-nê.

¹⁶ Mukonda mu kindalʼumu, o muène kala dingi ngó mubhika, maji mubhika ndenge kiá, kuma uala phange ia jihenda mua Jezú Kristu. Muène ni kidi, phange ia jihenda ko kuami. Maji kotakota dingi mu jihenda ko kué, ni ku ubhika mu xitu, ni ku uphange mua Ngana.

¹⁷ Kala kiki, eie se ua ngi mono-phe ngi mukua-kisoko kié, Onézimo kia mu vutukʼokio, mu tambulule kala eme-muène ua ngi tambulula.

¹⁸ Se ua ku zangela kimbamba-phe, mba ua ku di dikongo, ngi tele na-kiu ku konda iami.

¹⁹ Eme Phaulu nga ki soneka ni lukuaku luami muene, kuila: Hinu ngi ki futa. Oko ki ngi bhindamena-phe ku ku lembalesa kuila eie-muène o muenhu ué ua u di dikongo ko kuami.

²⁰ Kala kiki, phangʼiami, ndoko kia mukuetu, u ngi bhange o mbote mua Ngana, mbé u ngi nhohese o muẋima kuma ngala ngi phangʼié mua Kristu.

²¹ Kienhiki ki nga mu ku sonekena, mukonda muẋima ua ngi dielela kuma kioso ki nga mu ku bhinga, eie uanda ku ki bhanga. Ngejiia muene kuma ki nga tange ki kiene ngó ki u bhanga, maji uanda kuta-ku dingi.

²² Kiosuʼiki-phe ngi iudikile kizalu, kuma nga fika Nzambi mù kuivua o kusamba kuenu nganda kujituka, phala ni ngi mi sange koko.

Jitekalu ni kulekela

²³ Epafala, hutile ni mukuetu, ngalanê muʼaleia mukonda dia Kristu Jezú, ua ku menekena.

²⁴ Ni Marku, ni Aristarko, ni Demase ni Luka, akalakadi ni akuetu, a tumu uâ ku mi menekena.

²⁵ O kiadi kia Ngana ietu Jezú Kristu, ki kale ni enu oso.