Estere 9 - O Mikanda Ikola

Jijudé a tolola jinguma jâ

¹ Kutula bhu mbeje ia kaiadi ku dikuinhi, iene mbeje ia Adale, kizuua kiê kia kuinhi ni kitatu, kuzukama ku thembu ia zuela muenexi, ia tokala kukumbidila o ngonge iê ia xikisa, kizuua kienʼokio, jinguma ja jijudé a fikile kuma a-nda ku a tolola, manhi-phe ene-ku a-nda kukakuka, mukonda jijudé ene a-nda kutolola oso a a zembe.

² Kizuua kienʼokio jijudé ji di bhongolola mu jimbonge jâ, mu jisengu joso ja muenexi Asuuelu, phala kubhânga ni ió oso a sota ku a bhanga usuéia Mu kuiza-ku-phe kana muthu ua tena kuimana mu kubhânga-nâ, kuma athu oso mu jisengu uoma ua a kuata kiá ua jijudé.

³ Jisobha joso mu jisengu, ni jisátrapa, ni jinguvulu, oso kiá ala mu sedivisu ia muenexi, a kala mu banda o jijudé, kuma uoma ua Moledekai ua kuata.

⁴ Mukonda Moledekai ua tambula ukota mʼonzo ia muenexi; fuma iê ia sambuka mu jisengu joso; kijingo kiê anga kiia ni ku di bandekeza kizuua ni kizuua.

⁵ Jijudé anga ji beta jinguma jâ joso ni mukuale, a jibha, a buidisa, anga a bhanga kioso kia mesenene ku a bhanga ene kua ió oso a a zembe.

⁶ Mu mbanza ngó ia Suzana, jijudé ja jibha-mu hama jitanu ja mala.

⁷ Ni Padisandata, ni Ndalafone, ni Axipata,

⁸ ni Polata, ni Adaliia, ni Adidata,

⁹ ni Padimaxita, ni Adisai, ni Alidai, ni Vaisata,

¹⁰ kuinhi dia muthu anʼa mala, ene oso anʼa Hamane monʼa Hamedata, nguma ia jijudé, a a jibha ue; maji jimbongo jâ-phe ka ji bhûndu, kana.

¹¹ Kizuua kienʼokio muenexi a mu tudila o konda ia athu oso a a jibha mu mbanza ia Suzana.

¹² Muenexi anga u ambela na mvuale Estere, uixi: Jijudé a jibha ia a buidisa hama jitanu ja mala mu mbanza ngó ia Suzana, kumoxi ni kuinhi dia mona a Hamane; o mu jisengu jamukuá ja muenexi, a bhange kiebhi? Kiki-phe kima kiahi dingi ki u ngi bhinga? A ku bhane-kiu. Mba-phe kima kiahi dingi ki u sola? A ki bhange.

¹³ Estere anga u mu ambela, uixi: Se kiene ki uabhela muenexi, a bhese jijudé joso ja tungu mu mbonge ia Suzana mumu, kuila mundu a bhange dingi kioso ki ua a bhana o disesa lelu; o kuinhi dia anʼa Hamane a a nhenge ku mukambu.

¹⁴ Muenexi anga u tuma ku ki bhanga; a ki xikisa ngonge mu Suzana; o kuinhi dia mona a Hamane anga a a nhenga.

¹⁵ Jijudé a tungu mu Suzana anga a di bhongolola dingi mu kizuua kia kuinhi ni kiuana, bhu mbeje ia Adale, anga a jibha dingi hama jitatu ja mala mu Suzana; maji jimbongo jâphe ka ji bhûndu, kana.

¹⁶ Jijudé jamukuá mu jisengu ja muenexi a di bhongolola ue, a bhângela mienhu iâ anga a kala ni kutululuka, kuma jinguma jâ a ji tebhununa, kua iá a a zembe a jibha-ku makuinhi sambuadi a midi ni midi jitanu; maji jimbongo jâ-phe ka ji bhûndu, kana.

¹⁷ Kienhiki à ki bhanga mu kizuua kia kuinhi ni kitatu, bhu mbeje ia Adale; mu kizuua kia kuinhi ni kiuana anga a zumbuka, kizuua kiókio anga a ki bhanga ki kala kizuua kia kubhanga fesa ni kusanguluka.

¹⁸ O jijudé-phe ue ja kexile mu mbonge ia Suzana a di bhongolola mu kizuua kia kuinhi ni kitatu, ni mu kizuua kia kuinhi ni kiuana; mu kizuua kia kuinhi ni kitanu kiene kia zumbuka, anga ki kala kizuua kiâ kia kubhanga fesa ni kusanguluka.

¹⁹ Kiene kia bhangesa kuila o jijudé ku matutu, ku jisanzala ja kambe imbaka, mu kizuua kia kuinhi ni kiuana bhu mbeje ia Adale, kiene o kizuua kiâ kia kubhanga fesa ni kusanguluka, kizuua kiambote kia ku di tumikisa mákudia a subhuka ku fesa ni ku di tumikisa maujitu mudiâ.

Fesa ia Phudimi

²⁰ Moledekai anga u soneka ima iii, anga u tumikisa mikanda ku jijudé joso mu jisengu joso ja muenexi Asuuelu, ni bhua zukama ni ku makanga,

²¹ phala ku a tendelela kuila kizuua kia kuinhi ni kiuana, bhu mbeje ia Adale, ni kizuua kiê kia kuinhi ni kitanu, a i kuate jinge mivu ioso,

²² kuma iene o izuua ia bhanduluka jijudé ku usuéia uambele ku a bhanga o jinguma jâ; iene o mbeje iâ iambele kukala ia lâmba anga i biluka ia ngalasa, iambele kukala ia uíndua anga i biluka ia kizuua kiambote; uixi a i bhange i kale jinge izuua ia kubhanga fesa ni kusanguluka, ni ku di tumikisa makúdia, ni ku di bhana maujitu ni kuuanena o jingadiama.

²³ Jijudé anga a xikana ku ki kumbidila, kala kia matekene ene kubhanga, anga ki kala kiá kifua kiâ kala kia a sonekena Moledekai.

²⁴ Mukonda Hamane, monʼa Hamedata, mukua Akaki, nguma ia jijudé, uoso ua tele kikutu kia kubuidisa jijudé, iu ua a telelele Puri, kifua muzambu, ua kutungula kizuua kia ku a buikisa, ni ku a jimisa o mbutu.

²⁵ Maji o kieza o maka iá kua muenexi, muenexi ua bhangesa mikanda ia kulungulula kikutu kiê kia usuéia, phala ufe uê uambele kubhanga jijudé uize ku thandu dia mútue uê muene ni muene ni anʼê phala a a nhenge ku mukambu ua iudika muene.

²⁶ Mukonda dia kienhiki izuua ioio aʼixana Phudimi, mbebhu o dijina dia Puri. Kala kiki mukonda dia njimbu ia mukanda uenhú, mukonda ue dia ima ioso iii ia bhiti na-iu jijudé,

²⁷ jijudé ja xikana o kijila kiki, a di bidikala muene, ni ene ni anʼâ katé ku mululu ni ku mulaúla, ni ene ni oso a di banda kua ene, o jinzuangiza ku mabhata mâ, o kukuata jinga izuua iiadi ienhʼii sé ngó kufula, kala kia i tungula mu mukanda ua Maludukeu, bhu mbeje iê ioso ia tokala, mivu ioso.

²⁸ Exi izuua ienhiʼii ia tokala ku i lembalala jinga, ni ku i kuata kijila kiê ku miiji iâ ioso, mu jifamília joso, jixi joso, mabhata moso, ku mbutu ia jijudé izuua iii ia Phudimi nuka a kà fula ku i kuata, nuka ia kà bhua ku i lembalala kuala aluluʼâ ni aluululuʼâ.

²⁹ Kia bhiti imʼii, na mvuale Estere, monʼa Abihaíle, ni judé Moledekai, anga a soneka dingi ni nguzu ia kijingo kiâ, mukanda ua kaiadi ua kuila o Phudimi a i kumbidile jinge.

³⁰ Anga a tumikisa mikanda iii ku jijudé joso, mu hama ia sengu ni makuinhi aiadi ni sambuadi, ja tokala mu utuminu ua muenexi Asuuelu, mukanda ua maka ma paze ni kidi,

³¹ phala kuxikika ni kukumbidisa o izuua ia Phudimi bhu thembu iê, kala kia a tendelela judé Moledekai ni na mvuale Estere, kala ene ue kia xikana kiá o kijila, ene ku ki kumbidila ni ku mululu ni ku mulaula, ni mu kujejuuala mu kudikola kuâ.

³² Na mvuale Estere anga u xikisa ngonge ia kukumbidisa ima ioso iii ia Phudimi, anga a i soneka mu divulu.