Estere 8 - O Mikanda Ikola

Maludukeu a mu zangeleka

¹ Mu kizuua kienʼokio muenexi Asuuelu u bhana dibhata dia Hamane, nguma ia jijudé, kua na mvuale Estere. Moledekai anga uiza hé u kala bhu pholo ia muenexi, kuma Estere ua mu tange kua Sobha uixi ndandu iami.

² Muenexi anga u sunga o nela iê ia tambula dingi kua Hamane, anga u i bhana kua Moledekai. Estere anga u bhana Maludukeu o kutambula konda ia dibhata dia Hamane.

A bhana ngonge iengi ia kukudila jijudé

³ Estere anga u zuela luamukuá bhu pholo ia muenexi, u fukama bhu inama iê u mu dionda ni masoxi, phala a lungulule ufe ua bhange Hamane mukua Akaki, o kikutu kiê kia usuéia kia kanenene na-kiu kubuidisa o jijudé.

⁴ Muenexi anga u zengela Estere mbasá iê ia ulu. Estere anga u balumuka, u imana bhu pholo ia muenexi.

⁵ Anga u zuela, uixi: Se kia ku uabhela, eie u muenexi, se nga sange ngalasa ku mesu mé, se ua ki mono kiene kia tokala, eme muene se nga ku uabhela, a tume kusoneka phala kulungulula mikanda ia bhangesa Hamane, monʼa Hamedata, mukua Akaki, ia kuila jijudé joso a ji buidise mu jisengu joso ja muenexi.

⁶ Mukonda ki ngalʼiki, ngi tena kiebhi o kumona muiji uami a u bhanga o phulu ioso iii, ia a xindila? Ngi tena kiebhi o kumona ndandu jami joso, a buila?

⁷ Bhenhobho muenexi Asuuelu u ambela na mvuale Estere, ni judé Moledekai, uixi: Talenu, nga bhana Estere o dibhata dia Hamane, o muene a mu nhenga ku mukambu, mukonda ua tula lukuaku luê ku jijudé.

⁸ Kiki-phe enuenu sonekenenu dingi o jijudé joso kioso ki mua mesena, mu dijina dia muenexi, mu ki te kidimbu ni nela iê ia sineta; kuma se mukanda uòsoneke kiá mu dijina dia muenexi, uòte kiá kidimbu kia nela iê ia sineta, kana muthu u tena dingi ku u lungulula.

⁹ Thembu ienhoio anga exana asoneki a muenexi, bhu mbeje ia katatu, iene o mbeji ia Sivani, mu kizuua kiê kia makuinhi aiadi ni kitatu, anga a soneka kioso kia a tumu Moledekai, a sonekena jijudé, ni jisátrapa, ni jinguvulu, ni jisobha mu jisengu joso, tunde mu India katé ku Etiópia, hama ia sengu ni makuinhi aiadi ni sambuadi, sengu ni sengu mu letra ia usonekenu uâ, o muiji ni muiji mu dimi dia uzuelelu uâ, o jijudé-phe ni mu usonekenu uâ ni mu uzuelelu uâ.

¹⁰ Anga a soneka mu dijina dia muenexi Asuuelu, a ta kidimbu ni nela iê ia sineta, mikanda a i tumikisa ni jiphunga ja koleiu a mondala jikabalu ja mbutu iambote ia kulenga lusolo, ja tokala mu kibhanga ni mu sedivisu ia muenexi.

¹¹ Mu mikanda ienhiʼii muenexi ua bhana ngonge ku jijudé mu mbonge joso, ua a suinisa mu ku di bhongolola phala kubhângela o muenhu uâ, ni kusengulula ni kujibha ni kubuidisa mu sengu joso ja utuminu ua muenexi oso a a mono a maneka mu ku a solomona ene, a kale muiji uahi a kale sengu iahi, ni kubuidisa anʼâ ahatu, ni kubhûnda o jimbongo jâ,

¹² mu kizuua kiene kimoxi mu jisengu joso ja muenexi Asuuelu, o kizuua kia kuinhi ni kitatu, bhu mbeje ia kaiadi ku dikuinhi, iene o mbeje ia Adale.

¹³ Kópia ia ngonge ia soneka a tuma ku i xikisa mu jisengu joso, phala oso evue, phala jijudé a di polondale kizuua kienʼokio, mbe kuvutula o phonzo ku jinguma jâ.

¹⁴ Kala kiki o jiphunga ja koleiu ji suluka, a mondala jikabalu ji lenga lusolo ja tokala mu kikalakalu kia muenexi, a a tendelela exi mu kumbidila muene, mu bhanga lusolo, ene anga a bhanga muene kala kia a tumu Shoba. O ngonge ienhiʼii anga a i xikisa mu mbonge ioso ia Suzana.

¹⁵ Moledekai anga u tunda bhu pholo ia muenexi, ua zuata izuatu ia ungana izela ni ia azulu, ni kijinga kia ulu ku mútue, ni divunga dia linhu ia fina ni purpura; mundu mu nzunga ia Suzana anga a kola, a sanguluka.

¹⁶ Jijudé anga a kala mu kuimba, ni kutana, ni ngalasa, ni ujitu mukonda kua a tuila mukengeji uâ.

¹⁷ Ku jisengu joso ue ni ku jimbonge joso, kuoso kua tula o kizuelu kia muenexi ni ngonge iê ia xikisa, jijudé ji kala mu sanguluka ni ngalasa iavulu, a bhanga fesa, exi lelu kizuua kiambote. Ku kala ue athu avulu mu jixi, a di bhanga kiá jijudé, mukoda jijudé a ji kuata kiá uoma uavulu.