Estere 6 - O Mikanda Ikola

Maludukeu a mu bhanga ujitu

¹ Usuku uenhó muenexi u fula kilu: anga u tuma kuila a mu bhekele o divulu dia malunda, anga a kala mu tanga-mu bhu pholo ia muenexi.

² Mu kutanga-phe anga a sanga kididi bhuambe kuma Moledekai muene ua tukuluile o kikutu kia Bingitana ni Telexi, o jingolambole jiiadi ja muenexi, a mu ingila jinga o dibhitu diê, ia a kanenene kujibha muenexi Assuelu.

³ Muenexi anga u ibhula, uixi: Moledekai a mu bhangela ujitu uahi, a mu bhana kijingo kiahi, mukonda dia kubhanga kienhiki? Akua mbèle a mu xibhididla sobha anga a vutuila muenexi, exi: Kà mu bhànga ujitu ua kima.

⁴ Muenexi anga u zuela dingi, uixi: Nanhi-ó uala mu kithâdi? Kuma Hamane ua di meneka, ua bhixila kiá mu kithâdi kia kanga, uala mu kuiza kuzuela ni muenexi phala a nhenge Moledekai ku mukambu ua mu iudikila.

⁵ Akua mbèle anga a kumbulula muenexi, exi: Hamane muene uala mu kithâdi kia kanga. Kuala muenexi: A bokone.

⁶ Hamane-phe kia zubha kubokona, muenexi u mu zuelesa, uixi: Se bhu kala muthu, muenexi ua solo ku mu bhanga ujitu, u tokala ku mu bhanga kiebhi? Hamane bhenhobho u banza ni muẋima uê, uixi: Mukuahi muene muenexi u sola ku mu bhanga ujitu? Nga fika eme muene, mukonda kana dingi muthu ua ngi tundu.

⁷ Hamane anga u ambela muenexi, uixi: Muthu uoso a mu solo kuala muenexi ku mu bhanga ujitu, u tokala a mu bhanga kiki:

⁸ A bheke izuatu ia ungana, iene mu zuata muenexi, ni kabalu kene mu mondala muenexi, a mu zuike kitundu kia ungana ku mútue.

⁹ Ni izuatu-phe ni kabalu a i telekale ku fixiiadi ia dikota mu sedivisu ia muenexi, o muthu uoso a mu solo kuala muenexi ku mu bhanga ujitu a mu zuike-iu, a mu te ku kabalu, ni a mu nhungise mu nzunga ni kukola bhu pholo iê, kuila: Kiene kia bhanga muthuʼiki, uoso a mu solo kuala muenexi ku mu bhanga ujitu.

¹⁰ Muenexi anga u ambela Hamane, uixi: Endelà-ku, u katule izuatu ni kabalu, kala ki ua ki zuelʼiki, u ki bhange muene kua judé Moledekai mukua kuxikama bhu muelu ua sobha. Ku xieku kima, ku iene ioso iii i ua zuela, u i kumbidila muene.

¹¹ Hamane anga u katula izuatu ni kabalu, u i zuika Moledekai, u mu mondalesa ku kabalu, u mu nhungisa mu nzunga ioso ia mbonge ni kukola bhu pholo iê, uixi: Kiene kia bhanga muthuʼiki, uoso a mu solo kuala muenexi phala ku mu bhanga ujitu.

¹² Moledekai a mu nhungisa kienhiki anga uiza dingi u tula bhu muelu ua Sobha. Hamane-phe uia ni lusolo ku bhata diê, ua kakuka, ua di futu mútue—

¹³ Hamane anga u ki kunda mukajiʼê Zelexe, ni makamba mê, kioso ki kia mu bhiti. Adiakimi-phe ala ku mu longesa, ni mukajiʼê Zelexe, a mu ambela, exi: Moledekai muenhú, uandeka kiá ku ku tunda, se ua tokala ku mbutu ia jijudé kua-nda ku mu tena dingi, ua-nda ku ku bhana muene kibhalu.

Hamane u dibhala

¹⁴ Kioso-phe ki ala hanji mu zuela ni muene, jingolambole ja muenexi ji tula, eza kulenguluisa Hamane, kuila eze ku fesa ia iudika Estere.