Estere 5 - O Mikanda Ikola

Estere u bhixila bhu pholo ia muenexi U mu kuvitala ku fesa ni Hamane

¹ Kutula mu kizuua kia katatu, Estere u di iudika, u zuata izuatu iê ia ungana, anga u imana mu kithâdi kia moxi, bhua lulama mu sala ia muenexi; o muenexi muene ua xikana bhu kiandu kiê kia ungana, ua bhana pholo ku muelu ua mbalanda.

² Anga ki bhita bhenhobho, kuila, muenexi kia mono Estere uemana mu kithâdi, henda i mu kuata; muenexi anga u mu zengela o mbasá iê ia ulu iala na-iu bhu lukuaku. Estere anga u bhixila, u babata ku mútue ua mbasá.

³ Muenexi anga u mu ambela, uixi: Kiebhi-ze na mvuale, Estere? Ihi ki u ngi bhinga? Zuela, ngi ku bhane-kiu, né kia ngi bhingi kuila o utuminu uami tu u uanetu ngó.

⁴ Kuala Estere: Se kia ku uabhela ngana, u muenexi, lelu izé hanji ni Hamane ku fesa i nga ku bhangela.

⁵ Muenxi anga u zuela, uixi: lenu Hamane a lenguluke, lelu tu ki bhange kioso kiandala Estere. Kala kiki, ni muenexi ni Hamane anga eza ku fesa iaiudika Estere.

⁶ Muenexi anga u ambela Estere bhu fesa ia vinhu, uixi: Kima kiahi ki u ngi bhinga? Zuela, ngi ku bhane-kiu; kioso ki u sola tu ki bhanga, né ki bhinga o utuminu tu uanetu ngó.

⁷ Estere anga u kumbulula, uixi: Kima ki ngi bhinga, ki ngi sola, kienhiki:

⁸ Se nga sange ngalasa ku mesu mé u muenexi, se uambe ku ngi bhana kioso ki ngi bhinga, kioso ki ngi sola, o kuila muenexi eze dingi luamukuá ni Hamane ku fesa i ngi iudika mungu, ngʼijiie kiua kuzuela, ngana, kioso ki ua ngʼibhula, nda bhange kioso ki ua ngi tumu.

Hamane u kanena o kububa Maludukeu

⁹ Kizuua kienhókio Hamane u tunda ni kusanguluka, mukonda ku muẋima kua mu zele. Maji kia zubha-phe kumona Moledekai bhu muelu ua mbanza, iu ua mu mono kuila ka xikina ku mu imanena, mba ngó ku mu kala ni uoma kioso ki ala kubhita, u luuala dingi kiavulu anga ukala ni njinda ia Moledekai.

¹⁰ Hamane-phe anga u dixibhe hanji, katé kia bhixila ku bhata diê. Anga u tuma kuixana makamba mê, ni mukajiʼê Zelexe.

¹¹ Hamane anga u a tangela o fuma iê ia jimbongo jala naju, ni kusokoloka kuê kua kuvuala ana avulu, ni kijingo kioso kia mu bhana muenexi, ni ditala dia mu tula, jifixiiadi joso ndenge ni akua mbèle oso ku mbanza.

¹² Hamane anga u ta-ku dingi, uixi: Ni na mvuale Estere lelu kia bhange fesa, kana dingi muthu a mu ixana kuiza-ku kumoxi ni muenexi, kikale eme muene ngó; mungu ue a ngi kuvitala kuiza dingi kumoxi ni muenexi.

¹³ Maji iene ioso iii-phe ki ngi i suu, mukonda ngʼila ngi mona judé Moledekai ua xikama bhu muelu ua mbanza, u sanga nga thathamana kinéne.

¹⁴ Bhenhobho ni mukajiʼê Zelexe ni makamba mê moso a mu ambela, exi: Iudika mukambu ua lebha muene, ua kitala kia makuinhi atanu a kóvado, o ki kúkia u zuela ni muenexi phala Moledekai a mu nhenga kuenhuku; ela a zubha ku ki bhanga-phe, eie u ijiie kuia kiua ni kusanguluka ku fesa ni muenexi. Hundu ienhiʼii anga i uabela Hamane, u tuma kuiudika o mukambu.