Estere 4 - O Mikanda Ikola

Jijudé adiuana! A kakuka!

¹ Kiki-phe Moledekai kioso kia zubha ku kʼijiia kioso kia bhiti, ua tandujula izuatu iê, u di ta mu kidinhaji ni utôkua, anga u bhita mu nzunga ia mbonge ni kudikola ni jingololo.

² Anga u bhixila ngó katé bhu kanga dia muelu ua muenexi; kuma kana muthu u tena kubokona bhu muelu ua muenexi se ua zuata kidinhaji.

³ Ni ku jisengu joso, kia tula o kitumu kia muenexʼiki ni ngonge iê, ku kala kudila kuavulu ku jijudé, a ta ndômbe, a fula kúdia hé akala mu jila, kisoxi ki vula, a ta mbûndu, amoximu avulu muene a zeka mu kidinhaji ni utôkua.

⁴ Ilumba ia Estere ni jingolambole jê, anga eza a mu tangela-kiu; na mvale anga u kala ni lamba diavulu. Anga u tumikisa izuatu kua Moledekai phala a zuate, a di katule kidinhaji; muene-phe ka xikina ku i tambula.

⁵ Estere anga u ixana Hatake, ngolambole ia muenexi a mu bhana kuxibhidila Estere, anga u mu tuma kua Moledekai ku mu ibhudisa mba ihi kia mu kuata kia mu bhangesa kiókio.

⁶ Hatake anga u tunda, uia bhu kitanda kia lulamena bhu kanga dia muenexi, u sanga Moledekai.

⁷ Moledekai anga u mu ambela kioso kia mu bhiti, u mu tangela ue o suilu ia kitadi ia tange Hamane kubhana mu kófidi ia muenexi, mu kusumba o jijudé ni ku a buikisa.

⁸ Anga u mu bhana ue o kópia ia ngonge ia soneka, ia tubhula mu mbonge ia Suzana ia ku a buikisa, phala ku i idikiza Estere, ni ku mu jimbuila maka oso; ni ku mu tendelela kuila a bhiẋile kua muenexi mu kuzuelela muiji uâ ni ku a diondela.

⁹ Hatake anga u iza kua Estere, u mu kunda maka moso ma mu tangela Moledekai.

¹⁰ Estere anga u zuela ni Hatake, u mu bhana lekalu ia kutudila Moledekai, uixi:

¹¹ Akua mbèle ioso ia muenexi, ni mundu uê ku kanga, a kʼijiia kuma uoso-uoso, a kale diiala a kale muhatu, u bhixila kua muenexi mu lumbu lua moxi sé ku mu ixana, kijila kiê kiala ngó kimoxi, a mu jibha muene sé kufula; o kukamba ku mu jibha kikale muenexi u mu zengela mbasá iê ia ulu phala ku mu bhana muenhu. Eme-phe o makuinhi atatu a izuua i tena, ka ngʼixana kuala muenexi.

¹² Moledekai anga a mu kunda makʼama ma Estere.

¹³ Moledekai bhenhobho u a bhana dingi lekalu kua Estere, uixi: Ku fike mu muẋima ué kuma eie muene ngó u bhuluka, mukonda dia kukala mʼonzo ia muenexi, o jijudé joso ku kanga ene a buika.

¹⁴ Kuma eie ki uila u di xibhé, thembu ienhiʼii, hinu bhu kala kuma kuengi ku tunda kubhanduluka kua jijudé, ni muthu uengi u a kudila, eie-phe ni dibhata dia tatʼenu mu buila. Nanhi ua kʼijiia se kiene kia ku tela ku ungana, phala u kudile mundu bhu thembu kala iii?

¹⁵ Estere anga u a ambela kutula dingi lekalu kua Moledekai, uixi:

¹⁶ Ndeie, ua kà bhongolole o jijudé joso ala mu mbonge ia Suzana, mu jejuuale mukonda diami, mu fule kúdia ni kúnua mu izuua itatu, ni mu muanha ni mu usuku. Eme uami ni ilumba iami tu jejuuala kiene kimoxi, o ki ki bhua ku ki bhanga kiene kiua ki ngi bhixila kua muenexi, sumbala kima a ki kidika ku ki bhanga; se ki ngi bhinga kubuila-phe, kuabhu, ngi kana kubuila.

¹⁷ Kala kiki, Moledekai u tunda-bhu, uia u bhanga kioso kia mu tendelela Estere.