Estere 3 - O Mikanda Ikola

Hamane a mu zangeleka

¹ Kia zubha kubhita imʼiii, muenexi Asuuelu u zangeleka Hamane, monʼa Hamedata, mukua Akaki, anga u mu ta ku pholo ia enhoso; ditala diê dia mu bhake di kala kota, o jifixiiadi joso, o ilamba ni akuá, ndenge.

² Akua mbèle ia muenexi oso, ene kukala bhu muelu uê, anga a kala mu fukama ni kudiundila Hamane; kuma muenexi ua a tumu uixi kiene ki mu mu bhangela jinga. Moledekai-phe nguaié kufukama, ka xikina ku mu diundila.

³ Bhenhobho-phe akua mbèle ia muenexi, ene kukala bhu muelu uê, a mu ambela, exi: Eie Moledekai, phalaʼhi ua xibhaka kitumu kia muenexi?

⁴ Anga ki bhita kuila, mu kukala-phe, kia zubha kuia ni ku mu zuelesa kiki izuua ioso, o muene-phe nguaié ku a evua, a ki tanga kua Hamane phala kuijiia mba Hamane u mu bhanga kiebhi, ni kumona ue mba Moledekai u jiza mu kífua kiê kuma muene ua a tangelele uixi ngi judé.

⁵ Hamane kia zubha ku ki mona kuila Moledekai nguaié ku mu fukamena, guaié ku mu diundila, njinda bhenhobho i mu kuata.

⁶ Mu kubanza-phe kia mu tolela mu dijina diê o kukuata ngó Moledekai o muthu umoxi ubheka uê, kuma a mu jimbuila o muiji uoso ua tokala Moledekai. Hamane anga u kala mu kana, uixi: Ngi buikisa jijudé joso katé ku mbambe bhua suku o utuminu ua sobha Asuuelu, kuma ene o muiji ua Moledekai.

Hamane u sota kubuikisa jijudé

⁷ Bhu mbeje ia kamoxi, iene mbeje ia Nisane, ku muvu ua kuinhi ni kaiadi ua Asuuelu kukala ku ungana, a kuata kuta Pudi, kifua kuta josorte bhu pholo ia Hamane izuua ioso, kuiza kizuua kiene, kuiza mbeje kiene, katé bhu mbeje ia kuinhi ni kaiadi iene mbeje ia Adale.

⁸ Hamane anga u ambela Asuuelu, uixi: Sai muiji a di muangena mu jisengu joso ja utuminu ua muenxi, kifua athu engi, kene ku di tuma ni akuaʼxi a tungu-nâ, o itumu ia muenexi ue kene ku i aiuka mukonda o utuminu uâ uengi; muenexi ka mu bhana kubhanduluka kua kima, né-mbe muene u a lendukila anga a kala moxiʼumu.

⁹ Muenexi se kia mu uabhela, a soneke ngonge ia ku a buikisa; eme-phe ngi tena kubhana phalata i tena kuinhi dia midi dia talendo, ku athu oso a bhanga kikalakaluʼiki phala ku i bheka ni i bokone mu malundilu a jimbongo ja muenexi.

¹⁰ Bhenhobho Muenexi anga u sunga nela iê mu lukuaku, u i bhana Hamane monʼa Hamedata, mukua Akaki, nguma ia jijudé.

¹¹ Muenexi anga u ambela Hamane, uixi: Phalata i kale, nga ku bhane-iu eie kumoxi ni muiji uenʼió nga ku bhana-u, u a bhange kioso kia ku zelela ku muẋima ué.

¹² Bhenhobho exana asoneki a muenexi, bhu mbeji ia kamoxi, kizuua kiê kia kakuinhi ni kitatu, anga a soneka kioso kia tumu Hamane ku jisátrapa ja muenexi, ni ku jinguvulu ja jisengu, ni jisobha ja madiembu moso; kala sengu mu letala ia usonekenu uâ, diembu ni diembu mu dimi dia uzuelelu uâ; mikanda a i soneka mu dijina dia muenexi Asuuelu, ia a i te kidimbu ni nela iê ia sineta.

¹³ Mikanda ienhiʼii anga a i sulula ni jiphanga ja koleiu katé mujisengu joso ja muenexi, exi: Mu seia, hé mu sengulula; mu buidisa jijudé joso, a kale minzangala, a kale adiakimi, a kale anʼauisu, a kale ahatu, kizuua kimoxi kia kuinhi ni kitatu, bhu mbeje ia kaiadi ku dikuinhi, iene mbeje ia Adale, o jinbongo jâ joso mu a bhûnda-ju.

¹⁴ Kópia ia ngonge iii ia soneka, a i tumikisa kuoso hé a tuma ku i xikisa mu jisengu joso phala athu oso evue, a di polondale kizuua kienʼ okio.

¹⁵ Jiphunga ja koleiu anga ji suluka ni lusoilo mu kumbidila kitumu kia muenexi, o ngonge ienʼiii ia tundu mu mbonge ia Suzana kuma iene o mbonge ia dibhata dia muenexi: Ni Muenexi ni Hamane anga a xikama mu kúnua; maji o mundu-phe mu nzunga ia Suzana a tandanganha ni hundu ienhiʼii.