Estere 2 - O Mikanda Ikola

Estere a mu sola bhu kididi kia Váxiti

¹ Kia zubha kubhita imʼiii, muenexi Asuuelu kia mu bhu kiá o njinda, u kala mu xinganeka Váxiti ni kioso kia bhange, ni ngonge ia xikisa ia ku mu katula bhu kididi.

² Bhenhobho akua mbele ia muenexi, o minzangala ene ku mu xibhidila, a mu ambela, exi: Kuku a ku sotele ana ilumba auabha kiambote ala hanji mizeletete.

³ Nda u sote jifixiiadi mu sengu joso ja utuminu ué, a ku bhongoluele ana ilumba oso auabha kiambote, a tula muene jithalu, a a bheke kunu mu mbonge ia Suzana, mʼonzo ia ahatu, a kale bhoxi dia lukuaku lua Henge, ngolambole ia muenexi, mukua kutambula konda ia ahatu; a a bhane ioso ia tokala ia ku di uesa ni ku di uabhesa na-iu.

⁴ O mona kilumba-phe uoso ua ku uabhela eie u muenexi, a kale kiá muene na mvale bhu kididi kia Váxiti. Hundu iâ ienhiʼii anga i uabhela kiambote muenexi, anga u ki bhanga.

⁵ Mu mbonge ia Suzana-phe mua kexile judé imoxi, dijina diê Moledekai monʼa Jaíle, monʼa Ximeii, monʼa Kiji, mukua muiji ua Bejamí.

⁶ Muenhú ua tûnda ku Jeluzaleme ni jihutile a a balakala kumoxi ni Jekoniia sobha ia Juda, a mu kutile kuala Nabukodonozolo sobha ia Babilonha.

⁷ Muenhú muene ua sase Hadesa, a mu ixana jinga dijina diê dia mukuá exi: Estere, monʼa sekuluʼê mona muhatu; kuma tatʼâ uafu, mamʼâ uafu. Mona kilumba iú, ku mu tala ku mesu ua uabha o pholo ni mukutu; o kiafu tatʼâ ni mamʼâʼiki, Moledekai ua mu tambulula ku bhata kala monʼê.

⁸ Mu kukala-phe, kia tundu kia muenexi, iu ua xikisa o ngonge, anga a bhongolola ana ilumba avulu mu mbonge ia Suzana bhoxi dia lukuaku lua Henge; ni Estere ue a mu ambata mʼonzo ia muenexi, ia a mu thelekala kua Henge mukua kutambula konda ia ahatu.

⁹ Kilumba kiki anga ki mu uabhela, u kala mu ngalasa iê; anga u lenguluka mu ku mu bhana imbamba iê ia ku di uabhesa, ni mákudia ma tokala, ni sambuadi dia ilumba oso a fuama kukala-nê a tundu mʼonzo ia muenexi; ni muene ni ilumba iê u a katula kididi kioso kiala, hé u a bhana kididi kia beta kuuabha mʼonzo ia ahatu.

¹⁰ Estere-phe ka di tange o muiji uê ni jindandu jê, kuma Moledekai, kiene kia mu tendelela kuila ka di tange.

¹¹ Moledekai anga u kala mu kuimajana izuua ioso bhu kanga dia lumbu lua inzo ia ahatu, phala kuijiia mba Estere uala kiebhi, mba kima kiahi kia-nda ku mu bhita.

¹² Kala kilumba-phe kia tula bhu kizuua kiê kia kubiẋila kua sobha Asuuelu, kia zubha kiá o kubhanga o kuinhi dia mbeji ni jiiadi mu ku di iudika ni ku di uabhesa mu kífua kiâ kia ahatu, kuma a bhanga mbeji jisamanu ni ku di uesa ni maji a mirra, ni mbeji jisamanu ni ku di uesa ni madizumba engi auabha kiambote mbé o ku di zelesa kala kiene kubhanga o kifua kia ahatu oso.

¹³ O kioso kiza kilumba mu kubhikila kua muenexi a mu bhanga kienhiki: Kioso kia sola mʼonzo ia ahatu kia kuia na-kiu mʼonzo ia muenexi a mu bhana-kiu.

¹⁴ Uia mu kumbi dia ngoloxi, o ki kúkia u vutuka mʼonzo iamukuá ia ahatu, bhoxi dia lukuaku lua Saxingazi, ngolambole ia muenexi, mukua kutambula konda ia akama; muhatu iú o kuvutuka dingi mʼonzo ia muenexi, kikale muene u mu inda, nʼa mu ixana ni kutumbula o dijina diê.

¹⁵ Kieza-phe o kizuua kia Estere, monʼa Abihaile, Sekulu a Moledekai kia kubhiẋila kua muenexi, ka solo kima kiengi, u sola ngó kioso kia mu longesa Henge ngolambole ia muenexi, mukua kutambula konda ia ahatu. Estere anga a kala mu ku mu uabhela ku athu oso aia jinga ni ku mu mona mesu.

¹⁶ Kienhiki kiambata Estere phala ku mu bheka kua muenexi. O kia zubha kubhiẋila kua muenexi Asuuelu mʼonzo iê, bhu mbeji ia kakuinhi, o mbeje ia Tebete, mu muvu ua kasambuadi ua Asuuelu kukala ku ungana,

¹⁷ Muenexi u beta kuzola Estere, ahatu oso ndenge. Estere anga u beta kukala mu ngalasa iê ni henda ia ku mu zola, ilumba ioso iamukuá ndenge. Muenexi anga u katula kitundu kia ungana, u mu zuika na-kiu ku mútue, u mu bhanga kukala na mvuale bhu kididi kia Váxiti.

¹⁸ Muenexi anga u bhanga fesa ia dikota ia jifixiiadi jê ni akua mbèle iê; i kala fesa ia fuma ia Estere. Mu sengu joso anga u a bhana hanji kithangana kia kunhoha, o mundu u a uanena maujitu ma kutubhula ni kuidikiza o fuma ia muenexi.

Maludukeu u tukulula kikutu kia kujibha muenexi Asuuelu

¹⁹ Kioso thembu iamukuá ia kaiadi kia bhongolola ana ilumba, Moledekai ua xikama hanji bhu muelu ua muenexi.

²⁰ Kuma Estere kiluua a di tanga muiji uê ni jindandu jê, mukonda Moledekai kiene kia mu tendelela; kuma hanji u evua jinga kioso ki mu ambela Moledekai, mukuâ ni kia kexile-nê ku mu sasa.

²¹ Mu izuua ienhoio Moledekai kia xikama bhu muelu ua muenexi, bhu kala ngolambole jiiadi ja muenexi, Bingitana ni Telexi, ene ku mu ingila bhu dibhitu diê, a luualela muenexi Asuuelu, anga a mu kanena ku mu jibha.

²² Moledekai anga u kʼivua, u ki jimbuila na mvuale Estere; Estere anga u ki jimbuila muenexi mu dijina dia Moledekai.

²³ O kia zubha ku a tokuesa, a ki mona kuma kidi muene, ene oso kiiadi kiâ anga a a nhenga mu miẋi. Anga a ki soneka mu divulu dia malunda bhu pholo ia muenexi.