Estere 1 - O Mikanda Ikola

Asuuelu u bhanga fesa

¹ Maka a bhita mu izuua ia Asuuelu, Asuuelu ió ua kexe mu tumina jinga tunde ku India katé mu Etiópia, o-xi iê ioso anga i kala ni hama ia sengu ni makuinhi aiadi ni sambuadi.

² Mu izuua ienhoio kia zubha muenexi Asuuelu kuhinga ungana uê mu mbonge ia Suzana,

³ kutula mu muvu ua katatu ua kukala ku ungana uê, u bhanga fesa ia akua mbèle iê, ni jingana ni abhikʼê. Anga a bhongolola bhu pholo iê bhebhobho, ni jixefe ja ilombo ioso ia Pélesa ni ia Mediia a kala-bhu uâ, ni jitata ni jifixiiadi ja jisengu,

⁴ muene anga u a edikiza jimbongo jê fa fumana ku mbanza, ni imbamba ioso ia ungana uê, mu hama a izuua ni makuinhi nake.

⁵ Kia zubha kubhanga izuua ienhiʼii, muenexi u bhanga dingi fesa ia mundu uoso ala mu mbonge ia Suzana, ni makota ni jindenge, mu sambuadi dia izuua; u i bhangela mu kithâdi kia palaxu ia muenexi.

⁶ Bhu kala jithanga ja linhu jizela ni jʼazulu, a ji nhenga ni malenge a phalata mu mikolo ia linhu ni púlupula, o mikolo ia bhitila mu jiphiladi ja mármore. O jihama bhua zendalalela jinga ji kala ja ulu ni phalata, o pavimendo bhoxi i kala ia mármore ikusuka, iazele, iazeluluka, ni ixikelela.

⁷ O jinganza jâ ja kunuina ji kala ja ulu, jene joso jala kiengi, ki bhuala imoxi ia sokela ni mukuâ; o vinhu i kala ia nzungule ia tubhula muenexi.

⁸ O mukúnua, exi, ki bhu kale muthu a mu bhinjika; kuma muenexi ua bhana ngonge ku jifixiiadi ja mbèle iê, uixi: Kala musonhi a bhange kioso kia mu zelela ku muẋima uê.

⁹ Na mvale Váxiti, anga u bhanga ue fesa ia ahatu, mu sala ia palaxu ia muenexi Asuuelu.

Na mvale Váxiti u dituna kuiza mu fesa ia mala

¹⁰ Mu kizuua kia kasambuadi-phe, kioso o muẋima ua muenexi ki uala mu ngalasa mukonda dia vinhu, u tuma Mehumanu, ni Bizita, ni Hadibona, ni Bingita, ni Abangata, ni Zetadi, ni Kadikase, sambuadi dia jingolambole a tambula konda ia dibhata dia muenexi Asuuelo,

¹¹ kuila a takane na mvale Váxiti, a mu bheke bhu pholo ia muenexi, ni kitundu kiê kia ungana ku mútue, phala mala oso ala-bhu ni jifixiiadi jâ a mu mone o kuuabha kuê. Kuma muene ua tula jithalu kiambote, u uabha kiavulu ku mu tala mesu.

¹² Maji na mvale Váxiti-phe kia mu sange jingolambole, a mu ambela kia tumu muenexi, muene ua ditunuʼê nguaʼiê kuiza. Muenexi anga u di zangala kiavulu, njinda i mu kuata.

¹³ Anga u zuela ni adiakimi ejiia phangu ni ndongo ia jithembu ku mivu ni minhamo, kuma kiene ki ejidila mu utuminu uâ, kioso kiambe kubhanga muenexi, bhu dianga hanji kubhita kuzuela ni jimesene ejiia ijila ni ífua iaʼxi.

¹⁴ Ene-phe ilamba a kaiela kua muenexi majina mâ, Kadisena, ni Setala, ni Adimata, ni Talxixi, ni Melese, ni Madisena, ni Memukana, sambuadi dia muthu; ene jitata ja utuminu ua Pélesa ni ua Mediia, a tena jinga kubhiẋila bhu pholo ia muenexi, ni kuxikama bhu mbandu ia kiandu kiê.

¹⁵ Muenexi anga u a ebhula, uixi: Na mvale Váxiti tu mu bhanga kiebhi, ua xibhaka o kitumu kia muenexi kia mu tudila o jingolambole?

¹⁶ Memukana anga u vutula bhu pholo ia muenexi ni jitata, uixi: Na mvale Váxiti ka bhalumuna ngó mulonga kua muenexi, maji ua bhalumuna ue ku jitata ni ku jifixiiadi ni mala oso kiá mu jisengu ja muenexi Asuuelu.

¹⁷ Kuma kia bhange na mvalʼiki, kiʼla ki bhixila mu mátui ma ahatu oso, a-nda kutobhesa jinga kiá anumeʼâ; kuma anda kuila, exi: Muenexi Asuuelu ua tumine na mvale Váxiti kuila eze bhu pholo iê, muene-phe keza-bhu.

¹⁸ Mu kizuua kia lelu kienhiki, jindona ja Pélesa ni ja Mediia, oso a kʼivu kiá kia bhange na mvale Váxiti kiene ue kianda ku vutuila jinga a muadi uâ, o jifixiiadi ja muenexi. Bhu kaxiʼabha-phe bha-nda kuiza izala iavulu ni jimvunda.

¹⁹ Se kia uabhela muenexi ku ki bhanga, a tubhule ngonge, a i sonekese mu jindunda ja akua Pélesa ni akua Mediia, phala ki i xikine dingi ku i alulula, kuila Váxiti kua muenexi Asuuelu keza-ku dingi, o ungana uê muenexi a u bhane kiá mukuâ uengi u kala muthu uambote uoso ua mu tundu muene mu kuuabha.

²⁰ O ngonge ia muenexi-phe kia-nda ku i xikisa katé kua suku ixi iê, ahatu oso a kala mu xila anumeʼâ kixi athu a kijingo mba athu a ngoho.

²¹ Kizuelu kiê anga ki uabhela muenexi ni jitata joso; muenexi anga u ki bhanga kala kia mu longesa Memukana.

²² Kuma u tuma mikanda mu jisengu joso ja tokala mu utuminu uê, kala ua a tumikisa kisoneku mu letala ioso ia usonekenu uâ, kala muiji mu dimi dioso dia uzuelelu uâ, phala enhoso a tene ku i tanga ni ku a tongolokela, kuila: Diiala muene u tumina mʼonzo iê, muene u zuela kioso kia tokala. Ni kuila ue o hundu ienhiʼii a i tange ku mbandu joso phala isambuke, o mundu uoso a ivue.