Ejidala 9 - O Mikanda Ikola

Ejidala a mu ʼambela kuila Izalaiele mala a sakana ni ahetu a akua ʼxi, muene hé u samba kua Nzambi anga u fisala

¹ Kiabhu-phe ima iii, kua ngi sange adiakimi, exi: O kifuxi kia Izalaiele, ni jinganga ni jilevita ka di tungula bhuma ni akua jixi jengi mu ku kasana kua akua Kanana, ni akua Hiti, ni Jipelezé ni Jijebuzé, ni akua Amone ni akua Mouabhi ni akua Ijitu ni Mamole.

² Mbata a tambula ku anʼa akuaʼxi, ahatu phala ene kusakana ni kusakanesa anʼâ a mala. O mu kubhanga kienhiki, o muiji ukôla iú, ua di fungisa ni akua jixi jenʼiji, katé o lukuaku lua adiakimi mudietu ni atumini luene lua dianga mu kutondala kuenhuku.

³ Eme ki ngʼevu kima kia di fu kiki, nga tandula izuatu iami ni divunga diami, anga ngi di vuza jindemba mu mútue ni ku muezu, hé ngi xikama ngezala ni kimbulambula.

⁴ Ene oso a kexile mu ku teketela o maka ma Nzambi ia Izalaiele, mukonda dia kutondala kua iá a tundu mu ubhika anga a ngi bhongolokela, eme-phe, kiene ki nga xikama ni kimbulambulʼiki kiene, katé mu kumbi dia Sata ia ngoloxi.

⁵ O kia zukama o kithangana kia Sata ia ngoloxi, nga balumuka mu ku di suuata ni ku di tolesa kuami, kala nga tandula kiá o izuatu iami ni divunga diami, anga ngi fukama, ngi leka maku mami kua Jihova, Nzambi iami, ngixi:

⁶ Nzambi iami, tata! Nga tandanganha ni jisonhi, ki ngi tena kubhetula pholo iami ni kutala kokué, u Nzambi iami! Mbata ikuma ietu ia di sokolola bhu thalʼa mítue ietu, o kuêla kuetu kua tuta muene ku diulu.

⁷ Tundé mu izuua ia jitata jetu ndú mu lelu, tuala mu kuela kua dikota; mukonda dia ikuma ietu, a tu bhakula, nʼetu, ni jisobha jetu, ni jinganga jetu bhu maku ma jisobha ja akua jixi jengi, etu tua kituka tu mbole ia xibhata, ni ubhika, ni ku tu bhûnda, ni pholo ia tu tandanganha, kala ki kia di monekena lelu!

⁸ Kiki-phe, mu kakithangana kòfele, kua tu tukulukila kiadi ku mbandu ia Jihova, Nzambi ietu, phala ku tuehela amoxi-mu kusutunuka, ni kutuimika kiambte bhu kididi kiê kikôla, ni ku tu bhana kidimba; phala ku tu muikina o mesu, eie u Nzambi ietu, ni ku tu bhana hanji kamuenhu kòfele mu ubhika uetu.

⁹ Mukonda etu tu abhika, maji mu ubhika uetu, eie u Nzambi ietu, ku tu ehelela; inda ua zale jihenda jé ku thandu dietu, etu tua bongo kiadi bhu pholo ia jisobha ja Pélesa, mbé o ku tu bhana dingi muenhu phala kubalumuna dingi o inzu ia Nzambi ietu ni kutunga dingi jingùndu jê, mbé a tu bhane kimbaka kia ku kondamena.

¹⁰ Kindala-phe, Nzambi ietu tuanda kuzuela kiebhi ima iala kiki! Kuma tua xisa ijila ié, i ua tu tendelela ku abhikʼé, o jinganga, uexi:

¹¹ O ixi i mua bokona phala ku i vua, ixi ia kasana mukonda dia kukasana kua ifuẋi iê ia tungu-mu ni mu kuiiibha kuâ; a izalesa ni ufusa tundé ku ia tundu katé ku ia suku mukonda dia kuiibha kuâ.

¹² Uila kiki, ki mua kà bhane anʼenu a ahatu ku anʼâ a mala; o anʼâ a ahatu ki mu a tambule phala anʼenu a mala. Athu eneʼá, nuka mu a sotela kutululuka kuâ mba mbote iâ; phala enu mu suine, ni mudie ioso ia beta kuuabha mu ixi, nda mu i xile anʼenu, i kale undundu uâ katé ku hádia ni hádia.

¹³ O kiki-phe, kia tu bhiti ima iosuʼiii mukonda dia ibhangelu ietu ia ibha, ni kuêla kuetu kua dikota, etu tua mono hanji, kuila, eie u Nzambi ietu, ua fudisa kuila a tu jikinisa muene loló, mukonda dia ikuma ietu, eie ua tu bhané hanji dingi o ubhulukilu kala iú!

¹⁴ Tu tona dingi kulueza o ijila ié, hé tu kuata undandu ni ifuẋi a bhanga o isunji kala iii? Kiki-ze Ngana, ki ki ku bhekela njinda ia ku tu lungulukila, anga u tu buikisa katé ki ku subhuka dingi muthu mba uoso ngó u tena kubhulaka?

¹⁵ Ahá! Jihova, tata! Nzambi ia Izalaiele! Eie u mukua kidi! Kuma etu tua bhulaka, tu tumbalumbalu ngó, kala ki kia di monekena leluʼidi. Kiki-phe, tuala bhu pholo ié mu kuêla kuetu, kuma ki kuala dingi muthu uengi u tena kukala bhu pholo ié mukonda dia kikuma kiki.