Ejidala 8 - O Mikanda Ikola

Majina ma iá a tundu mu ubhika ku Babilónia iá eza kumoxi ni Ejidala mu Jeluzaleme

¹ Iá-phe ene o mítue ia mabhata ma jitata, ni miji iâ, oso a bande nʼeme mu kutunda ku Babilónia, mu utuminu ua sobha Artaxexe.

² Ku anʼa Fineia, Ngelesone; ku anʼa Itamale, Daniiele; ku anʼa Davidi, Hatu.

³ Ku anʼa Sekaniia, ku anʼa Phaluji, Zakadiia, ni muene kiá, kia alula mu mísala iâ, a tena hama ni makuinhi a tanu a muthu.

⁴ Ku anʼa Pahate-Muuabhe, Eliehoeni, monʼa Zakadiia, kumoxi ni iá a di bande kua muene, hama jiiadi ja athu.

⁵ Ku anʼa Sekaniia, o monʼa Jaziiele, kumoxi kiá ni muene, hama jitatu ja athu.

⁶ O ku anʼa Adimi, Ebede, monʼa Jonatane, ni iá a di bande kokuê, a bhange makuinhi a tanu a muthu.

⁷ Ku anʼa Elane, Jesaia, monʼa Ataliia, ni iá kiá a di bande kokuê, makuinhi sambuadi a muthu.

⁸ Ku anʼa Sefatiia, Zebadiia, monʼa Mikaiele, a di j bande kokuê makuinhi nake a muthu.

⁹ Ku anʼa Joabi, Obadiia, monʼa Jiiele, a mu bande, hama jiiadi ni kuinhi ni nake dia muthu.

¹⁰ O ku anʼa Baní, Selomite, monʼa Jozifiia, kokuê kua di bande hama ni makuinhi asamanu a muthu.

¹¹ Ku anʼa Bebai, Zakadiia, monʼa Bebai, a mu bande makuinhi a iadi a muthu ni nake.

¹² Ku anʼa Azengadi, Nzuanane, monʼa Katane, a di bande kokuê hama ni kuinhi dia muthu.

¹³ Ku anʼa Adonikane, ene kiá a sukidila-ku mu ku bhixila, majina má eneʼiá; Elifelete, Jiiele ni Semaia, kokuê kua di te makuinhi asamanu a muthu.

¹⁴ Ku anʼa Bikivai, Utai ni Zabude, ezanâ kumoxi makuinhi sambuadi a muthu.

Ejidala u tuma kuixana jinganga

¹⁵ Anga ngʼa bhongoluela bhu mbanduʼa ngiji iala mu ku kungulukila ku Ahava, anga tu ta kibangu bhenhobho, mu izuua itatu. Bhenhobho ngi tonginina mu Kifuxi ni mu jinganga, ki nga tale-mu, ku anʼa Levi, ní muthu umoxi ngó ki ngi mu monʼomo.

¹⁶ Nga tumikisa Eliiazale, Adiiele, Semaia, Elenatane, Jadibe, Elenatane, Natane, Zakadiia ni Mezulane, o asonguedi, eme nga te-ku dingi Nzuadibe ni Elenatane, athu a kexile ni kuijiia kuavulu.

¹⁷ Anga ngʼa tumikisa kua Idu, muadiakime ua kexile mu Kazifiia, hé ngʼa longesa muene maka a fuama kutangela Idu phange iâ, ni akua mbèle mu-tembulu, jiphange já mu Kazifiia, kuila a tu bhekele akunji, phala inzu ia Nzambi ietu.

¹⁸ Anga a tu bhekela muene, kala kia tu zediuisa o lukuaku lua mbote lua Nzambi ku thandu dietu, muthu ua xitunuka mu thulu (uejiia kinéne), ua tokala ku anʼa Makidi, monʼa Levi, monʼa Izalaiele; muenʼiú jina diê Selabiia. Ni anʼê ni jiphange jê kumoxi, a tena kuinhi dia muthu ni nake;

¹⁹ ni Hasabiia kumoxi ni Jesaia, ua tokala ku anʼa Meladi, ni jiphange jâ ni anʼâ, makuinhi a iadi;

²⁰ ku akua mbèle a thembulu, a bhele hala Davidi ni ilamba phala ukunji ua anʼa Levi hama jiiadi ni makuinhi a iadi, a akua mbèle, ene oso a a xindi muene ku majina mâ.

O kujila

²¹ Bhenhobho anga ngi kola-bhu hanji o mujile ua kujila bhu mbanduʼa honga ia ngiji ia Ahava, mbé o kutoloka bhu pholo ia Nzambi ietu, nda tu mu bhinge njila ia kambe íbhidi phala etu ni anʼetu ni imbamba ioso ia tu tokala.

²² Mukonda sonhi ja ngi kuatele, ja ku bhinga kua sobha, kifuxi kia masoladi ni ilolo i tu bhângela ku jinguma mu njila, mbata sobha tua muambelele, tuexi: Lukuaku lua Nzambi ietu luala ku thandu dia ió oso a mu sota muene, phala ku a bhanga mbote; maji o nguzu iê ni njinda iê, i lungulukila ku thandu dia ió oso a mu xia.

²³ Etu-phe, anga tu jila, hé tu bhinga kienhiki kua Nzambi ietu, muene anga henda i mu kuata mukonda dia misambu ietu.

Imbamba ia mubhaku phala inzo ia Nzambi a i bhana ku jinganga

²⁴ Ku jinganga anga ngi tungula-ku kuinhi dia muadiakimi ni kiiadi, ene a Selabiia ni Hasabiia ni dikuinhi dia jiphange jâ.

²⁵ Anga ngʼa pezalela o phalata, ni ulu, ni itutu, kuma uene ujitu phala inzu ia Nzambi ietu, ua bhana sobha ni jindongixi jê, ni ilamba iê, ni Izalaiele ioso kiá iala kuenhoko.

²⁶ Hé ngʼa tambuisa bhu maku, hama jisamanu ni makuinhi a tanu a talendu ja phalata; ku itutu ia phalata, hama ia talendu, ku itutu ia ulu, hama ia talendu;

²⁷ Ni makuinhi a iadi a kopho ja ulu, jojo ji pezala midi ia iphaka, ni itutu i iadi ia utadi uambote, u benha, ua ngondo, ua sokué ngó ni ulu mu ku ta.

²⁸ Hé ngʼambela, ngixi: Enu a mi lumbila kua Jihova, itutu iii iòlumbile ue, kumoxi ni phalata iii ni ulu iú, kuma mubhaku ua vondadi, uòbhakule kua Jihova Nzambi ia jitata jenu.

²⁹ Ima iii endenu ni ku i langa, bhakenu-iu muene kiambote, katé ki mua kà i pezala, mu maxilu ma inzu ia Jihova, bhu pholo ia makota ma jinga nga ni jilevita, ni bhu pholo ia adiakime a mabhata ma Izalaiele, mu Jeluzaleme.

³⁰ Bhenhobho jinganga ni jilevita anga a tambula phalata ioso i tua pezala ni ulu ni itutu, iòpezale ue, phala kuiza na-iu mu Jeluzaleme, kʼonzo ia Nzambi ietu.

O kubhikila mu Jeluzaleme

³¹ Anga tu katuka bhu ngiji ia Ahava, mu kizuua kia kuinhi ni kiiadi ku mbeji ia dianga, phala kuia ku Jeluzaleme; o lukuaku lua mbote lua Nzambi ietu lua kexile ku thandu dietu, lua tu kudila ku lukuaku lua jinguma ni kua iá a kexile mu ku tuʼolekela mibhetu mu njila.

³² Tua bhixila mu Jeluzaleme anga tu nhoha momo izuua itatu.

³³ Ku tula mu kizuua kia kauana, tua pezala o phalata ni ulu ni itutu ioso, mʼonzo ia Nzambi ietu, anga tu i bhana kua Melemote monʼa nganga Ijiiia. Mukuá a kexile-nê kumoxi, Eliiazale, monʼa Fineia ni jilevita jiiadi: Jozabade monʼa Jesuua ni Nouadiiia monʼa Minui.

³⁴ Ima ioso a i alula, a i pezala, o pezu iê ioso hé a i soneka ni makidikidi moso.

³⁵ A a balakalele, a tundu ku ubhika, a bhakula sata ja kuoha kua Nzambi ia Izalaiele; Phala Izalaiele ioso kiá kuinhi ni kiiadi dia tungombe tua ndumbe; ilumbe ia jimbudi makuinhiʼvua ni isamanu; tumbudi tua ndumbe makuinhi sambuadi ni sambuadi; isutu ia jihombo phala kiamenga kia kituxi kuinhi ni kiiadi. Iene iosuʼiii phala Sata ia kuohela Jihova.

³⁶ Ngonge ia Sobha-phe anga a i bhana ku anʼa jinganga ni jinguvulu ja sámbua dia Ufalate, ene anga a kuatekesa kifuxi ni inzu ia Nzambi.