Ejidala 7 - O Mikanda Ikola

Sobha Artaxexe u tumikisa Ejidala ku Jeluzaleme

¹ Kia zubha kubhita ima iii, mu utuminu ua Artaxexe, sobha ia Pélesa, Ejidala monʼa Selaia, monʼa Azadiia, monʼa Ilikiia,

² monʼa Salume, monʼa Zadoke, monʼa Atube,

³ monʼa Amadiia, monʼa Azadiia, monʼa Melaiote,

⁴ mona Zelakiia, monʼa Uzi, monʼa Buki,

⁵ monʼa Abisuua, monʼa Fineia, monʼa Eleazale, monʼa Alá, nganga ia dikota, phangeʼa Mozé.

⁶ Ejidale muenhú anga u banda, ua tundu ku Babilónia. Muene anga u kala musoneki ua di longo kiavulu mu kitumu kia Mozé kia bhele Jihova, Nzambi ia Izalaiele. Muene-phe ue, mukonda dia lukuaku lua mbote, lua Jihova Nzambi iê, lua mu kexile ku thandu diê, sobha ua mu bhana ioso muene ia mu bhingile.

⁷ Mu muvu ua kasambuadi, ua sobha Artaxexe, amoxi-mu ku anʼa Izalaiele, a banda mu Jeluzaleme, ni anʼa jinganga, ni a jilevita, ni a jingimbidi, ni anʼa ajikuidi a mabhitu, ni a akua mbèle mu tembulu.

⁸ O mu mbeji ia katanu, ia muvu ua kasambuadi ua sobha muenʼiú, iene ia bhixila na-iu Ejidala mu Jeluzaleme.

⁹ Mbata ku kizuua kia dianga kia mbeji ia dianga kiene muene kia katuka ni kubanda mu kutunda mu Babilónia; iu ua bhixila mu Jeluzaleme mu kizuua kia dianga kia mbeji ia katatu, kala kia mu xindi lukuaku lua mbote, lua Nzambi iê, lua mu kala ku thandu diê.

¹⁰ Kuma Ejidala ua di iudikile muẋima uê, phala ku kuata kitumu kia Jihova ni ku kiʼaluka, mbé o ku longa jinga jingonge ni mabatuilu ma Nzambi iê, mua Izalaiele.

¹¹ Iú-phe, uene o mukanda uʼòkatule ku mukanda ua sobha Artaxexe, ua bhana kua nganga Ejidala, musoneki ua maka ma ijila ni jingonge ja Jihova kua Izalaiele. Mukanda uambe kiki:

¹² Artaxexe, sobha ia jisobha, kua nganga Ejidala, musoneki ua kitumu kia Nzambi ia diulu; kala ni kutululuka kua kidi!

¹³ Kia tundu kokuami, o ngonge ia kuila, o ió uoso ua tokala ku Kifuxi kia Izalaiele, ni ku jinganga jê, ni ku jilevita, nʼandala kuia ni eie ku Jeluzaleme, aié.

¹⁴ Mbata eie a ku tumu kuala sobha, ku mbandu iê-Muène, ni ku mbandu ia sambuadi diê dia nganji ja maka, phala kuia mu kuibhudisa kiambote ku mbandu ia Juda ni Jeluzaleme, kala kiambe o kitumu kia Nzambi ié, ki uala nakiu bhu lukuaku lué.

¹⁵ Nda uambate ue o phalata ni ulu, sobha ni nganji jê ja maka, ia bhana mu vondadi iâ kua Nzambi ia Izalaiele, Ió uene ni dibhata diê mu Jeluzaleme.

¹⁶ Kumoxi ni phalata ioso kiá ni ulu uoso u u sanga mu Sengu ioso ia Babilónia, ni maujitu oso a bhana ku vondadi kuala o Kifuxi ni jinganga oso a bhana ue mu vondadi iâ, maujitu phala inzu ia Nzambi iala mu Jeluzaleme.

¹⁷ Kala kiki, ni muanu uoso, ua kà sumba ni kitadi kiki, tungombe, ni ilumbe ia jimbudi, ni tusèseme tua jimbudi, ni mibhaku iê ia makúdia ni makúnua anga ua kà i bhakula bhu Kalatódio ka onzo ia Nzambi ié, iene iala mu Jeluzaleme.

¹⁸ Kioso ue kia mi tetulukila kubhanga o phalata ni ulu uoso ua subhuka-ku, ni eie ni jiphange jé, bhange-nu-kiu kala kiendi Nzambi ienu.

¹⁹ O itutu ioso ia ku bhana phala o kikalakalu kia inzo ia Nzambi ié, vutuila na-iu bhu pholo ia Nzambi ia Jeluzaleme.

²⁰ O ioso dingi ia kambe-ku, i u bhindamena phala inzu ia Nzambi ié, ia ku fuama kubhana, ua-nda ku i bhana; i tunda mu inzu ia dilundilu dia jimbongo ja sobha.

²¹ Eme-muene-muène, sobha Artaxexe, nga bhana ngonge ku alundi a jimbongo ja sobha, ene oso ala ku sámbua diodio dia honga ia Ufalate, kuila: Ioso i mi bhinga nganga Ejidala, musoneki ua kitumu kia Nzambi ia diulu, a ki bhange lusolo,

²² katé ki ki tena kusoka hama ia talendu ja phalata, katé hama ia jikolo ja tiliku, katé hama ia jibatu ja vinhu, katé hama ia jibatu ja maji; o môngua uoso kiá ua mu solo o muẋima.

²³ Ima ioso kiá i a tendelela, kala kia tumu Nzambi ia diulu, a i bhange muene kienʼiókio phala o inzo ia Nzambi ia diulu; kuma, phalaʼhi ku kala njinda ia dikota ku thandu dia ixi ietu ni kuthandu dia sobha ietu ni ku thandu dia etu tu anʼê?

²⁴ Ni ue, tua mʼijidisa na-kiu, ku mbandu ia jinganga joso ni jilevita, ni akua kuimba, ni akua kujikula o mabhitu, ni akua mbèle oso kiá mu dibhata didi dia Nzambi, kuila, kana ku a bhinjika ni kufuta ima ia tokala, mba madijimu mʼokulu mba mibhaku.

²⁵ Eie-phe kiá, Ejidala, mu kuijiia ku uala na-ku, kua Nzambi ié, kuala bhu lukuaku lué, u sola atumini ni afundixi, aia ni kufundisa athu oso ala ku sámbua diodio dia honga ia Ufalate, oso kiá ejiia itumu ia Nzambi ié-eie; o ió uoso ua kambe ku ijiia, mu muʼijidisa na-iu.

²⁶ Uoso-uoso u kamba kualuka kitumu kia Nzambi ié-eie, ni kitumu kia sobha, ua fuama ku mu jibha, mba ku mu tumikisa oxi ia dikanga ni ku mu balakala, mba ku mu tambula jimbongo joso jala na-ju, mba ku mu ta mʼonzo ia dikuikilu (mu kaleia). Mahezu.

²⁷ Jihova, Nzambi ia jitata jetu a tane-ku! Ua lungulula muẋima ua sobha kala kiki! Phala ku kembesa inzu ia Jihova, ia kala mu Jeluzaleme;

²⁸ Iu ua ngi zalela o jihenda jê bhu pholo ia sobha ni ndongixi jê, ni bhu pholo ia ilamba ioso iala ni kutena ku mbanza ia sobha. Kienhiki-phe, ki kia ngi bhekela kúbhua uoma, kala kiá kia ngi tula o lukuaku lua mbote lua Jihova, Nzambi iami, ku thandu, eme nga bhongolola mua Izalaiele, amoxi-mu ku adiakimi phala kubanda nʼeme ni tuʼiii ku Jeluzaleme.