Ejidala 6 - O Mikanda Ikola

Sobha Ndala u tanga kuila, ngonge ia Silu, Kidi; anga muene ue u xikisa dingi ngonge, iê ia ku kuatekesa anʼa Izalaiele

¹ Bhenhobho sobha Ndala ua bhana ngonge, anga a sota mu mabhakelu ma muenexi ua Babilónia, muoso mua bhaka jinga mikanda iòkulu ni umvuama ua jisobha ja Babilónia.

² Ku tula mu Akemeta, mu dizemba diala mu sengu ia Mediia, a sange-mu dilanda diòʼuinge, o ku dilanda kuʼòsoneke dilembalesu diambe kiki:

³ O sobha Silu, mu muvu uê ua dianga, ua bhana ngonge iii: Mu kuzuela ku inzu ia Nzambi mu Jeluzaleme, ia fuama ku i tunga phala kididi kia ku bhela jisata; o madisesa mê ma kola muene; o kitala kiê, makuinhi a samanu a kóvadu; o kuzanza kuê, makuinhi a samanu a kóvadu; ni mikalatata itatu ia matadi a makota, ni umoxi ua miẋi ia ubhe.

⁴ Kitadi kioso kia kufuta ki tunda mʼonzo ia sobha.

⁵ Kua di te dingi: itutu ioso ia ulu ni phalata ia inzu ia Nzambi, iambatele Nabokodonozolo mu tembulu ia kexile mu Jeluzaleme, anga uia na-iu ku Babilónia, a-nda ku i vutula, phala iie ku tembulu iala mu Jeluzaleme, na i tule muene kitutu bhu kididi kiê, kitutu bhu kididi kiê; ni i kala dingi lua mukuá mʼonzo ia Nzambi.

⁶ Kala kiki-phe, eie Tatenai, nguvulu ia disámbua diodio dia Ufalate, ni Setabozenai ni akuá dingi, afuasakita, muala ku sámbua diodio dia ngiji, sondolokelenu dikanga.

⁷ Kana ku fudisa kikalakalu kiki, kia inzu ia Nzambi, phala o nguvulu ia jijudé ni ikulakaji iê, a tunge dingi lua mukuá o inzu ia Nzambi bhu kididi kiê kiʼòkulu.

⁸ Ku mbandu iami ue, nga bhana ngonge, kioso ki mua-nda kubhanga ni ikulakaji ienʼii ia jijudé, phala a tene ku tunga dingi lua mukuá inzu iii ia Nzambi, kuila: Ku jimbongo ja sobha, jojo ji tunda mu malubhaku ku disámbua diodio, dia ngiji, ende ni kufutila muene ku pholo ima ioso i bhindamena athu iá, phala o kikalakalu ki ki kale ni kifudisu.

⁹ Ki mu kambe ue ku a bhana ioso ia bhindamena ku kizuua ni kizuua: Tungombe ni tumbudi tua ndumbe ni ilumbe, phala o jisata kua Nzambi ia diulu; ni tidiku, ni môngua, ni vinhu, ni maji, ima ioso kiá i bhindamena jinganga jala mu Jeluzaleme.

¹⁰ Phala a bhakule jisata ja dizumba dia mbote kua Nzambi ia diulu, nda a sambele ue muenhu ua sobha ni ua tuana tuê.

¹¹ Nga bhana dingi ngonge iamukuá iii, kuila: Uoso u lungulula o ngonge iii a fuomona muxi kʼonzo iê, anga a uʼimika ni a mu nhengeneka kuenhoko, o inzu iê ia kà kituka dixita.

¹² O Nzambi-phe, ió ua bhangesa dijina diê di tunge bhenhobho, a buikise jisobha joso ni ifuẋi ioso i zenga lukuaku luâ phala kulungulula o ngonge iii ni kusengulula o inzu iii ia Nzambi, iala mu Jeluzaleme. Eme, Ndala, nga bhana ngonge iii; kioso ki iambe, a ki bhange lusolo. Mahezu.

Thembulu ibhua ku i tunga

¹³ Bhenhobho Tatenai, nguvulu ia Sámbua dia kunu dia Ufalate, ni Setebozenai ni akua kilunga kiê, ima ioso a i bhange muene lusolo, kala kiambe ngonge ia sobha Ndala.

¹⁴ O ikulakaji ia jijudé, ia aiʼâ muene ni kutunga ni kuzediuila ku muzambu ua polofeta Ajeu ni Zakadiia monʼa Idu. Onzo anga a i tunga a i zubha kala kia tumu Izalaiele ni kia tumu ngonge ia Silu ni ia Ndala ni ia Artaxexe, sobha ia Pélesa.

¹⁵ Inzu iii anga ibhua ku i tunga mu kizuua kia katatu kia mbeji ia Adale, ku muvu ua kasamanu ua utuminu ua sobha Ndala.

Thembulu a i lumba

¹⁶ O Anʼa Izalaiele, ni jinganga, ni jilevita ni amukuá dingi a tundu mu ubhika, anga a lumba inzu iii ia Nzambi ni kusanguluka kuoso.

¹⁷ Maujitu ma bhana phala kulumba inzu iii ia Nzambi, hama ia tungombe, hama jiiadi ja ilumbe ia jimbudi, hama jiuana ja tumbudi, kuinhi ni kiiadi kia isutu ia jihombo, phala kilumbu kia kituxi kia Izalaiele ioso, kala kia soko o dialuilu dia miji iê.

¹⁸ Anga jinganga a ji uana ku ibuka ni jilevita mu jimbambe já, phala o ukunji ua Nzambi uala mu Jeluzaleme; kala kia ki soneka mu divulu dia Mozé.

¹⁹ Ió a tundu-mu ubhika anga emununa Phasu mu kizuua kia kuinhi ni kiuana kia mbeji ia dianga;

²⁰ mbata ni jinganga ni jilevita a di zelesele kumoxi kala muthu umoxi ngó, ene oso anga a zela muene. Hé a jibha Kambudi ka Phasu phala ene oso a tundu mu ubhika, ni jiphange jâ, o jinganga, ni enemuène.

²¹ Kienhiki, anʼa Izalaiele a tundile mu ubhika, hé a dia phasu, kumoxi ni ió a di bundile ni ene, mu ku di katula ku imbamba ia xidi, ia akuaʼxi, phala kusota Jihova, Nzambi ia Izalaiele.

²² O fesa ia jimbolo jʼòsusu, anga a i bhanga mu sambuadi dia kizuua, ni kusanguluka, mbata Nzambi ua lungulula muẋima ua sobha ia Asídia iú ua u te ku mbandu iâ ene, phala ku a suinisa maku mu kikalakalu kia inzu ia Nzambi, muene Nzambi ia Izalaiele.