Ejidala 5 - O Mikanda Ikola

¹ Tala, jinganga ja Nzambi, Ajeu ni Zadiia, monʼa Idu, a zambuila jinga jijudé ja kexile mua Juda ni mu Jeluzaleme, mu dijina dia Nzambi ia Izalaiele, kuma Nzumbi iê ia kexile ni ene.

² Bhenhobho Zolobabele monʼa Selatiiele, ni Jesuua monʼa Jozadake, a balumuka, anga a mateka dingi kutunga onzo ia Nzambi, iala mu Jeluzaleme; ni ene kiá, kumoxi ni jinganga ja Nzambi ja kexi mu ku a kuatekesa.

³ Mu kithangana kienʼiokio, a tukumuka nguvulu ia sámbua dia kunu dia honga ia Ufalate, Tatenai ni Setabozenai ni akua dingi, a endela, eza kua ene, hé a ebhula, exi: Nanhi ua mi bhela-kiu ngonge, ia ku tunga dingi inzu iii, ni kutungulula dingi kimbaka kiki?

⁴ Anga a ebhula dingi lua mukuá, exi: O majina ma athu a mu tunga inzu ienʼiii, iá kuebhi?

⁵ Né kienhokio-phe, mesu ma Nzambi ma kexile ku thandu dia ikulakaji ia Juda, katé ki ki ẋikinine ku a fudisa ku bhanga kikalakalu, katé kia bhixila maka eneʼá kua Ndala, anga muene u vutula kizuelu mu mukanda ku ima ienhiʼii.

⁶ O mukanda uʼokatule ku mukanda ua soneka Tatenai, nguvulu ia sámbua kunu dia Ufalate, ni Setabozenai ni akuá dingi, afuasakita, a kexile ku sámbua dia kunu dia ngiji, ua tumikisa kua Sobha Ndala.

⁷ Mua mu bhela kisoneke kia majina moso, a u soneka, uambe kiki: Kutululuka kuoso ku kale kua sobha Ndala.

⁸ Ki ku jimbulukile éʼsobha, kuila etu tua ile ku sengu ia Juda, ku inzu ia Nzambi iâ Ionéne, ene a mu i tunga ni matadi a makota; o miẋi ia maleka iá a i ta kiá ku thandu, o kikalakalu kia mu kuenda lusolo, ki kiia muene ku pholo bhu maku mâ.

⁹ O ikulakaji-phe tua ebhula, tuexi kiki: Nanhi ua mi bhelakiu ngonge, ia ku tunga dingi inzu iii, ni kutungulula dingi kimbaka kiki?

¹⁰ Etu tua te-ku dingi kua ebhula majina mâ, phala ni tu ku tangela-u, ni tu tena ue ku ku sonekena majina ma athu ala ikuinda mu kaẋi kâ.

¹¹ O kia tu vutuila ene-phe, kienhiki: Exi, etu tu abhikʼa Nzambi ia diulu ni oxi, onzo i tua mu mu tungulula iii, hanji ki a i bulu, bhuala kiá mivu ia ndumba; sobha ia dikota ia Izalaiele muene ua i tungile, iu ua i zubhile muene.

¹² Maji ku tuezʼku, kioso jitata jetu kia lokalala njinda ia Nzambi ia diulu, muene ua a bhakula bhu maku ma Nabokodonozolo, sobha ia Babilónia, mukua Kaldeia, muene ua sengulula onzo iii, uambata o kifuxi kiâ ene ku ki bheka ku Babilónia.

¹³ Maji-phe ku muvu ua dianga ua Silu, sobha ia Babilónia, sobha Silu muenʼió muene ua bhele ngonge phala kutunga inzu ienʼiii.

¹⁴ Katé ni itutu ia ulu ni phalata, ia inzu ia Nzambi, ia katuile Nabokodonozolo mu tembulu ia kexile mu Jeluzaleme, iu ua i tele mu tembulu ia Babilónia, sobha Silu-phe, ua i katula mu tembulu ia Babilónia, ia a i bhana ku muthu a muʼixana Sebazale, a mu tunguile ku kala nguvulu, kuala muene.

¹⁵ Anga u muʼambela, uexi: Tambula itutu iii, ndé, ka i beheke mu tembulu iala ku Jeluzaleme; hé uà kà bhangesa kuila inzu ia Nzambi a i tunga dingi bhu kididi kiê kiʼokulu.

¹⁶ Bhenhobho-phe, Sebazale muenʼió ueza, iu ua te o madisesa ma inzu ia Nzambi, iala mu Jeluzaleme; tundé kiá kienhókio, katé ni mu leluʼmu, iene-phe hanji ia mu tungʼii, kiluua ibhua.

¹⁷ O kiki-phe, se sobha ka ki mono ku ibha, a sote hanji mu mabhakelu ma sobha ia Babilónia, se ni kidi kiene ngonge ia sobha Silu iíi momo, ia ku tungisa inzu iii ia Nzambi iala mu Jeluzaleme. Ni ku ima iosuʼiii, sobha a tuʼambele, tuijiie ue kioso kia mesena muene.