Ejidala 4 - O Mikanda Ikola

Akua Samádia a xitala oji-Judé kua Sobha Artaxaxe, o ku tunga o tembulu anga a ku fudisa

¹ Kioso jinguma ja Juda ni Bejamí kievu kuila a tundu ku ubhika ia a tunga Tembulu ia Jihova, Nzambi ia Izalaiele,

² A bhixila kua Zolobabele ni ku jitata ja mabhata, anga a a tangela, exi: Kala enu, etu ue tua mesena kusota Nzambi ienu; uila kiki, tuehedienu ku di bunda kumoxi ni enu mu kú tunga, mbata muene ue, Johova, Nzambi ienu, etu tua mu bhakuila kiá jisata, tundé mu izuua ia Asale-Hadone, sobha ia Asídia, ua tu bheka kunu.

³ Bhenhobho-phe ni Zolobabele ni Jesuua ni amukuá dingi, o jitata ja mabhata ma Izalaiele, a a vutuila, exi: Ki ki fuama kuila ni enu ni etu tu tunga kumoxi o inzu ia Nzambi ietu; etuʼene muene, ubheka uetu, tua-nda ku i tungila Jihova, Nzambi ia Izalaiele, kala kia tuʼambela Silu, sobha ia Pélesa.

⁴ Kienhokio-phe kiá, akuaʼxi aia ni ku bhangesa akua Juda kubotomoka o maku mu kutunga, mbata ka ehela dingi kutululuka kioso kia kala mu kutunga.

⁵ Anga a futila jindaxi phala kuia ni ku a fudisa ioso ia mesena kubhanga izuua ioso, kioso Silu sobha ia Pélesa hanji iu ni muenhu, katé mu utuminu ua Ndala, sobha ue ia Pélesa.

⁶ Ku dimatekenu-phe dia utuminu ua Asuuelu, anga a soneka mukanda ua kutatela ni kuxitala akua Juda ni akua Jeluzaleme.

⁷ O mu izuua ia Artaxexe ue, Bijilame, ni Miteledati, ni Tabeiele ni akua dingi, akua kilunga kiâ, a sonekena Artaxexe, sobha ia Pélesa; mukanda a u soneka ni jiletala ja akua Sídia ni mu dízui dia akua Sídia.

⁸ O komanande Lehu, ni musoneki Sisai, ene a soneka mukanda ua kutatela Jeluzaleme kua sobha Artaxexe, mu kidifua kienhiki.

⁹ Bhenhobho Lehu, komanande, ni Sisai, musoneki, ene a soneka ni akua dingi akua kilunga kiâ, o jidinaíta, ni afuasakita, ni akua Tarpele, ni afuasita ni akua Heleke, ni akua Babilónia, ni akua Suzane, ni akua Daí ni akua Elame.

¹⁰ Ni ifuẋi dingi ia mukuá, iejile na-iu sobha ia dikota ua fumanene kiavulu, Azenaphale, anga ua bhana kutunga mu mbonge ia Samádia, ni amukuá ku sámbua kunu dia honga ia Ufalate, mu thembu ieneʼio.

¹¹ Maka a te mu mukanda ua sonekena sobha Artaxexe eneʼá: Abhikʼé, athu a tungu ku sámbua kunu dia honga ia Ufalate, bhu kithangana kia nganji.

¹² Tuma ku kʼijiia, eie sobha, kuila jijudé ja tundu kokué, a bande kunu ia a tu sange etu mu Jeluzaleme. O mbonge ioio ia usuéia ni kuẋinuka, ene a mu i tunga dingi, imbaka iê a mu i tungulula ue, ni madisesa mê, a mu ma iudika dingi.

¹³ Kala kiki-phe, ijiia na-kiu dingi lua mukuá, eie sobha, kuila se o mbonge ioio a i tunga dingi muene lua mukuá, o imbaka iê ioso hé i vutuka bhu kididi kiê kia ukulu, ima ia tokala ku futa, ene ka-nda ku i futa dingi, ni madijimu ni mibhaku; mu ku bhanga kiki, a-nda ku tununa jimbongo ja jisobha.

¹⁴ Etu-phe, kuma tuene mu ku tambula futu kua sobha, o ku mu ehela ku mu katula ujitu ki tu tena, kiene kia tu bhekesa kutuma ku ku dimuna.

¹⁵ Nda u sote divulu dia malunda ma jitata jé, muenhomo-phe, i ua-nda kusanga-mu, sobha, ia-nda ku kuijidisa kuila mbonge ioio ia kuẋinuka tundé ukulu, iene mu ku bhekela uíndua ku jisobha ni jisengu, ni kuila mʼukulu mbonge ienhoio mua kexile muene kuximika; kiene kia bhangesele ku i sengulula, i ia bhuilè-ku kiá.

¹⁶ Etu-phe tua ku tangela-kiu muene ni kulomboloka kuoso, eie sobha, kuila: O mbonge ioio, se a i tunga dingi lua mukuá, o imbaka iê hé i vutuka dingi bhu kididi kiê bhu ia kexile, eie-phe, ku mbandu ia sámbua didi, dia kunu, dia ngiji ia Ufalate, kua-nda ku kala-ku dingi ni dikanda dié. Mahezu.

¹⁷ Anga sobha u vutula kiki kua Lehu, komanande, ni kua Sisai, musoneki, ni akua kilunga kiâ a tungu mu Samádia kumoxi ni jisubhuke jala ku sámbua diodio dia ngiji ia Ufalate, uixi: Uembu, bhu kithangana kia nganji.

¹⁸ O mukanda u mua tu tumikisa, a u tange ni kulomboloka kuoso bhu pholo iami muene.

¹⁹ Mu ku u tongololʼeme, nga tumu kusota mu mikanda ia malunda ma xahulu, kiene o mbonge ioio tunde ukulu. Ene a sota ia a sange kuila, mu ithangana iòkulu, mbonge ioio ia ximikina jinga o jisobha kuma muenhomo ene mu ku bhangela-mu usuéia ni ungumba ua kuẋinuka ni kubaluka.

²⁰ Mʼukulu ue kua kexile jisobha ja nguzu mu Jeluzaleme, o ku sámbua diodio dia ngiji a tumina jinga mu ididi ioso anga aia muene ni ku a bhana ima ia tokala kufuta, ni madijimu, ni mibhaku.

²¹ Kindala-phe xikenu ngonge, phala mala ió ehe kutunga, o mbongeʼoio ki bhu kale muthu u i tunga; o kutungiua kuê kikale eme dingi ngi ki tanga.

²² Enu-phe di langienu, ima iii kana ku i kuatela usudi mba mu kala na-iu ni usonde; phala ki mu bhange kutondala mu ima ii, mbata o kuẋamuna kuvudilaʼhi kiki ku jisobha?

²³ Kuabhu-phe, kioso kiá o mukanda ua katula ku mukanda ua sobha Artaxexe kia u tange bhu pholo ia Lehu ni Sisai, musoneki, ni akua kilunga kiâ, ai ni makidi-kidi ku Jeluzaleme, ku jijudé, anga ni nguzu ioso a a fudisa kutunga.

Ni Ajeu ni Zakadiia a bhana kaiula ku jijudé kuila ende dingi ni kutunga ku Tembulu

²⁴ Kikalakalu kia inzu ia Jihova ia kexile mu Jeluzaleme anga kʼimana; hé ki nakina muene katé mu muvu ua kaiadi ua utuminu ua Ndala, sobha ia Pélesa.