Ejidala 3 - O Mikanda Ikola

Kalatódio a ka tunga

¹ Kia bhixila mbeji ia kasambuadi, kuila anʼa Izalaiele ala kiá mu jimbonge jâ, mundu uoso u di bhongoluela mu Jeluzaleme kala muthu umoxi ngó.

² Jesuua, monʼa Jozadake, u balumuka ni phange jê, jinganga, ni Zolobabele monʼa Selatiiele, ni phange jê, anga a tunga Kalatódio ka Nzambi ia Izalaiele, phala ku thandu diê kubhakuilaku o jisata, kala kia ki soneka mu divulu dia kitumu kia Mozé, muthu ua Nzambi.

³ Anga a xikika Kalatódio ku ibhuna iê (o ifikidilu iê), sumbala a kexile bhoxi dia uoma uavulu mukonda dia ku a zuididika kuala akua jixi mu jimbandu, Jihova hé a mu bhakuila muene jisata ku thandu diê mu kimene ni mu ngoloxi.

⁴ Fesa ia jifundu ue a i bhange muene kala kia ki soneka; jisata ja izuua ioso aii ni ku ji bhakula, ku jiʼalula ku kizuua, ja tenena muene kala kia ji xindi dialuilu diê.

⁵ Kia zubha iii, kuiza sata ia izuua ioso, ni jisata ja mbeji ia thethama, ni jifesa ja mukuá dingi ja lumbila jinga Jihova mu ithangana ioso ia tokala; kala dingi ue ió oso eza ni mibhaku iâ mu kubhakuila Jihova kala kia a tumu mixima iâ.

⁶ Tundé mu kizuua kia dianga, kia mbeji ia kasambuadi, ki andeka ni kubhakula jisata kua Jihova; sumbale kienhokio-phe, kiluua ngó a ta madisesa ma tembulu ia Jihova.

⁷ Hé a bhana-phe ue kitadi ku akua kubatula ni akua ufunu ua kusonga mabaia kumoxi ue, ni kúdia ni kúnua ni maji ku akua Sidone ni akua Tilu phala kututa ku Libano miẋi ia misédulu, kuijiia na-iu mu kalunga ku Jopa, mukonda kiene kia di kundu ni Silu, sobha ia Pélesa iu ua ehelela ku ki bhanga.

Madisesa ma tembulu a ma xikika

⁸ Kutula ku muvu ua kaiadi, ua kuiza kuâ ku inzu ia Nzambi, iala mu Jeluzaleme, ku mbeji ia kaiadi, Zolobabele monʼa Selatiiele, ni Jesuua monʼa Jozadake ni akuá dingi, jiphange jâ, jinganga ni jilevita akua muiji ua Levi, ni eneʼoso kiá a tundu ku ubhika eza mu Jeluzaleme, a mateka kikalakalu kia inzu ia Jihova, anga a sola ku jilevita akua muiji ua Levi, athu oso a tenesa kiá makuinhi a iadi a mivu mba a somboka-mu kiá, phala kuendesa kikalakalu kia onzo ia Jihova, kala kia fuama.

⁹ Bhenhobho Jesuua anga u balumuka ni muene ni anʼê ni jiphange jê, ni Kadimiiele ni anʼê, ni anʼa Juda, anga a di bunda kumoxi kala muthu umoxi ngó phala kulanga oso a kexile mu ku bhanga kikalakalu kia onzo ia Jihova, kumoxi ni anʼa Henadade, ni anʼâ ni jiphange jâ, akua muiji ua Levi.

¹⁰ Kioso akua kutunga kia te madisesa ma Tembulu ia Jihova, jinganga eza kiá a zuata, eza ue ni jikoloneta; o jilevita, anʼa Asafo eza ni jimbânza phala kuximana Jihova, kala kia xindi Davidi, sobha ia Izalaiele.

¹¹ Anga a kuata ku di tambuijila mu kuimba, ni kuximana, ni kubhana fuma kua Jihova, ni kuzuela, exi: Muene ukôla, kuma jihenda jê ji nangenena ku thandu dia Izalaiele. Mundu uoso hé a kuata kutana ni ku dikola ni dízui dia suina, mu kuximana Jihova, mukonda dia ku ta madisesa ma inzo ia Jihova.

¹² Sumbala kiene, maji jinganga ja vulu, ni jilevita, ni jitata ja mabhata, a kuka kiá, a mono inzo ia Jihova ia diangelèku, ki ia kexe ku madisesa mê, a didi ni ku ta muene jongololo, kia mono dingi iii ku mesu mâ; maji hanji muene, a vudile a kexi mu zangula mbimbi ni ku ta mitendu ia kusanguluka.

¹³ Katé kia bhonzele muene kutungula o mbimbi ia kusanguluka, ni mbimbi ia kudila kua kifuxi. Mbata o kifuxi kioso a kexile mu ku sanguluka ni mbimbi ia di leka, mazuí mâ anga aia muene ni kua evua ku makanga kinéne.