Efezo 6 - O Mikanda Ikola

Ku di tuma kua ana ni jitata

¹ Enu ana, muala mua Ngana, tumakenu adi enu, kuma kiene kia tokala.

² Ẋila tatʼ enu ni mamʼ enu, kiene o kijila kia dianga ni polomesa,

³ phala ioso i kuende kiambote, u kole muenhu mu ngongo.

⁴ Enu uenu mu jitata, kana kuthathamesa anʼ enu ni ku a kuatesa njinda. Maji mu a sasa ni ku a beta, ni ku a longa kioso kia tumu Ngana.

O abhika ni jingana jâ

⁵ Enu abhika, tumakenu ió oso ala jingana jenu mu xitu, ni uôma, ni kuteketa. Ima ioso mu i bhanga ni ufiiele ua muẋima, kala Kristu muala ku mu bhikila.

⁶ Kana kukumbidila ngó kioso ene kia kala ku mi tala mesu, kala mualù sota ku di uabhesa ku athu. Maji muila kala mu abhika a Kristu, mualù bhanga o vondadi ia Nzambi ni muẋima.

⁷ Kalakalenu ni vondadi iambote, kala Ngana mua mu kalakela, kana athu.

⁸ Lembalalenu kuma kima kioso ki bhanga muthu, kiene kia kà tambula dingi kua Ngana, kixi uala u mubhika, kixi u fôlo.

⁹ Enu uenu mu jingana, ima iene imoxi i mu bhanga o abhikʼ enu, kana kuia ni ku a kusa. Kuma mua kʼ ijiia kuila ku diulu sai-ku Ngana iâ, muene ue Ngana ienu, o muène kene ni katungu ka athu.

O kibhakatu kia Nzambi

¹⁰ Ki tualʼ iki-phe, suinenu mua Ngana, ni mu kutena kua nguzu iê.

¹¹ Zuatenu kibhakatu kioso kia mi bhana Nzambi, phala mu di fikidile mu kubhânga ni jindunge joso ja Diabhu.

¹² Kuma o kulua kuetu ki kua ku di lua ni athu mu xitu, maji tu lua ni ifuẋi ia jinzumbi ja phulu ku ididi ia diulu, tu lua ni atumini, tu lua ni akutende, tu lua ni enexi a kithangana kia kitombeʼ ʼiki mu ngongo.

¹³ Uila kiki, sungenu o kibhakatu kioso kia Nzambi! Phala ki bhixila o kizuua kiaiibha, mu tene kubangâma mu kubhânga ni Nguma, katé ki muila iene ioso mua, i zubha, hanji muemana mu ididi ienu.

¹⁴ Uila kiki, di fikidilienu-phe. Bhu kinhonga mu di kuta o kidi kala phonda. Zakelenu o kivunga-thulu kia kuiuka,

¹⁵ mu inama mu zuata jihaii ja ku di iudika mu Njimbu Iamboe ia paze.

¹⁶ Ambatenu jinga ue o ngubu ia kuxikana, phala mu tene kujima na-iu o mifula ia Diabhu ia uama tubhia.

¹⁷ Tambulenu ue o kubhuluka kala kapasete, ni Maka ma Nzambi kala xibhata ia mi bhana kuala o Nzumbi Ikôla.

¹⁸ O ima ioso íii mu i bhanga jinga ni kusamba, mu kubhinga Nzambi ku mi kuatekesa. Sambenu jinga ithangana ioso, mu ku mi endesa kuala o Nzumbi ia Nzambi. Kala kiki, Phaphumukenu, ki mu di jimbe. Kana kubhuila. Endenu ni kusambela jinga akua Ngana oso.

¹⁹ Eme uami ngi diondelienu, phala Nzambi a ngi bhane o maka ni kusakalala mu kuzuela ki ngi jikula o dikanu, mu kulonga sé uôma o kijinganu kia Njimbu Iambote.

²⁰ Kiene kia ngi bhekela o kukala ngi mukunji ua Njimbu ienʼíii, sumbala kindalʼiki ngala bhu lubhambu. Kala kiki, ngi sambedienu, phala kuene ku lubhambu ngibhue uôma ni kutula o Njimbu íii kala kioso ki nga tokala kuzuela.

Tixiko a mu katula. Kulekela

²¹ Phala mu ijiie imbamba ioso kunu ni kioso ki ngala kubhita, Tixiko, phange ietu ia muẋima, ngunza ia fiiele mua Ngana, ua kà mi kunda ima iene ioso.

²² Kiene ki nga mu katuila, eme nga mu tumu ku mualʼ oko, phala mu ivue ki tuala, muène nʼ a mi konde o malamba ku miẋima.

²³ Jiphange koko a kale ni paze, ni henda kumoxi ni kuxikana, i tunda kua Nzambi Tata, ni kua Ngana Jezú Kristu.

²⁴ Ku kale kiadi kua ene oso a zola Ngana ietu Jezú Kristu, ni henda ia kambe o mangonha.