Efezo 5 - O Mikanda Ikola

Kristu ua tu bhana phangu. Kitombe ni mukengeji. Kukumbidila o kithangana, kuma izuua iii iaiibha

¹ Endenu-phe ni kufikisa Nzambi, kala mu anʼ ê a muẋima.

² Mienhu ienu i kale jinge mu henda kala henda ia Kristu ia tu kuatela, iu ua tenéne ku di bhakula bhu kididi kietu kuma kilumbu, sata ia uabhela Nzambi iala ni dizumba di nuha kiambote.

³ O undumbu-phe, ni ufusa uoso, ni hanji jaiibha, ka jʼ ivue né ku ji ta ngó maka mu ʼaxaxe kenu, kala kia fuama akua Ngana.

⁴ Né jindaka, né kuzuela kua uoua, mba kasekelu, iene ioso íii ki i mi fuama. Inda kota o kukala mù sakidila jinga Nzambi.

⁵ Ijiienu-kiu mu kidi, kuma muthu uala ndumbu, kifusa, mukua luimbi, kuma luimbi lua tokala ni ubhezelu ua iteka, kala ni undundu ua kima mu Utuminu ua Kristu ni Nzambi.

⁶ Ki bhu kale muthu u mi nganala ni maka ma usemenhi; kuma ima ienʼ íii iene i bheka o njinda ia Nzambi ku thandu dia oso abhukumuka.

⁷ Enu-phe, enʼ ió kana ku di lunga-nâ.

⁸ Kuma enu-enu mʼ ukulu mua kexile mu kitombe, maji o kiki muala kiá mu mukengeji mua Ngana. Endenu-phe ni kuenda kala anʼa mukengeji.

⁹ Kuma o kuima kua mukengeji ku di monekena mu kubhongolola nzungule ia jimbote, ni kuiuka, ni kidi.

¹⁰ Sotenu kudilonga jinga ioso i uabhela kiambote Nzambi.

¹¹ Kana kukala mu kisangela kia imbamba ioio ia kitombe, ki iene ni kuima, iene mù bhanga akuenu. Kota mu kala mu ku i bazela, phala ku i bheka muazele.

¹² Kuma ima i bhanga enʼ ió mu kasuekele, ni ku i tanga ngó, ki kuata sonhi.

¹³ Ima ioso-phe kia i bazela hé i moneka ku mukengeji, kiene ki i moneka o kidifua kiê kia kidi kioso ki iala.

¹⁴ Mukonda kioso ki di tukulula mua zele, ki di bhanga mukengeji. Kiene kia ki ambela, exi: Phaphumuka eie uaii ku kilu, u fukunuke mu ʼalunga, kristu nda a ku bhake mua zele.

¹⁵ Uila kiki, alukenu-phe kiambote kioso ki muenda. Kana kala mu ioua, maji mu kala mu jinjimu.

¹⁶ Kumbidilenu o kithangana, kuma izuua íii iaiibha!

¹⁷ Kana kukala-phe mua tobho, maji mu tongolola ioso o vondadi ia mi mesena Nzambi o kubhanga.

¹⁸ Kana kukodiua ni vinhu, mukonda i mi bhekela kutexika. Kota mu izale ni Nzumbi ia Nzambi.

¹⁹ Mu kale mu ku di kunda mudienu ni jisalamu, ni mikumbi ia nzumbi. Muila ni kuimbila Ngana mimbu ni jisalamu ni muẋima ua ku mu sakidila.

²⁰ Muila ni kusakidila jinga ima ioso kua Nzambi, muène Tata, mu dijina dia Ngana ietu Jezú Kristu.

²¹ Anga muia ni ku di belesela enu-enu mudienu, mu uôma ua Kristu.

Ku di tuma kua ngana ni ndona

²² Enu ahatu, beleselenu anumiʼ enu, kala Ngana muène mua mu belesela.

²³ Kuma o ngana uala ni ukota ua kutumina ndona iê, mukuâ ni Kristu ki ala ni ukota ua kutumina o Ngeleja. Kristu muène o Mubhuludi ua Ngeleja, kuma uene o mukutu uê.

²⁴ Uila kiki-phe, kala o Ngeleja ki i belesela Kristu, kiene ue jindona ji belesele anumiʼâ mu ima ioso.

²⁵ Enu ue mu mala, Zolenu ahatu enu kala Kristu kia zola o Ngeleja, iú ua di bhakula bhu kididi kiê.

²⁶ Muène ua bhange kiki phala kulumbila o Ngeleja iê kua Nzambi, mu ku i sukula ni menha, ni ku i zelesa ni dibônzo dia maka mê.

²⁷ Ua ki bhange ue phala nʼ a tena kubheka o Ngeleja bhu pholo iê Muène-muene ni uuabhelu uengi, ki u moneka dixaka, mba kifuta, mba kima ngó kia difu; maji i kale ni kuzela, sé ngó kisému.

²⁸ Kiene ue o jingana ja tokala kuzola o jindona jâ, kala mikutu iâ ene. Diiala uoso ua zolo muhatuʼê, muenié ua di zolo.

²⁹ Mukonda muthu kene mù zemba o mukutu ué-muène. Maji u u dikila, u u tambula konda, kala ki bhanga Kristu ku Ngeleja.

³⁰ Kuma etu tuala tu idiandu ia mukutu uê.

³¹ Kala ki ambe o Mikanda Ikôla, kuila: Mukonda dia kiki, kiene ki bhekela o diiala di xia tatʼâ ni mamʼâ, hé u di banda ni muhatuʼê; ene kiiadi kiâ anga a biluka xitu imoxi.

³² Kijinganu kiki kia dikota kia tukulula o Mikanda ia Ngana. Maji nga mono kuila kia tokala Kristu ni Ngeleja.

³³ Kiene kimoxi ni enu uê: Kala diiala mudienu a zole muhatuʼê kala kia di zolo muène; o muhatu ue a xile munumiʼê.