Efezo 4 - O Mikanda Ikola

Kuongama kua Nzambi. Kitala kia Kristu

¹ Uila kiki, eme ngi hutile, a ngi kutu mukonda dia kubhiẋila Ngana, nga mi diondo mu enda kioso kia fuama mu kixanuʼokio kia mʼixana na-kiu Nzambi.

² Ithangana ioso muila ni kubatâma kuoso, ni kubelesela, ni kuxididika, ni ku di lendukila. Mu londekesa jinga o henda ienu mu ku di kuatekesa kala muthu ni mukuâ.

³ Mu kuata muanu ua kubhanga kioso ki mua tena mu ku di bhaka mu usoko ua kuongama kua mi bhana o Nzumbi, mu dijikita diê dia paze.

⁴ Sai-ku mukutu umoxi ngó ni Nzumbi imoxi, ni kima kimoxi kia mi dielelesa enu oso mu ku mʼixana kua Nzambi.

⁵ Sai-ku Ngana imoxi ngó, kixikanu kimoxi, ni batizu imoxi.

⁶ Sai-ku Nzambi imoxi ngó, Tata ia etu ene oso, uala Ngana ia ene oso, u kalakala mu ʼaxaxe ka ene oso, iú uala moxi dia ene oso.

⁷ Kala muthu-phe mudienu, a tu uanena kiadi mu kizongelu kia ujitu ua tu bhana Kristu.

⁸ Kiene ki ambe o Mikanda Ikôla, exi: Muène kia bande o ditala dia di leka, uambata jihutile javulu, o athu ua a uanena maujitu.

⁹ Bheniobho bhu ambe exi ua bande, a zuela kiebhi? Kikale ua diangele kutuluka ididi ia beta kuboloka bhoxi mumu mu ngongo.

¹⁰ Kieniki uoso ua tulukile, muene ue ua bande ditala dia bhingi maùlu moso ua ma somboka, katé kia kala mu kuizalesa o ididi ioso.

¹¹ Muène ua uanena o maujitu ku athu. Amoxi-moxi ua a bhana kukala Jipoxolo; amoxi Jipolofeta; amoxi akunji a kutula o Njimbu Iambote; amoxi jipaxtolo; amukuâ jimesene ja kulonga mu Ngeleja.

¹² Muène ua bhange kiki mu kuzubhisa akua Ngana kudiiudika mu kioso kia a kambe, mu kukumbidila o ungunza uâ, ni mu kutungisa o mukutu ua Kristu.

¹³ Mu kieniiki, katé ki tua kà bhixila etu ene oso mu kuongama kua kuxikana kuetu, ni mu kuijiia o Monʼ a Nzambi. Anga tu kala ku uadiakime, hé tuia ni kukula katé mu kitale kia tenena kia Kristu.

¹⁴ Uila kiki, kana, ki tu kala dingi tu anandenge, a tu takujula ku mabhuku, ni ku tu xinjijika kuala o kitembu kia ulongelu uengi uiza-ku ua athu akua mangonha. Kuma enʼiâ mu jindunge jâ kala mibhetu, ambata akuâ mu jinjila ja kutexika.

¹⁵ Maji tu kale tu athu tua jijila o kuzuela kidi ni muẋima ua henda, o mu ima ioso tu kale mù kudila mua muène Kristu, o mutue uetu.

¹⁶ O mu ku di tuma kuetu ni muène Kristu, o mukutu uoso u di banda kiambote, u di sokejeka ku idiandu i kumbidila mu ididi iê, mukutu uoso anga u kala mù kula, u kala mù tungiua ni henda.

Uendelu uazele; umatumbu uengi

¹⁷ Ngambe-phe kiki, nga mi bhana umbangi mua Ngana, kuma: Ki mu ende dingi kala ki enda o matumbu ió kene Nzambi mu usemenhi uâ,

¹⁸ Kuma ala athu a vundu mu ilunji. Mbata ene a sanduka ku muenhu u tunda kua Nzambi, mukonda dia kutobha kuala moxi diâ, ni mukonda dia kukola o miẋima iâ.

¹⁹ Kuma-phe ene a ẋiẋidila kiá, kala dingi ni sonhi ia kima, a di bhakula mu kubhanga ima iaiibha, iá a baluka mu ufunu ua ima ioso ia ufusa.

²⁰ Ima iii-phe enu ki iene i mua di longo kua Kristu.

²¹ Kuzuela o kidi, enu mu evu kioso kia mu tanga jinga, o ki mua bokona mu kisangela kiê, mua di longo o kidi, kiene mua Jezú.

²² Bhu kaxiʼ abha ni kikexilu kienu kia bhiti, zulenu o muthu Uokulu, ua bolo, mù kaiela o jihanji ja kudinganala.

²³ Phala mu biluke kiengi mu ilunji ienu ni mu miẋima ienu moxi.

²⁴ Mu zuata o muthu uobhe a mu bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.

²⁵ Uila kiki, ki mu tange jinge dingi makutu. Maji mu di tangela jinga o kidi kala muthu ni mukuâ. Kuma etu oso tua di bhange tu idiandu ku mukutu ua Kristu.

²⁶ Se u kala ni njinda, kuehela kuila i ku bhangesa kuta kituxi; kumbi ki di ku bhuile mu njinda.

²⁷ Diabhu kana ku mu bhana kididi.

²⁸ Uoso ua nhanéne, ka nhane dingi; inda a mateke kukalakala, mbé a kale ni muenhu uambote ua ujitu, nʼ a tene kukuatekesa mukuâ uoso ua bhindama.

²⁹ Ki mu tunde ndaka iabolo mu kanu dienu. Maji o kuzuela kuenu ku kale kua kukuatekesa akuenu kukula mu kuxikana ni a mone kioso kia bhindamena, phala kuzuela kuenu ku bhange mbote kua oso evua.

³⁰ Kana kubheka malamba kua Nzumbi Ikôla ia Nzambi. Kuma o Nzumbi muene o kidimbu kia kuila o Nzambi uala momuenu; muène ue o diẋikina dia kuila Kizuua kí bhixila kia Nzambi ku mi kula.

³¹ Ni kulula kuoso, ni kunônga, ni kutema, ehenu-ku. Kana kukuata kuhoia-hoia, ni kulokalala. Kana kukala ni unguma.

³² Inda kota o ku di kuatekesa mudienu, ni ku di xinganeka. Muenda ni ku di loloka, kala Nzambi kia mi loloka enu mukonda dia Kristu.