Dimatekenu 9 - O Mikanda Ikola

Nzambi u ta kikutu ni Noué

¹ Nzambi anga u ta kizediuise kua Noué ni anʼê a mala, anga u a ambela, uixi: Di vualienu mu sokoloke, mu izalese o ngongo.

² O uoma ni ku mi lenga kuala o iama, u kale ku thandu dia jixitu joso mu ngo-ngo, ni jinjila joso ji bhita bhulu; ioso i zanzala ku mavu, ni jimbiji mu menha, a i bhakula ioso bhu maku menu.

³ Ima ioso ia muenhu, iene mu kuenda, i kale kúdia kuenu; mukuá ni ki nga mi bhana o idima ia uisu, iene ioso kindala nga mi bhana na-iu.

⁴ O xitu-phe ki mu i die ni muenhu uê, o manhinga; kuma manhinga ene o muenhu.

⁵ Ni kidi kiene o manhinga menu nga kà ebhula muene, o manhinga ma mienhu ienu nga kà ebhula muene ku kiama kioso katé ni bhu lukuaku lua muthu, xi, katé ni bhu lukuaku lua muthu ni mukuá, nga kʼebhula o muenhu ua muthu.

⁶ O uoso u ẋamuna o manhinga ma muthu, muthu ni mukuâ a mu ẋamune ue o manhinga mê; kuma muthu a mu bhanga mu kidifuanganu kia Nzambi.

⁷ Enu-phe, divualienu, mu sokoloke; mu izalese o ngongo nda i tunge kiavulu.

⁸ Nzambi anga u ambela Noué, ni anʼê kumoxi, uixi:

⁹ Talesenu, eme nga-nda kuta o kikutu kiami ni enu, ni mbutu ienu ioso hinu i mi bhingana;

¹⁰ Ni mienhu ia mukuá i mua tungu na-iu kumoxi, ia jinjila, ia ibhaku, ia jixitu joso mu ngongo, jala ni enu, tunde ku jixitu joso ja tundu mu álaka katé ku iama ioso mu ngongo.

¹¹ Eme-phe ngi xikika o kikutu kiami ni enu oso; kuila ki mungu dingi xitu ioso ia kà jima ni menha ma dilúvio; nuka kuà kala dingi sulumbembe ia menha i buikisa ixi.

¹² Nzambi anga u zuela, uixi: Kijimbuete kienhiki kia kikutu kiami ki nga te ni enu ni mienhu ia mukuá, i mua tungu na-iu kumoxi, ku miji sé dizubhilu;

¹³ Nga te hongolo iami ku matuta, iene i kala kijimbuete kia kikutu kiami ni ngongo ioso.

¹⁴ Kià bhita-phe kuila, kioso ki ngi bheka matuta kulu dia mundu, ni hongolo ia kà tukuluka mu matuta.

¹⁵ Bheniʼobho nga kà lembalala-phe kikutu kiami ki nga te ni enu katé ni mie nhu ioso ni xitu ioso; o menha-phe nuka a ka di bhanga dingi dilúvio di buikisa o xitu ioso.

¹⁶ O hongolo ia kà kala mu matuta; eme-phe ngi i tala jinga, phala ngi lembalale o kikutu ki nangenena kia bhiti bhu kaẋi ka Nzambi ni mienhu ia jixitu joso jala mu ngongo.

¹⁷ Nzambi anga u ambela Noué, uixi: Kiki kiene o kijimbuete kia kikutu ki nga xikika bhu kaẋi kami ni xitu ioso ia tungu mu ngongo.

Noué u phapha dibhia dia mivide

¹⁸ O anʼa Noué-phe a mala a tundu mu álaka, eneʼá: Seme, ni Hame, ni Jafete; Hame muene tata ia Kanana.

¹⁹ Iá ene ana a tatu a Noué a mala; o mu kusokoloka kua eneʼâ, kuene kua tungisa dingi ixi ioso.

²⁰ Noué anga u kuata kudima o mavu, u phapha díbhia dia mivide;

²¹ anga u nua ku vinhu iê, u kodiua; u zeka mu balaka iê, ni tuẋiʼa thakala;

²² O Hame, tata ia Kanana, u mona tuẋi ia tatʼâ, hé u tangela jiphange jê kiiadi ala bhu kanga.

²³ Bheniʼobho ni Seme ni Jafete, a kuata dibeka, a di kuatela ku kunda kiiadi kiâ, enda ni dima, tatʼâ a mu futa tuẋi iê, jipholo jâ a ji bhana kuengi, tuẋi ia tatʼâ ka i tale mesu.

²⁴ Noué anga u phaphumuka ku vinhu iê, hé uijiia kia mu bhange monʼê ua kasule.

²⁵ Anga u zuela, uixi: Kanana a mu bhubhidile; A kale mubhika u bhikila abhika, Jiphange jê ji mu tumina jinga.

²⁶ Uixi, dingi: A tane-ku Ngana, Nzambi ia Seme, Kanana a kale mubhikʼê;

²⁷ Nzambi a kudise jimbambe ja Jafete, A tunge mu jibalaka ja Seme; Kanana a kale mubhikʼê.

²⁸ Noué kia tundu mu dilúvio, u bhanga hama jitatu ja mivu ni makuinhi a atatu.

²⁹ Izuua ioso ia Noué anga i tena konda ia hamaʼvua ia muvu ni makui nhi a tanu, anga u fua.