Dimatekenu 7 - O Mikanda Ikola

Noué ni dibhata diê a bokona mu âlaka

¹ Kienʼokio Ngana anga u ambela Noué, uixi: Iza eie ni dibhata dié dioso mu bokone mu álaka; kuma eie ngó nga ku mono kuiuka bhu pholo iami, mu muiji iú.

² Ku jixitu joso ja zele u kuata-ku sambuadi dia ndumbe, ni sambuadi dia akaji, ji kale kumoxi ni eie; o ku jixitu ja kambe kuzela-phe, kiiadi-kiiadi, ni ndumbe ni mukajiʼê.

³ Ku jinjila ue ji bhita bhulu, sambuadi-sambuadi, ni ndumbe ni mukaji; phala a xale mbutu ku muenhu kulu dia mundu.

⁴ Kuma kua kambe ngó sambuadi dia izuua, nga-nda kunokesa mvula mu ngongo mu makuinhi auana a izuua ni makuinhi a auana a usuku; katé ima ioso i nga bhanga, iala ni muenhu, nga i jimuna ku thandu dia mavu.

⁵ Noué anga u bhanga kioso kia mu tumu Ngana.

⁶ Noué anga u kala mu hama jisamanu ja muvu kioso ki eza o dilúvio dia menha mu ngongo.

⁷ Noué anga u bokona, ni anʼê a mala, ni mukajiʼê ni akaji a anʼê, a bokona mu álaka ni muene, mukonda dia menha ma dilúvio.

⁸ Ku jixitu jazele, ni ku jixitu ja kambe kuzela, ni ku jinjila, ni ibamba i huhuta ni mala bhoxi,

⁹ A bokona ni Noué mu álaka ku kiiadi-kiiadi, ni ndumbe ni mukaji, kala Nzambi kia tumu kua Noué.

¹⁰ Mu kukala-phe, kia zubha kubhita sambuadi dia izuua, menha a dilúvio eza mu ngongo.

¹¹ Mu muvu ua Noué ua kutenesa hama jisamanu ja muvu, bhu mbeji iê ia kaiadi, kizuua kia kuinhi ni sambuadi ku mbeji, kizuua kienhókio majiia ma mukiukuluku ma baza, o mazungu a diulu a jikuka,

¹² Mvula anga i noka mu ngongo mu makuinhi auana a izuua, ni makuinhi auana a usuku.

¹³ Mu kizuua kimoxi kienhokio, kiene kia bokona Noué mu álaka, ni Seme, ni Hame, ni Jafete, anʼa a Noué a mala, ni mukaji a Noué, ni akaji a anʼê kitatu, a bokuena-nê kumoxi.

¹⁴ Ni ene ni jixitu joso mu idifua iâ, ni ibhaku ioso mu idifua iâ, ni ibamba ioso i huhutila o mala bhoxi mu idifua iâ, ni jinjila joso mu idifua iâ, ni tunjila tuofele ni iama ioso i kala ni mabhabha.

¹⁵ O jixitu joso jala ni kubhuima kua muenhu moxi diâ, ji bokona ni Noué mu álaka, ku kiiadi-kiiadi.

¹⁶ Anga a bokona, ndumbe ni mukaji ku jixitu joso, kala kia mu tumu Nzambi, Ngana anga u jika-ku, ua a jikila ku kanga.

O dilúvio mu ngongo

¹⁷ Dilúvio anga di kala mu ngongo mu makuinhi auana a izuua; menha anga a vula, álaka anga i zanguka, bhoxi ki iala kututa-bhu dingi.

¹⁸ Menha anga a suina, a bobesa ixi ioso; álaka anga i kala mu kuendela ku thandu dia menha.

¹⁹ Menha hanji aia ni kuvula mu ngongo katé ni jisungu ja milundu ioso ia lebha koxi ia diulu ja jimuka.

²⁰ Menha anga a ta-ku dingi kuinhi dia kóvado ni kitanu ku thandu dia milundu ia boba.

²¹ Jixitu joso anga ji fua, joso jenda ku thanduʼa mavu, ni jinjila, ni ibhaku, ni iama, ni ibamba ioso ienda mala bhoxi, ni athu oso;

²² O ioso ia kexile ni muha ua muenhu ua kubuima mu mazulu mâ, ku kanga ku mavu a kukuta, anga i fua.

²³ Ima ioso ia muenhu anga i jimuka ku thandu dia mavu, tunde ku muthu, ni ibhaku, ni kibamba, ni njila i bhita bhulu; iene joso ia jimi mungongo; Noué ngó ua subhuka-ku ni iá a kexile-nê mu álaka.

²⁴ Menha anga a nakina mu ngongo mu hama ia izuua ni makuinhi a tanu.