Dimatekenu 50 - O Mikanda Ikola

Jakobo a mu dila thambi, a mu fûnda

¹ Bhenhobho Zuze u di bhala mu pholo ia tatʼâ, u didila ku thandu diê, u mu bhana jibeju.

² Zuze anga u tuma o imbanda iê, iene ku mu bhikila, phala mukutu ua tatʼâ a u teke mu bálsamu; imbanda anga a iudika kiki mukutu ua Izalaiele.

³ Anga a bhanga makuinhi auana a izuua, kuma ufunu ua bálsamu u bhinga izuua ioio i tena; akua Ijito anga a mu dila thambi mu makuinhi sambuadi a izuua.

⁴ Kia zubha izuua ia ku mu dila thambi, Zuze u zuela ni akua mbèle ia Falaó, uixi: Se nga sange ngalasa ku mesu enu, nga mi diondo, ngi bhingidienu kua Falaó, kuma:

⁵ Tatʼetu ua ngi lokesa, uixi: Eme ngi fʼú; ku ngi fûnda, kale mu ngi fûnda mu mbila iami i nga kandesa mʼoxi ia Kanana. Kiki-phe nga ku diondo, ngʼehele ngi bande, ngiie nga kà funde tatʼetu, ni ngʼize dingi.

⁶ Falaó-phe uixi: Ndé, kà fûnde tatʼenu, kala kioso muene kia ku lokesa.

⁷ Zuze anga u banda mu kuia kûfunda tatʼâ; ni makota oso ene mu kubhikila Falaó ela-nê kumoxi, o adiakimi oso ku mbanza, ni adiakimi oso mʼoxi ia Ijito,

⁸ ni dibhata dioso dia Zuze, ni jiphange jê, ni dibhata dia tatʼâ; o anʼâ ngó ni ibhaku iâ a xala mʼoxi ia Ngozene.

⁹ A bandela kumoxi ni makalu, ni athu a di te ku jikabalu, kífua kilômbo kia dikota muene.

¹⁰ Anga a tula kiênda kia Atade, ku sámbua koko dia Njolodá, anga a didila o thambi bhenhobho, ni jingololo javulu muene, Zuze u tulula o thambi ia tatʼâ mu sambuadi dia izuua.

¹¹ Akua-xi, akua Kanana, kia zubha kumona o thambi iala mu didila bhu kiênda kia Atade, exi: Kudila kua akua Ijito kuku, kua tundu dingi; anga a luka-bhu dijina dia Abele-mizaimi; diala ku sámbua dia Njolodá.

¹² Anʼê anga a mu bhanga muene kala kia ambelele muene.

¹³ Kuma anʼê aii-nê mʼoxi ia Kanana, ia a mu fûndu mu dibânda dia mukáu ua Makapela, dia sumba Mbalahamu ni mukáu kumoxi, kua Efelone, o Muhiti, bhua lulama ni Mamele, mu kala undundu uê, ni ki kale kididi kiê kia kufûndila.

Zuze u bhuisa hèle ku miẋima ia phange jê

¹⁴ Zuze kia zubha kufunda tatʼâ anga u vutuka mu Ijitu, ni muene ni phange jê, ni athu oso ele-nê kumoxi ku thambi ia tatʼâ.

¹⁵ Jiphange ja Zuze-phe, kia zubha kumona kuma tatʼâ uafu kiá, a di ambela mudiâ, exi: Imoxi Zuze ua tu bhakela luma ku muxima, ua-nda ku tu tata kiâ phonzo ia phulu ioso i tua mu bhangele.

¹⁶ Anga a tumikisa njimbu kua Zuze, exi: Phaienu ua tu ambela kioso kafu luua, uixi:

¹⁷ Mua kàmbela Zuze, kuma nga mu diondo, a loloke jiphange jê, o kikuma ni kituxi kiâ kia ku tele, kuma a ku bhangele muene phulu. Kiki-phe tua ku diondo, loloka kituxi kia jiselevende ja Nzambi ia phaienu. Zuze anga u kuata kudila kioso kiala ku mu zuelesa kiki.

¹⁸ Jiphange jê ene uâ anga eza, a mu diundila bhu pholo iê, exi: Etʼuetú, tu bhange tu abhikʼé.

¹⁹ Zuze anga u a ambela, uixi: Ki mu kale ni uoma. Kífua ki ngalʼiki eme ngala bhu kididi kia Nzambi?

²⁰ Enu muambele muene ku ngi bhanga phulu; Nzambi-phe ua ki lungulula ki kia di bhange mbote; Muene ua ki bhitisa kiengi kala ki mua ki mono kizuua kia lelu, phala ku bhulula mienhu ia ndumba.

²¹ Kala kiki-phe, ki mu kale ni uoma; eme ngi mi tambula konda ni enu ni aneʼenu. Kienhiki Zuze kia tululuisa o jiphange jê, iú ua a bhuisa o hele ku muxima.

O ufilu ua Zuze

²² Zuze anga u tunga mu Ijito, ni muene ni dibhata dia tatʼâ; Zuze anga u laia katé kia bhiẋila mu hama ia muvu ni kuinhi.

²³ Zuze anga u mona anʼa Efalaime katé ku alulu ni aluululu; ni anʼa Makidi ue, monʼa Manasa, a a vualela ue hanji ku jiphuna ja Zuze.

²⁴ Zuze anga u ambela phange jê, uixi: Eme nganda kúfua; Nzambi-phe hinu ka kambe ku mi zungila, nʼa mi katula mʼoxi mumu, hé u mi bheka dingi mʼoxi ia lokela Mbalahamu ni Izake ni Jakobo.

²⁵ Zuze anga u lokesa anʼa Izalaiele, uixi: Hinu Nzambi kia mi zungila, ni ifuba iami mu i ambata, ki i xale mʼoxi mumu.

²⁶ Zuze anga u fua, kiala mu hama ia muvu ni kuinhi; anga a mu teka mu bálasamu, a mu ta mu kaxá mu Ijito.