Dimatekenu 5 - O Mikanda Ikola

O luvualu lua Adá

¹ Didi diene o divulu dia Ingo ia vumu ia Adá: Kizuua kia bhanga Nzambi o muthu, ua mu bhange mu kidifuanganu kiene kia Nzambi;

² Ua a bhange diiala, ni muhatu; anga u a benzela, u a luka dijina dia Adá kizuua kiene kia a bhanga.

³ Adá u bhanga hama ia muvu ni makuinhi atatu, anga u vuala monʼa diiala mu kidifuanganu kiê-muene, ua bhabhelela ku kijingo kiê, anga u mu luka dijina dia Sethe.

⁴ Kia zubha Adá kuvuala Sethe u bhanga dingi hama nake ia mivu, u vuala anʼa mala ni anʼahatu.

⁵ Izuua ioso ia Adá mu ngongo, anga i tena konda ia hamaʼvua ia mivu ni makuinhi atatu; anga u fua.

⁶ Sethe anga u bhanga hama ia muvu ni itanu, anga u vuala Eno.

⁷ O kia zubha Sethe kuvuala Eno, u bhanga dingi hama nake ia muvu ni sambuadi anga u vuala anʼa mala ni anʼahatu.

⁸ Izuua ia Sethe mu ngongo anga i tena hama vua ia muvu ni kuinhi ni iadi; anga u fua.

⁹ Eno anga u bhanga makuinhiʼvua a muvu, anga u vuala Kainane.

¹⁰ O kia zubha Eno kuvuala Kainane, u bhanga dingi hama nake ia muvu ni kuinhi ni itanu, anga u vuala anʼa mala ni anʼahatu.

¹¹ Izuua ioso ia Eno mu ngongo anga i tena hamaʼvua a mivu ni itatu; anga u fua.

¹² O Kainane kia tenesa makuinhi sambuadi a muvu, hé u vuala Mahala-lele.

¹³ O kia zubha Kainane kuvuala Mahalalele, u bhanga dingi hama nake ia muvu ni makuinhi auana, anga u vuala anʼa mala ni anʼahatu.

¹⁴ Izuua ioso ia Kainane mu ngongo i tena konda ia hamaʼvua ia muvu ni kuinhi; anga u fua.

¹⁵ Mahalalele anga u bhanga makuinhi a samanu a muvu ni itanu, anga u vuala Jalede.

¹⁶ O kia zubha Mahalalele kuvuala Jalede, u bhanga dingi hama nake ia muvu ni makuinhi atatu, anga u vuala anʼa mala ni anʼahatu.

¹⁷ Izuua ioso ia muenhu ua Mahalalele anga itena konda ia hama nakeʼa muvu ni makuinhiʼivua ni itanu; hé u fua.

¹⁸ Jalede kia tenesa hama ia muvu ni makuinhi a samanu ni iadi, u vuala Enoko.

¹⁹ O kia zubha Jalede kuvuala Enoko, u bhanga dingi hama nake ia muvu anga u vuala nzungule ia anʼa mala ni anʼahatu.

²⁰ Izuua ioso ia Jalede anga i tena konda ia hamaʼvua ia muvu ni makuinhi a samanu niʼiadi; hé u fua.

²¹ Enoko anga u bhanga makuinhi a samanu a muvu ni itanu, anga u vuala Matúzala.

²² Enoko anga uenda ni Nzambi; kia zubha kuvuala Matúzala, u laia hama jitatu ja mivu, hé u vuala anʼa mala ni anʼahatu.

²³ Izuua ioso ia Enoko anga i tena konda ia hama jitatu ja muvu ni makuinhi a samanu ni itanu;

²⁴ Enoko anga uenda ni Nzambi, anga ku mesu a athu u jimuka-ku, kuma Nzambi ua mu ambata.

²⁵ Matúzala anga u bhanga hama ia muvu ni makuinhi nake ni sambuadi ku muenhu, anga u vuala Lameke.

²⁶ O kia zubha Matúzala kuvuala Lameke, u bhanga dingi hama sambuadi ia muvu ni makuinhi nake ni i iadi, anga u vuala nzungule ia anʼa mala ni anʼahatu.

²⁷ Izuua ioso ia Matúzala anga i tena konda ia hamaʼvua ia muvu ni makuinhi a samanu nʼivua; hé u fua.

²⁸ Lameke anga u bhanga hamʼa muvu ni makuinhi nake ni iiadi, anga u vuala mona umoxi ua diiala;

²⁹ Anga u mu luka dijina dia Noué, uixi: Muenʼiú u tu bhandulula mu ibhangelu ietu, ni mu kukalakala kua maku metu, mukonda dia mavu iá òʼnake kuala Ngana.

³⁰ O kia zubha Lameke kuvuala Noué, u bhanga dingi hama jitatu ja muvu ni makuinhiʼvua ni itanu, anga u vuala anʼa mala ni anʼahatu.

³¹ Izuua ioso ia Lameke anga i tena konda ia hama sambuadiʼa muvu ni makuinhi sambuadi ni sambuadi; hé u fua.

³² Noué kia tenesa hama jitanu ja muvu; u vuala Seme, ni Hame, ni Jafete.