Dimatekenu 49 - O Mikanda Ikola

Jakobo mu kubhana kizediuise ku anʼê, u a jimbuila ima ia kà bhita na-iu ku hádia

¹ Jakobo anga uixana anʼê, uixi: Bhongolokenu, ngi mi tangele ima ioso ia kà mi bhita mu izuua ia hádia.

² Bhongolokenu, muivue, enu mu anʼa Jakobo; bhanenu mátui kua Izalaiele, tatʼenu.

³ Lubene, eiʼeie u monʼamiʼa phande-kumbi, u nguzu iami, u diamatekenu diami dia kubhanga muiji; ukota ua ku tokala ua kukala ku pholo, ukota ua kutumina.

⁴ Mu ku di takujula-phe kala menha, ukota ua u lémbua; mukonda ua bande bhu hama ia tatʼenu; ua i te lufuku, muanza uami ua u zange.

⁵ Ximinhá ni Levi jiphangʼiji masoko; mikuale iâ ia ujibhanganga.

⁶ U muenhu uami kana kubokona mu kikutu kiâ. Mu kibuka kiá, kijingo kiami ki ki di bunde-mu; kuma mu njinda iâ a jibha athu, mu kuhuka kuâ ngombe a ji sende mixibha.

⁷ Mázui ku thandu dia njinda iâ ia usuéia, kuma ia vudile kinéne; ni ku uluami u kala kiki, ua kàka ni uene! Nga kà a uana-uana mua Jakobo, hé nga kà a muangena mua Izalaiele.

⁸ Eie Juda, a kà ku ximana kuala o jiphange jé; lukuaku lué lu kuata bhu xingu ia jinguma jé; anʼa tatʼenu a kʼèza mu diunda bhu pholo ié.

⁹ Eie Juda u munzangala ua hoji; monʼami, kumbi kuẋi dia kʼèza ni mbole iê? U zomba hé u butama kala ndumbe ia hoji mu kisasa, kala mama a hoji; nanhi muene u teza ku mu balumuna?

¹⁰ Mbasá ia ungana ki ia ka sondoloka kua Juda, o muiji uê ki ua kʼàbhua kijingo kia kutumina; katé bhua kʼèjila Mukunji a-nda ku mu tumikisa, ua bhingi a mu tumaka kuala o ifuẋi ioso.

¹¹ O bulu iê ia ndumbe u i kuikila ku muvide, o monʼa bulu iê ia mukaji, ku kixina kia beta kuuabha; izuatu iê ua kà i sukula mu vinhu, ni divunga diê mu manhinga ma jiuva.

¹² Mesuʼê a kà kusuka ni vinhu, o mazuʼê a kà zela ni lete.

¹³ Nzebulone u tunga bhu tabhu dia kalunga; u kala ni ndundu bhu kuakela o jinaviiu; ndundu iê i di zala katé ku Sidone.

¹⁴ Isakale ua di bhange bulu ia nguzu mu ifuba, a mu longo makuba mbandu ni mbandu;

¹⁵ ua mono kibangu kiê kia kunhohena, ni ixi iambote ia mu uabhela; ua bhetamena ku mu tuika kimbamba, u kala mukuâ ni ngunza uala mu bhika.

¹⁶ Dane muene ua kà fundila o mundu uê, mukuâ ni muiji umoxi ku miiji ia Izalaiele.

¹⁷ Dane nhoka ia zeka mu njila, diuta dia diʼaneka mu kaẋi ka kahoio dia bhingi di numatena mu tuluingi tua kabalo, ua ka mondala anga u laukila kuema.

¹⁸ Nga kinga ubhulukilu ué, u Jihova.

¹⁹ Ngadi, bhu kala kilômbo ki mu landameka; maji, ku pholo, muene ue u a landameka.

²⁰ Asele, ua ka kala ni kúdia kua di xala makudia ma vondadi ma uabhela jingana.

²¹ Nafitali, mukuâ ni mbâmbi ia jituka, iia ni kulenga; u kala ni uanji ua kuzuela kiambote.

²² Zuze, músala ua kuima kiavulu, músala ua kuima, uala bhʼotho ia menha jithangu jê ji zanda, jiia ni ku di zala ku thandu dia kikonzo.

²³ Akua mifula a mu tatesa kiaiibha, a mu zukutisa, a mu asa misongo;

²⁴ maji o uta uê ua mufula hanji muene ua suína, mixibha iê ia maku ia tambula nguzu, kua ió Kutende diangene dia Jakobo, kuene kua tundu o mubidi, ni tadi dia Izalaiele.

²⁵ Xi, o Nzambi ia tatʼenu, muene u ku kuatekesa, Muteni-a-Ioso a ku bhane dibesá; a ku bhane mabesá ma diulu ku thandu, a ku bhane mabesá ma menha koxi a mavu, a ku bhane mabesá ma tatʼenu.

²⁶ Ni madibesá ma tatʼenu ma tunde o madibesá ma adietu a ngi vuala, katé ku mbámbe tule, bhu thalʼa milundu i nangenena; mene moso meze ku thandu dia mútue ua Zuze, ma tule mu mútue ua ió a mu tungula mu jiphange jê.

²⁷ Bejamí u di bhanga mbinji ia hame; mu kimene u kuata u dia xitu, mu ngoloxi o mbole u i uana.

²⁸ Ienhʼii iene o kuinhi dia muiji ni kiiadi ia Izalaiele: makʼama ene a zuela tatʼâ mu ku a bhana o madibesá; ua a benzela kala muthu kia fuama o dibesá diê.

²⁹ Anga u a tendelela, uixi: Eme a-ndu ngi bhongolola kuʼàia mundu uetu; mua kà ngi fûnda ni adietu a ngi vuala mu dibânda diala mu mukáu ua Efelone, o Muhiti,

³⁰ mu dibanda diala mu mukáu ua Makapela, bhua lulama ni Mamele, mʼoxi ia Kanana, dibânda-phe dia sumba Mbalahamu kumoxi ni mukáu ua Efelone, o Muhiti, mu ku kala undundu uê, kididi kiê kia kufûndila.

³¹ Muene mua fûnda Mbalahamu ni Sala mukajiʼê; muene mua fûnda Izake ni Bebeka mukajiʼê; muene mu nga fûnda Liia.

³² Mukáu uenhó ni dibânda diê a u sumba ku anʼa Hete.

³³ Jakobo-phe kia zubha kutendelela anʼê kiki, u kotola inama iê bhu hama, muenhu uê ua zubha, anga a mu bhongoluela kuʼaia o mundu uê.