Dimatekenu 47 - O Mikanda Ikola

Jakobo bhu pholo ia Falaó

¹ Kienhókio Zuze anga uia, u tudila Falaó, uixi: Tatʼetu ni jiphange jami, ni ibhaku iâ, ni jimbongo jâ joso jala na-ju, eza, a tundu mʼoxi ia Kanana; kiki a tula mʼoxi ia Ngozene.

² Ku jiphange jê anga u katula-ku malʼatanu, hé u a londekeza kua Falaó.

³ Falaó anga uibhula jiphange jê, uixi: Mu akua ufunu uahi? Ene exi: Selevende jé, ngana, abidi a jimbudi, ni etu ni jitata jetu.

⁴ Anga ambela Falaó, exi: Tueza kukala hanji mʼoxi mumu; mbé dia sabhèlela ia kambe ia ibhaku ia selevende jé; kuma nzala i vula mʼoxi ia Kanana; kiki-phe, tua ku diondo, selevende jé tu kale hanji mʼoxi ia Ngozene.

⁵ Falaó anga u ambela Zuze, uixi: Tatʼenu ni jiphange jé eza kokué, a ku tula eie.

⁶ Oxi ioso-phe ia Ijiito iala ku mesu mé, kuoso ku ua mono kuuabha, kuene ku u tungisa tatʼenu ni jiphange jé; a kadiʼâ mʼoxi ia Ngozene. Se eie uejiia kuila mudiâ muala makuenze ambote, u a bhana kijingo kia kutambula konda ia ibhaku iami ia ngi tokala.

⁷ Zuze anga u bheka Jakobo dia tatʼâ, u mu tula bhu pholo ia Falaó. Jakobo anga u benzela Falaó.

⁸ Falaó anga u ambela Jakobo, uixi: Izuua ia mivu ia muenhu ué, ikuẋi?

⁹ Jakobo u ambela Falaó, uixi: Izuua ia mivu ia inhunginu iami, hama ia muvu ni makuinhi atatu; ia tolo, o iene ue ia hadi o izuua ia mivu ia muenhu uami, bhua sukile o mivu ia jitata jetu mu inhunginu iâ eme ki ngà bhiẋila-bhu.

¹⁰ Jakobo anga u benzela Falaó, u tunda bhu pholo iê.

¹¹ Zuze, anga u bhana kididi kua tatʼâ ni jiphange jê, u a bhana ni mikáu iâ ia a tokala kutungila mʼoxi ia Ijito, ua a sotela muene kididi kiambote mʼoxi ia Lamaseje, kala kia tumu Falaó.

¹² Zuze anga u kala mu dikila tatʼâ, ni jiphange jê, ni dibhata dioso dia tatʼâ katé ni anʼâ oso u a tambula konda.

Zuze u sumba oxi ioso ia Ijito, hé i kala ia Falaó

¹³ Kúdia-phe ki kua moneka mungongo ioso, kuma o nzala ia vudile kinéne; mu ixi ia Ijito ni mu ixi ia Kanana o mundu uia ni ku senduka mukonda dia nzala.

¹⁴ Zuze anga u bhongolola itadi ioso mʼoxi ia Ijito ni mʼoxi iá Kanana, mu tiliku iala kusumba; Zuze anga u bheka itadi ioso mʼonzo ia Falaó.

¹⁵ Kia zubha kubhana itadi ioso mʼoxi ia Ijito ni mʼoxi ia Kanana, akua Ijitu oso eza kua Zuze, exi: Tu bhane kúdia; tu fuila-hi bhu mesu mé? Kuma itadi ietu iabhu.

¹⁶ Zuze uixi; Bhanenu ibhaku; ngi mi sumbise kúdia mu ibhaku, se itadi iabhu.

¹⁷ Anga eza ni ibhaku iâ kua Zuze; Zuze anga u a bhana kúdia mu ibhaku ia jikabalo, ni jimbudi, ni jihombo, ni jingombe, ni ji-jumento; ua a bhana kúdia mu ibhaku muvu uoso uenhó.

¹⁸ O kiabhu muvu uenhó, ku muvu ua kaiadi, eza kua muene a mu ambela, exi: Ki tu ku dingila-kiu dingi, ngana, kuma itadi ietu iabhu, o ibhaku ietu ia bhiti kiá ku konda ia ngana ietu; kua xala-hi dingi ku mesu a ngana ietu, oko kua xala kiá ngó o mikutu ietu iene ni jixi, kuabhu.

¹⁹ Tu fuila-hi-phe bhu mesuʼé, ni etu ni jixi jetu? Tu sumbe kiá ni etu ni jixi jetu mu kúdia, ni etu ni jixi jetu tu kale tu abhika a Falaó; tu bhane ue mbutu, tu laie, ki tu fue, o ixi ni i kituke ngundu ia hatu ngoho.

²⁰ Kala kiki, Zuze anga u sumba o ixi ioso ia Ijitu, hé i kala ia ngene ia Falaó; kuma akua Ijito oso kala muthu ua sumbisa mavuʼê, kuma nzala ia di bhange ia kiaúla ia a kuata. Kienhókio ixi ioso anga i biluka ia Falaó.

²¹ Ni mundu uoso ua a bhitisa ku konda mʼoxi ioso ia Ijito, tunde ku mbambe katé ku mbambe ia mukuá, a kala abhika a ngene a Falaó.

²² Kale ngó o mavu a jinganga, mikáu iê ka i sumbu; kuma jinganga ja kexe mu tambula makànda mâ kua Falaó, anga aia ni kudia ku makànda mâ, ma a bhana jinga Falaó; kala kiki mikáu iâ ka i sumbisa.

²³ Zuze anga u ambela mundu, uixi: Ua mono, lelu nga mi sumbu, ni mavu enu angene a Falaó; amenu! mbutu iii phala mu dime dingi o mavu mu kune.

²⁴ Hinu-phe ki mu bhongolola, ioso i mua munu mu uana mu mbandu jitanu, o Falaó mu mu bhana mbandu ia katanu, o jiuana ji kala jenuʼenu; jenu ja mbutu ia mábhia, jenu ja kúdia, ni enu ni mabhata menu ni anʼenu.

²⁵ Mendu-phe exi: Eie muene ua tu bhana o muenho! tu sange ngalasa ku mesuʼé u ngana ietu, tu kale tu abhika a ngene a Falaó.

²⁶ Zuze muene ua xikisa o ngonge iii mʼoxi ia Ijitu, katé ni lelu ʼidi, kuma Falaó a mu bhane o mbandu ia katanu; mavu a jinganga ene ngó a xala, a kambe kubiluka a ngene a Falaó.

²⁷ Kienhiki Izalaiele anga u tunga mʼoxi ia Ijito, mʼoxi ia Ngozene; anga a kala-mu ni mbandu iâ, a kala mu ku di vualulula, hé a sokoloka kiavulu.

²⁸ Jakobo anga u bhanga kuinhi dia muvu ni sambuadi mʼoxi ia Ijito; kala kiki o izuua ia Jakobo, mivu ia muenhu uê, ia tena hama ia muvu ni makuinhi auana ni sambuadi.

²⁹ Thembu anga i zukama ia Izalaiele kúfua; anga uixana monʼê Zuze, uixi: Ki ngalʼiki, se nga sange ngalasa ku mesuʼé, nga ku diondo, ta lukuaku lué koxi a ditabela diami, kuma u ngi bhanga kiadi ni kidi; kana ku ngi fûnda mu Ijito kunu, nga ku diondo!

³⁰ Kizuua-phe ki ngiia ku kilu kuʼaia a tatʼetu, u ngʼambata, kunu ku Ijito u ngʼambata-ku, ua kà ngi fûnde mu mbila iami bhu kidindu kia tatʼetu. Zuze anga uitaia, uixi: Kioso ki ua zuela, kiene ki ngi bhanga. Jakobo anga u mu ambela dingi, uixi:

³¹ Loka; anga Zuze u mu lokela. Izalaiele anga u bhetamena ku mutuelu uê ua hama.