Dimatekenu 45 - O Mikanda Ikola

Zuze u dʼijidisa ku jiphange jê

¹ Bhenhobho Zuze ka tena dingi ku di kondeka ni ku di kolesa bhu pholo ia ene oso emana-bhu; anga u dikola, uixi: Athu oso a ngi tundile bhabha. Kana-phe muthu uengi ua xala-bhu kioso Zuze kia dʼijidisa ku jiphange jê.

² Anga u dila ni dízui dia suína uta ngololo ia bhingi ni akua Ijitu a mu ivu, ni ku mbanza ia Falaó a mu ivu.

³ Zuze bhenhobho anga u ambela o jiphange jê, uixi: Eme Zuze; mbé ni kidi kiene tatʼetu iú-uê hanji? Jiphange jê anga a lémbua kuzuela; a bhuuama; a sekumuka ni uoma mu kala ngó bhu pholo iê.

⁴ Zuze anga u ambela phange jê, uixi: Zukamenu kunu, nga mi diondo. Anga a mu zukama. Uixi: Eme muene Zuze, phange ienu mua mu sumbisa phala aie-nê ku Ijitu.

⁵ Kiki-phe kana kutata ngó, kana ku di bhonda, mukonda dia ku ngi sumbisa kunu; mukonda Nzambi ua bhangesa kuila eme ngi mi tuamenena kunu, phala o mienhu ienu i kale iólunde.

⁶ Kuma kua bhiti kiá mivu iiadi ni kukala nzala kiki mu ngongo; hanji kua kambe mivu itanu, ki bhua-ndu kalé kudia ki bhua-ndu kalé kubhongolola.

⁷ Kiene kia bhekesa Nzambi ku ngi tumikisa ku pholo ienu, eme nga dianga kunu phala ku mi subhikisa o mbutu ienu mu ngongo, ni ku mi bhana muenhu, ni ubhulukilu ua dikota ua madiuanu.

⁸ Kala kiki, kʼenu mua ngi tumikisa kunu, maji Nzambi; ua ngi bhange ngi tata ia Falaó, ngi ngana ia mbanza iê ioso, ngi nguvulu ia ixi ioso ia Ijitu.

⁹ Endelenu-ku kiá, muie kua tatʼetu, mua kà mu ambele, muixi: Kia zuela monʼé Zuzeʼiki; Nzambi ua ngi bhange ngi ngana ia ixi ioso ia Ijitu; kulumuka kunu u ngi sange, kana kulaleka;

¹⁰ utunge mʼoxi ia Ngozene, u ngi zukame kunu, ni eie ni anʼé ni alaúlʼé, ni jingombe jê, ni ilunga iamukuâ ia ibhaku, ni jimbongo joso kiá ji uala na-ju.

¹¹ Eme ngi ku dikile muenhomo; kuma hanji kua-nda kukala mivu itanu ia nzala; phala ku tate anga uiza mu uadiama, ni eie, ni dibhata dié dioso ni ioso kiá ia ku tokala.

¹² Ialenu-ze kuma, o mesu enu iá a ngi mona, ni mesu a ndengʼiami Bejamí, kuila o dikanu diami diene diala ku mi ambela o ima ioso iii.

¹³ Mua kà tangela tatʼetu, kijingo kiami kioso ki ngala na-kiu mu Ijitu, ni ima ioso i mua mono; mu bhange lusolo, phala o tatʼetu muize-nê kunu.

¹⁴ Anga u tuka, u di bhubhala ni ndengʼiê Bejamí u didila mu xingu iê, o Bejamí ue, kiene kia di bhubhalʼiki, u didila ue bhu maku ma phangʼiê.

¹⁵ O Zuze anga u bejala o jiphange jê joso, u dila ue ni ene; o kia zubha kubhanga kiki, jiphange jê kiene kiua kia tena kuzuela-nê.

Falaó uivua fenge ia jiphange ja Zuze

¹⁶ Anga mʼonzo ia Falaó evua hundu, exi: Jiphange ja Zuze eza; o kienhikianga Falaó ki mu uabhela, kumoxi ni akua mbèle iê.

¹⁷ Falaó anga u ambela Zuze, uixi: A mbela jiphange jé kuma, mu bhanga kiki: Longenu o jibulu jenu, mu suluke, mu vutuke ku ixi ia Kanana;

¹⁸ mu katule tatʼenu, muize-nê ni mabhata menu, muize kunu ko kuami: eme ngi mi bhana ixi ioso iauabha mʼoxi ia Ijitu, mu dia ima iambote mʼoxi ietu.

¹⁹ Eie-phe, nga ku bhana ngonge kuila mu bhanga kiki: Muia ni makalu a kunu ku Ijitu, mbé muene muendela anʼenu, ni akajʼenu, mu katule ue ni tatʼenu, muize-nê mu tu sange.

²⁰ Ki bhu kale ue kima ki mu kuatela hele ku imbamba ienu; kuma ioso iauabha kunu kʼoxi ia Ijitu, ia-nda kukala ienu.

²¹ Anʼa Izalaiele anga a bhanga kienhiki. Zuze anga u bhana o makalu kala kia tumu Falaó; u a bhana ue ni huta ia kudila mu njila.

²² Ene oso anga u a uanena izuatu ia matunda; o Bejamí ua mu bhana hama jitatu ja itadi ia phalata, ni muda jitanu ja izuatu ia makembu.

²³ Tatʼâ anga u mu tumikisa ue kiki: Kuinhi dia jibulu ja ndumbe a ji longo ni ima ioso iambote ia Ijitu, ni kuinhi dia jibulu ja akaji a ji longo ni makudia, ni tiliku ni huta phala tatʼâ kudila mu njila.

²⁴ Kala kiki sulula o phange jê, ene a katuke; muene anga u a ambela, uixi: Alukenu, ki mu di kuatele mvunda mu njila.

²⁵ Ene anga a tunda mu Ijitu, hé a banda ku Kanana, kua tatʼâ Jakobo.

²⁶ Anga a mu ambela, exi: Zuze iú-ué, muene uala kutumina ixi ioso ia Ijitu. Anga muxima uê u sota ku senduka, kuma ka ẋikina kia zuela.

²⁷ Ene-phe a mu tangela maka moso ma Zuze, ma ambela muene; o kia mono makalu a tumikisa Zuze, phala ku mu ambata, muẋima, ua Jakobo ua zangumuka dingi.

²⁸ Izalaiele anga u zuela, uixi: Kuabu! Monʼami Zuze mbé iú-ué! Ngiia, nga kà di mona-nê kiosuʼiki kiluua ngi fua.