Dimatekenu 44 - O Mikanda Ikola

Ndunge ia Zuze ia kuvutula phange jê

¹ Muene anga u tuma o kimbadi kiê, uixi: Izalesa jisaku ja mala enhá ni tiliku, ioso muene ia tena kuambata, o muthu ni muthu a mu tele dingi kitadi kiê mu saku iê ku thandu.

² O dikáu diami-phe dia phalata, u di ta mu kanu dia saku ia kasule kâ, ni kitadi kiê kumoxi. Muene u bhanga kioso kia mu tumu Zuze.

³ Kúkia ngó, mu kimene-mene, mala enhá a a sulula, a katuka, ni ene ni jijumento jâ.

⁴ Kia zubha-phe kutunda mu mbonge, kuila kiluua ngó enda dikanga, Zuze u ambela o kimbadi kiê, uixi: Ndoko! Suluka, u kaiela o mala enhó; o ki ua-nda ku a kuata, ua kà ambela, uixi: Phalahi, ua mi bhange o mbote, enu mu mu futa phulu?

⁵ Manhi o dikáu diene kunuina muadʼiami, o dikáu diê dia kuzambuila, muia nadiu? Mua te kituxi, kuma mua bhange kiaiibha.

⁶ Muene anga u a kaiela u a kuata, u zuela-nâ kioso kia mu longesa.

⁷ Ene-phe a mu vutuila, exi: Kikôla, ngana iami, tata! Phalaʼhi ua kà zuela maka kala iá? Ki mungu selevende jé a bhanga kimbamba kala kiki!

⁸ Manhi o kitadi ki tua sangele mu kanu dia jisaku jetu, ki tua tundu mu Kanana ki tuezʼetu na-kiu? Tu tena-phe kiebhi o kunhana phalata mba ulu mʼonzo ia muadiʼé?

⁹ Etʼuetú tu selevende jê; uoso u mu kuata na-diu a fue; etu-phe, tu akuâ, tu kala kiá tu abhika a muadiʼé.

¹⁰ Kuala muene, kuabhu! Kabasa enʼuenu mua kiambe; maji uoso ngi mu kuata na-diu muene ngó u kala mubhikʼa a muadiʼami; enu ki mu kala ni kituxi.

¹¹ Anga a bhanga lusolo, kala muthu u tulula o saku iê ku jumento anga u i jikula.

¹² Muene anga u kuata kusota, u andekela ku dikota, u zumbukila ku kasule; dikáu-phe anga u di bongela mu saku ia Bejamí.

¹³ Ene anga a tandujula o izuatu iâ, a longa dingi jijumentu, a vutuka mu mbonge.

¹⁴ Ni Juda ni jiphange jê anga eza dingi ku bhata dia Zuze, kuma iú-ué hanji mʼonzo; anga a dibhala mu mavu bhu inama iê, a diunda.

¹⁵ Zuze anga u a ambela, uixi: Mu bhangela-hi kimbamba kala kiki? Enu ki mu kʼijiia kuma ki ngalʼiki ngi tena muene kuzambula?

Juda u zuela ni kubelesela kuoso

¹⁶ Juda anga u zuela, uixi: Ngana iami, tata! ki tualʼiki tuila kiebhi? tu zuela-hi? tu fundila kuebhi? Nzambi ua vulumuna o kuêla kua jiselevende jé; etʼuetú, tu kala kiá tu abhika a ngana iami, ni etu kiá ni muene a mu kuata ni dikáu bhu maku.

¹⁷ Zuze uixi-phe: Kana, Kikôla! Ki ngi ẋikina ku ki bhanga; muthu uoso a mu kuata ni dikáu diami, muene u kala mubhikʼami; enu mu akuâ sulukenu ni paze kua tatʼenu.

¹⁸ Juda bhenhobho u zukama kua muene, uixi: Uaué! Ngana iami tata! Nga ku diondo ngi bhane disesa, ngi ku ambele tumaka mu mátui mé, ku ngi temene ngana iami, kuma ki ualʼokio ua soko ni Falaó.

¹⁹ Kioso eie, ngana, ki uebhuile selevende jé, uixi: Muala ni tatʼenu, muala dingi ni phangʼienu?

²⁰ Etu tua ku vutuila, ngana iami, tuixi: Sai tatʼetu, ua kuka kiá, ni monʼê ua kasule, a mu vuala mu ukukilu uê; mukuá, mu mama imoxi, uafu; o ku ana a manhʼâ muene ngó ua subhuka-ku, o tatʼâ iu ua mu zola.

²¹ Eie-phe uambelele selevende jé, uixi: Ngi bhekedienu-nê phala ngi mu mone mesu.

²² Etu-phe, ngana, tua kuambelele, tuixi: O kaialʼoko, ki ka tena kúxia tatʼâ; kuma se u xia tatʼâ, tatʼâ ufua.

²³ Kienhokio-phe uambela selevende jé, uixi: Se kasule kenu mu kamba kuiza-nê, eme ki mungu dingi mu ngi mona pholo.

²⁴ O kioso ki tua vutuka kua selevende ié, tʼetu, tua mu kundu, ngana, o kizuelu kié.

²⁵ Tatʼetu anga u tuambela, uixi: Ndenu-phe dingi mu tu sumbile kakudia.

²⁶ Tuixi-phe: Ki tu tena kuia-ku; maji se o kasule ketu tuia-nê, tuia; kuma diiala diala kuenhoko ki tu tena ku mu mona pholo, se kasule ketu iú, tua kambe kukala-nê.

²⁷ Selevende ié, tatʼetu, anga u tuambela, uixi: Enu muejiia kuma muhatʼuami ua ngi vualela ana kiiadi;

²⁸ o dikota, kizuua kia tundu bhu bhata, uendelela katé ni leluʼidi, nga lémbua ku mu mona mesu, ngixi a mu kuata ku kiama.

²⁹ Se ue mu ngi tambula dingi iú ua xala-bhu, anga ku mu bhita kima kiaiibha, jimvi jami mua-ndu ji bheka ni kikote kʼualunga.

³⁰ Kiki-phe se ngi bhiẋila kua selevende ié, tatʼetu, o kaiala ki ngeza-nê, muene ua-nda kufua; mukonda o menhu uê ua di jikita ni muenhu ua monʼê.

³¹ Uila ngó u tu mona, o kaiala ki tueza-nê, u fua muene! Etu-phe, tu selevende jé, tu kala tu athu tua bheka o jimvi ja tatʼetu ni kikote kuʼalunga.

³² Kuma eme bhabha, ngana, ngi mubhikʼê, eme-muène ngi ngûnji, nga di ximbika kua tatʼetu, ngixi: O ki ngi kamba kuiza ni ku ku bhekela-nê, ngi kala ngi mukua kituxi kié ku izuua ioso.

³³ Kala kiki-phe, nga ku diondo, ngana iami, eme ngi mubhikʼé ngi xale bhu kididi kia kaialʼaka, muene a bande kua tatʼetu kumoxi ni phange je.

³⁴ Kuma o tatʼetu ngi di mona-nê kiebhi o pholo, se o kaialʼaka ua xala? Phala ki ngi mone dingi o lamba dia-nda kuiza kua tatʼetu.