Dimatekenu 43 - O Mikanda Ikola

Jiphange ja Zuze a kulumuka dingi mu Ijitu

¹ Nzala anga i vula kinéne mu ngongo.

² Anga ki bhita kuila, mu kubhanga izuua, kia zubha kudia tiliku ioso ia tundu na-iu mu Ijitu, tatʼâ u a ambela, uixi: Ndenu dingti, mu tu sumbile kakudia.

³ Bhenhobho Juda u mu kumbulula, uixi: Muene diiala uala-ku ua tu tendelela kiavulu, uixi: Se mu kamba kuiza ni kasule kenu, eme ki mu ngi mono dingi pholo.

⁴ Eie se u tu bhana Phangʼietu ni tuila-nê kumoxi, tu kulumuka, ni tu ku sumbila o kúdia;

⁵ se nguaié-phe ku tu bhana-nê, ki tuii-ku; kuma diiala dienhódio ua tu ambela muene, uixi: Se mu kamba kuiza ni kasule kenu, eme ki mu ngi mono dingi pholo.

⁶ Izalaiele uixi: Mua ngi bhangela-hi phulu iosuʼiii, tata! kutangela o diialʼódio kuma muala dingi ni phangʼienu?

⁷ Kuala ene: Muene ua tu tokuesa, ua tu ibhula etu ni jindandu jetu, uixi: Tatʼenu hanji iu-é? Enu muala dingi ni phangʼienu? Etuʼetu tua mu tangela kala kia tu ibhula muene; etu tueje ku kʼijiia kiebhi kuma ua-nda kuila, kale phangʼienu muiza-nê?

⁸ Bhenhobho Juda anga u ambela Izalaiele, tatʼâ, uixi: Kaiala ngi bhane-nê eme, tu balumuke, tuietu; phala tu laie, mbé ki tu fue, ni etu ni eie, ni anʼetu.

⁹ Eme muene nga di ximbika bhu kididi kiê; ko kuami eme ku u muʼibhula; se nga kambe kuiza-nê ni ngi mu bhakula bhu pholo ié, ngi kala ngi mukua kituxi kié katé ku hádia ni hádia.

¹⁰ O kukuata jiphata kiki, kua tu lalekesa, hinu tuezʼetu kiá o njila ia kaiadi.

¹¹ Bhenhobho Izalaiele, tatʼâ, anga u a ambela, uixi: Se kia bhingi kiene ki bhita, bhangenu kiki: Ambatenu ku imbamba ioso ia ixi kunu o ima ioso i tela kuenhoko mu imbamba ienu, nda o diiala dienhódio mu mu bhekele ujitu, ni tu bálsamu, ni tu uiki, ni ima ia mazumba, ni mira, ni jinoze ja pistaxo, ni jiamendoua;

¹² o itadi ienu i kala mu luiadi i mu kuata bhu maku, ni ioio ia vutukile ku mizumbu ia nzeke jenu muia na-iu dingi, mu i ambata bhu maku enu, amoxi kutondala kua tondala.

¹³ Ndengʼienu ue mu ambatienu, mu balumuke, muie dingi ku diialʼódio;

¹⁴ o Nzambi, Muteni-a-Ioso, a mi bhane kiadi bhu pholo ia diialʼódio, phala a mi ehele kuiza ni phangʼienu iamukuâ, ni Bejamí. Eme kiá se kua ngi bhingi anʼami oso a ngi bua-nâ, kuabhu, ngi bhanga dingi kiebhi.

Jiphange ja Zuze a dia-nê ku meza

¹⁵ Mala enhó anga ambata o ujitu ua tange, ni kitadi kiâ kiala mu luiadi, ni Bejamí a mu ambata; anga a katuka, a kulumuka mu Ijitu, eza, emana dingi bhu pholo ia Zuze.

¹⁶ O Zuze kia zubha kumona kuila Bejamí eza-nê, u ambela o kimbadi kiê, iú ua mu tambuila konda ia dibhata, uixi: Mala iá ndé-nâ ku bhata, u jibhe kibhaku, u bhange kúdia; kuma enhó lelu nga-nda kudia-nâ kumoxi mu mediia.

¹⁷ Muene anga u bhanga kala kia mu tumu Zuze; mala iá u a bheka ku bhata dia Zuze.

¹⁸ Maji ene-phe kia mono a a bheka ku bhata dia Zuze, uoma ua a kuata, exi: Nga fika mukonda dia kitadi kia vutukile mu jisaku jetu, thembu i tua diangele kuiza, kiene kia tu bhekela ku bhata diê, phala a tu die milonga, nʼa tu lundame ku thandu, a tu bhange ku kala tu abhikʼê, ni ku tu bhunda o jijumento jetu.

¹⁹ Anga a zukama kua kimbadi kiaʼnzo ia Zuze, a mu zuelesela bhu kanga, bhu muelu,

²⁰ exi: Ngana iami, tata! tuejile kiá njila ia dianga mu sumba kúdia.

²¹ Mu kuvutukisa-phe bhu kilômbo bhu tua zekela, tuedi tu jikula mu jisaku jetu, tu tukumuka itadi ietu ioso kala muthu tua ki sange mu saku iê, kia tenena muene ku pezo; maji tueza nakiu dingi, kiki ki tua kuata bhu makuʼetu.

²² Ni kitadi kiamukuâ tueza na-kiu kusumba o kúdia; ki tu mu ijiia uoso ua te o kitadi kietu mu jisaku jetu.

²³ Muene-phe u a ambela, uixi: Tululukenu, ki mu kale ni uoma. Nzambi ienu o Nzambi ia tatʼenu, muene ua mi tela o mbole ia jimbongo mu jisaku jenu; kitadi kienu nga ki tambuidiʼê. Anga u a bhekela Ximinhá bhu kanga bhuala ene.

²⁴ Kimbadi anga u a bheka mʼonzo ia Zuze, u a tuma kubokona, u a bhana menha a kusukula o inama; ua bhana ue ni ngânda ia jijumento jâ.

²⁵ Ene anga a iudika o ujitu uâ, phala Zuze, kia-nda kuiza ku mediia; kuma evu exi a-nda ku di mosala muenhomo.

²⁶ Zuze-phe kioso kieza ku bhata, ene a mu bhakuila o ujitu uâ ueza na-u mʼonzo muenhomo, anga a mu diundila, a tuta muene jipholo bhoxi.

²⁷ Muene anga u a kunda se ala kiambote, uixi: Tatʼenu uala kiambote, o muadiakime mua mu tangeʼó? Iu-é hanji ku muenhu?

²⁸ Ene a vutula, exi: Selevende ié, tatʼetu, uala kiambote; iú-é hanji ku muenhu. Anga a bhetama dingi, a diunda.

²⁹ Zuze kia bhetula mesu, u mona Bejamí, phangʼiê, mon ʼa mamʼâ uixi: Muene kasule kenu iú, mua ngi tangela-nê? U mu ambela, uixi: Nzambi a ku zediuise, monʼami.

³⁰ Zuze anga u bhanga lusolo, kuma mu muxima mua muiza dingi dilamba, diavulu kia mono phangʼiê; u sota kididi bhua didila; uia hanji mu xilu dié, u didila muenhomo.

³¹ Kia zubha kudila, u sukula mu pholo, anga u tunda; ua di kolokotesa ni ku di kondeka, uixi; Tenu kúdia ku meza.

³² Anga a mu zalela ni kididi kiê, ene ni kididi kiâ, akua Ijitu ue ala kudia-nê, a di kalela ni kididi kiâ; kuma akua Ijitu kene mu dia meza amoxi ni jihebeleu, kijila kiâ.

³³ Mu ku a xikika ku meza bhu pholo ia muene, phande-kumbi ni kididi kiê, ene oso a a sokesa kioso kia di kaiela mu ku a vuala; mala enhá anga a di iala mudiâ, hé a diuana kiavulu.

³⁴ Anga u a uanena makânda ku makudia a mu tela muene; dikânda dia Bejamí-phe, dia mu tela, diedi kala dia mala atanu a di bundu kumoxi. Anga a nua, a sanguluka kumoxi ni muene.