Dimatekenu 42 - O Mikanda Ikola

Jiphange ja Zuze a kulumuka mu Ijitu

¹ Jakobo kia mono kuma sai tiliku mu Ijitu, Jakobo u ambela anʼê a mala, uixi: Muala ku di talela-hi ngó kienhiki mudienu?

² Uixi dingi: Ivenu-ze, ngevu kuma sai tiliku mu Ijitu. Kulumukenu-phe mu Ijitu mua kà tu sumbile-ku tiliku muenhomo, phala tu laie, mbé ki tu fue.

³ Kienhókio, ku jiphange ja Zuze, anga dikuinhi a kulumuka mu sumba tiluku mu Ijitu.

⁴ O Bejamí-phe, kiubha kia Zuze, Jakobo ka mu tumu kumoxi ni jiphange jê, kuma uambe, uixi: Sumba ku mu bhita kima kiaiibha.

⁵ Kienhókio anʼa Izalaiele anga ejiia kumoxi ni amukuâ eza mu sumba kúdia, mukonda ku Kanana ue kuala nzala.

⁶ Zuze-phe, uala nguvulu iaʼxi ioio; muene uala kusumbisa athu oso o makudia. Jiphange ja Zuze anga a tula, a mu diundila ni jipholo ja tula ku mavu.

⁷ Zuze kiedi suí, u mona o phange jê, ua ejiia muene kiambote; maji ua di bhangesa kala muthu uengi, anga u a zuelesa ni kusuína, uixi: Enu mua tundu kuebhi? Ene exi: Tua tundu mʼoxi ia Kanana; tueza mu sumba kúdia.

⁸ Zuze-phe uejiia kiambote o jiphange jê, maji ene a lémbua ku mu ijiia muene.

⁹ Bhenhobho Zuze ua lembalala o jinzoji jê, jʼanjiuile kua ene, anga u a ambela, uixi: Mu ilolo, muende ni unguma, mueza kulónda ixi mukonda dia kubhela kuê ku ia bhele.

¹⁰ Kuala ene: Kana tata, ngana ietu, selevende jê eza mu sumba ngó kúdia.

¹¹ Etuʼoso tu ana a tata imoxi; tu athu a kidi muene, ki tuende ni unguma ua kulonda ixi, kana!

¹² Muene-phe u a ambela, uixi: Kana, enu mueza kulónda ixi mukonda dia kubhela kuê ku ia bhele.

¹³ Kuala ene: Selevende jé, tu jiphange, kuinhi dia muthu ni kiiadi, tu ana a tata imoxi, tatʼetu uala mʼoxi ia Kanana. Kindalʼiki o kasule ketu ua xala ni tatʼetu, o mukuá kene-ku dingi.

¹⁴ Zuze uixi: Kiene ki ngambe, kiene; ngixi mu jinguma;

¹⁵ bhene bhu nga-nda ku mi muena o kidi: Kale Falaó ki muthu ua muenhu! Enu bhabha ki mu tundu-bhu, katé ki ngi mona kasule kenu, bhabha!

¹⁶ Mu katula muthu mudienu, aie, a takane kasule kenu, maji enu mu xala ku upelezu, phala ku mi mona se muala ni kidi; o ki mu kamba ku ki bhanga, kala Falaó ki muthu ua muenhu, mu alondi muene, mueza kulonda o ixi.

¹⁷ Anga u a ta mu kaleia, ene oso, a bhanga-mu izuua itatu.

¹⁸ Zuze anga u a tangela, kizuua kia katatu, uixi: Bhangenu kienhiki, phala mu laie; kuma ngi mukua uoma ua Nzambi.

¹⁹ Se mu athu a kidi muene, bhu kale phange imoxi a xale ku ukuikile (upelezo) mu kaleia; enu-phe ndenu kà bhekienu o tiliku, mukonda dia nzala ku mabhata menu.

²⁰ Hádia-phe muiza ni kasule kenu, ngi mu mone mesu; phala ngi mi mone kuma mua zuela kidi, o mu kubhanga kiki, ki mu fu dingi. Anga a ki bhanga kienhiki.

²¹ Anga a zuela mudiâ, exi: Ni kidi, etu tuala tu êdi muene; tua bele mukonda dia kiki ki tua bhangele Phangʼietu; tua muene malamba a muxima uê, iú tu dionda, maji nguetu kuivua; kiene kia tu ijiia o uíndua uosʼú.

²² Lubene anga u a ambela, uixi: Eme ki ngi mi tangelele-kiu, ngixi mona ki mu mu te kituxi? Enu-phe ki mu ẋikinine kuivua! Leluʼidi-phe mua mono, mulonga ua tuiza ua manhinga mê.

²³ Ene-phe ka kʼijiia kuila Zuze ua evu kia zuela; kuma bhu kaẋi kâ sai muzumbu uemana-bhu ku a lomboluela.

²⁴ Zuze anga u tunda-bhu hanji, u kala mu dila. Kithangana u a vutukila dingi, anga u sola-bhu Ximinhá mudiâ, u mu kutisa bhu mesuʼâ muene.

Jiphange ja Zuze a vutuka ku bhata diâ

²⁵ Zuze anga u tuma kuizalesa o nzeke jâ ni tiliku, ni kuila ue kala muthu kitadi kiê a mu tela-kiu dingi mu saku iê, ni ku a bhana huta ia kudila mu njila; anga a a bhanga kienhiki.

²⁶ Ene anga a longa o jijumento jâ ni imbamba ia tiliku, hé a katuka.

²⁷ Kutula bhu kilômbo-phe bhuoso bha-nda kuzeka, bhu kala muthu mudiâ u jikula o saku iê, phala ku katula kúdia kua kubhana o jumento iê, u tukumuka kitadi kiki kiala muene ku thandu muy saku iê.

²⁸ Anga u ambela phange djê, uixi: Kitadi kiami a ngi vutuila-kiu; kiki, nga ki sange mu saku iami. Bhenhobho miẋima iâ anga i botomoka! A di talesa mudiâ ni kuteketa, exi: Nzambi ua tu bhange dingi kiebhi?

²⁹ Anga enda, a bhiẋíla kua tatʼâ Jakobo mʼoxi ia Kanana, a mu kunda ioso ia bhiti na-iu, exi:

³⁰ O ngana, nguvulu iaʼxi koko, ua teme mu ku tu zuelesa, ua tu mono tu alondi tueza mu lónda o ixi.

³¹ Maji etu tua mu ambela, tuixi: Tu athu a kidi muene; ki tu alondi, kana;

³² tuala tu jiphange, kuinhi dia muthu ni kiiadi, tu anʼa a tata imoxi; sai phange ietu kene-ku dingi, maji kasule ketu iú-ué, kindalʼiki ua xala ni tatʼetu mʼoxi ia Kanana.

³³ Muene-phe, nguvulu iaʼxi koko, ua tu ambela uixi: Bhene kiá bhu ngi mʼijidila se mu athu a kidi. Mu xisa phange ienu imoxi ni eme kunu, enu muambate tiliku ia kubhânga o nzala ku mabhata menu, phala mu ienunu.

³⁴ Hádia-phe muiza ni kasule kenu, ngi mu mone mesu; bhene bhu ngi mʼijidila kuma ki mu alondi, kana, mu athu a kidi; kiene ue ki ngi mi bhana phangʼienu, phala mu te mauenji menu mʼoxi mumu.

³⁵ Anga ki bhita kuila, o kieza mu sukumuna-phe o jisaku jâ, muthu ni muthu o kadibunda kê ka kitadi u ka sanga mu saku iê; ni ene-phe ni tatʼâ, kia mono mabunda ma kitadi, uoma ua a kuata.

³⁶ Bhenhobho, Jakobo, tatʼâ, anga u a ambela, uixi: Anʼami mua-ndu ngi zubha-nâ; Zuze kene-ku dingi, o Ximinhá bhabha kala-bhu, muandala mu ngi tambula dingi Bejamí. Ima iosuʼiii ieza ku thandu diami!

³⁷ Maji Lubene anga u ambela tatʼâ, uixi: Anʼami aiadi a mala iá, u a jibhʼé, se ngi kamba ku ku bhekela-nê; ngi bhane-nê eme, u mone ki ngʼiza-nê.

³⁸ Kuala muene-phe: Monʼami ka-nda kuia-ku, se mua kulumuka dingi; kuma phangʼiê uafu kiá, muene ngó ua xala-ku; se ku mu bhita kima kiaiibha mu njila i muila, jimvi jami mua-nda ji bheka ni kikote kuʼalunga.