Dimatekenu 41 - O Mikanda Ikola

Zuze u jimbulula jinzoji ja Falaó

¹ Anga ki bhita kuila, ki bhua zubha kubhita mivu iiadi ia muvimba, Falaó uanjiua nzoji: U mona kuma uemana bhu mbandu ia honga ia Nilo.

² Suí, ku honga ia menha, u mona mua mu tunda sambuadi dia ngombe, ja di sanze ji ja nete kiambote; anga ji kala mu kudia iangu ia uisu bhu mbandu ia honga.

³ Kithangana, u mona dingi sambuadi dia ngombe jamukuâ ja kaiela akuâ mu kutunda mu menha, jaiibha, ja bhele ni jene holongonzʼô, anga jʼimana kumoxi ni akûâ bhu mbanduʼa honga.

⁴ Bhenhobho, jingombe jaiibha jí ja bhele, ji dia akuâ adisanze ia anete. Falaó anga u thatuhumuka ku kilu.

⁵ Kathangana uia dingi ku kilu, uanjiua nzoji ia kaiadi: U mona sambuadi dia mítue ia masa a sabhuka ku kixina kimoxi, a bumbu, auabha.

⁶ Kithangana, u mona kua sabhuka dingi sambuadi dia mítue ia masa a tolo, a xoueta ni kitembu kia thunda, a kaiela akuâ mu kusabhuka.

⁷ Masa ma tolo anga ma minha akuâ a bumbu, a uabha. Falaó anga u thathumuka ku kilu, nzoji.

⁸ Kúkia ni kimene, muxima ua mu sakalala ni jiphata; anga u tuma kuixana jinganga, ni jinjimu joso ja Ijitu; Falaó anga u a tangela nzoji jê; ki bhuala-phe muthu ua tena ku ji jimbuluila Falaó.

⁹ Kopelu ia dikota anga u ambela Falaó, uixi: Nga xinganeka dingi ituxi iami, tata, kizuua kia lelu:

¹⁰ Kioso Falaó kia di zangala ni jiselevende jê, eme ia a ngi tele ku upelezu mʼonzo ia kabhitangu ka kilangidilu, ni eme ni mukuetu padelu ia dikota.

¹¹ Anga tuanjiua nzoji, usuku umoxi, ni eme ni muene, kala muthu ni nzoji iê ni dijimbuluilu dié.

¹² Anga tu kala muenhomo ni munzangala, hebeleu, selevende ia kabhitangu uala ku kilangidilu; anga tu mu tangela o nzoji jetu, muene iu ua tu jimbuluila-ju; kala muthu ni nzoji iê ua mu sokesa ni dijimbuluilu diê.

¹³ Mu kubhanga izuua-phe, kioso kia tu jimbuluila, kiene muene kia bhiti; eme ua ngi te dingi ku ufunu uami, mukuetu a mu nhenga.

¹⁴ Bhenhobho Falaó u tuma kuixana Zuze, a mu katula ni lusolo mu kaleia; muene u di bhuta o muezu, u zuata izuatu iengi, hé u bhiẋila kua Falaó.

¹⁵ Falaó anga u ambela Zuze, uixi: Eme ngʼanjiua nzoji, maji ki bhuala-phe muthu ua tena ku i jimbulula; eie-phe nga kuivu, exi se uevu nzoji, ua soko-bho ku i jimbulula.

¹⁶ Zuze anga u vutuila Falaó, uixi: Kiókio ki eme ngala nakiu; Nzambi muene u bhana kua Falaó o dijimbuluilu di tululuisa.

¹⁷ Falaó anga u tangela Zuze, uixi: Ku nzoji-ze ngʼemena bhu mbanduʼa kibumu kia honga ia Nilo;

¹⁸ ngi tukumuka mu menha mua mu tunda sambuadi dia ngombe, ja nete ji ja di sanze kiambote, ja iuka kiavulu ku mesu, anga ji kala mu kudia iangu iauisu bhu mbandu ia honga.

¹⁹ Kithangana ngi mona dingi sambuadi dia ngombe jamukuâ ja kaiela akuâ mu tunda mu menha; jiji-phe o kuiibha kuvula ni kubhela ni jene bheletu, kiluua ngi mona jingombe jaiibha kiki mʼoxi ioso ia Ijitu.

²⁰ Jingombe jiji jaiibha jí ja bhele, anga ji dia sambuadi dia akuâ a nete, a tuamena kutunda.

²¹ O ki ja zubha ku minha akuá, ku tena ku kʼijiia kuila jadi, ji ja minha muene akuá; kuma o kuiibha kuâ kuene kuʼókulu kueniʼê. Bhenhobho nga tono.

²² Kia bhiti iii, ngi mona dingi ku nzoji, sambuadi dia masa ma sabhuka ku kixina kimoxi, ma bumbu, ma uabha;

²³ maji kithangana, ngi mona dingi sambuadi dia masa ma xoueta, ma tolo, mʼaúka ni kitembu kia thunda, ma kaiela ku akuá mu kusabhuka.

²⁴ Masa ma tolo anga ma minha sambuadi dia masa ma uabha; kienhiki eme nga ki tangela jinganga, maji ki bhuala muthu ua tena ku ngi jingunuina-bhu kima.

²⁵ Zuze anga u ambela Falaó, uixi: Nzoji ié, sobha, imoxi iene iala-bhu. Nzambi kima kia-nda kubhanga, ua tumu ku kʼijidisa Falaó.

²⁶ O sambuadi dia ngombe ja uabha, kifua sambuadi dia mivu; o sambuadi dia masa ma uabha, sambuadi dia mivu ue; nzoji ieniʼê imoxi.

²⁷ Sambuadi dia ngombe ja bhele jí ja iibha, ja kaiela akuâ mu kutunda, kifua sambuadi dia mivu; ni sambuadi dia masa ma tolo, mʼaúka ni kitembu kia thunda, sambuadi dia mivu ia nzala.

²⁸ Kiene kiá ki ngʼambe kua Falaó, ngixi: Kima kia-nda kubhanga Nzambi, ua tumu ku kʼijidisa Falaó;

²⁹ Ijiia na-iu, kuma kua-nda kuiza sambuadi dia mivu ia idima ia vulu mʼoxi ioso ia Ijitu.

³⁰ O ki i zubha kubhita, hinu ku kaiela sambuadi dia mivu ia nzala; katé ni thembu ioso ia bhiti ia kuvula idima, athu a-nda ku i jimba mʼoxi ia Ijitu; o nzala ia vulu ia-ndo kala-ku, iia ni kujikinisa oxi.

³¹ O kuxinganeka ngó kuikuta mba nzungule ia makudia, mu ngongo ki kià kala-mu dingi, mukonda dia nzala ia-nda kuiza-ku, kuma i kala muene kiaúla.

³² O ki ua mono, Falaó, nzoji a mu anjiuisa-iú luiadi, mukonda kua Nzambi kiókole kiá, Nzambi ka-ndu nanga dingi mu ku ki bhitisa.

³³ Kala kiki, Falaó a sote muthu uadimuka, uala ni kilunji, a mu bhane kijingo kia kutambula konda ia ixi ia Ijitu.

³⁴ Falaó a bhange dingi kiki: A sole jinguvulu mʼoxi ioso a kala mu tambula o mbandu ia katanu ku idima ioso ia Ijitu, mu sambuadi dia mivu ia kuvula o idima.

³⁵ Mbé a bhongolole makudia kioso kiala-ku mivu iambote ia idima ia mu kuiza-ku, a kale bhoxi dia lukuaku lua Falaó, ende ni kulunda o tiliku, a i bhake mu jimbonge kuma huta.

³⁶ O kudia kuku ku kale futa ia bhakesa, phala athu kubindumukina ku pholo, ku sambuadi dia mivu ia nzala ia-nda kuiza mu Ijitu, phala ixi ioso ki ifue ni nzala.

Zuze a mu bhana kijingo kia nguvulu ia Ijito

³⁷ Kia zuelʼiki, anga a ki mona kuila kiauabha, ni ku mesuʼa Falaó, ni ku mesuʼa akua mbèle iê.

³⁸ Falaó anga u ambela akua mbèle iê, uixi: Muthu tu mu sanga kuebhi, u soka ni muenhú, muthu a mu tunga kuala nzumbi ia Nzambi?

³⁹ Kienhókio Falaó anga u ambela Zuze, uixi: O ki kiedi Nzambi ua ku idikiza ima ioso iii, kana-ku muthu uadimuka uala ni kilunji kala eie.

⁴⁰ Eie muène-muene ua-ndu tambula konda ia dibhata diami; kioso ki u zuela eie, o mundu uami uoso kiene kia tumaka; eme ngi ku tunda ngó mu kuila emi-eme ngi muenexi nga xikama bhu kiandu.

⁴¹ Falaó anga u ambela dingi Zuze, uixi: Ua mono-ze, nga ku bhana kijingu kia kutumina (ni kutambula konda) ia ixi ioso ia Ijitu.

⁴² Bhenhobho Falaó anga u katula o nela iê ia sineta mu mulembu, u i ta mu mulembu ua Zuze, u tuma ku mu zuika izuata ia linho ia fina, u mu ta lubhambu lua ulu mu xingu;

⁴³ U mu ambela kusambela mu dikalu dia kaiadi, dia bhabhelela ku dikalu diê-muène; o muala kuijiia, mundu uoso a dikola: Fukamenu! Kienhiki ua mu te ku ungana ua kutumina ixi ioso ia Ijitu.

⁴⁴ Falaó anga u ambela Zuze, uixi: Eme-eme ngi Falaó; maji eie-phe ki ualʼokio, se eie u kamba ku ki zuela, kana muthu u zenga lukuaku mba u zangula kinama, mʼoxi ioso ia Ijitu.

⁴⁵ Falaó anga u luka Zuze dijina dia Zafenate-Paneia anga u mu bhana muhatu, Azenate, monʼa Poti-fela, nganga ia One. Zuze anga u tunda mu kunhunga ixi ioso ia Ijitu.

⁴⁶ Zuze u kala mu makuinhi atatu a muvu kiemana bhu pholo ia Falaó, muenexiʼa Ijitu. Zuze anga u tunda bhu pholo ia Falaó uia mu kunhunga oxi ioso ia Ijitu.

⁴⁷ O mavu anga ema muene kia nzungule mu sambuadi dioso dia mivu ia idima.

⁴⁸ Muene anga u bhongolola idima mu sambuadi dia mivu ioio, mʼoxi ia Ijitu, anga u i lunda mu jimbonge; o idima ioso iá matutu, u i lunda mu mbonge ioso iala bhua zukama ni mikáu ienhoio.

⁴⁹ Kala kiki, Zuze ua bhongolola tiluku iavulu muene, kala kisekele bhu ndundu ia kalunga, katé ka tena dingi ku i kuata konda, mukonda dia kuvula kinéne.

⁵⁰ Kuila o mivu ia nzala kiluua i bhiẋila, Zuze u kala ni anʼâ aiadi a mala, a mu vualela Azenate, monʼa Poti-fela, nganga ia One.

⁵¹ Monʼê ua phande-kumbi u mu luka Manasa; kuma uambe uixi: Nzambi ua ngi jimbisa o hadi i nga tale, ni dibhata dioso dia tatʼetu.

⁵² Kiubha kiê anga u mu luka Ifalaíme: kuma uambe uixi: Nzambi ua ngi bhangesa kuvula o muiji mʼoxi iami ia ubhika.

⁵³ Kienhókio o sambuadi dia mivu ia kuvula idima, mʼoxi ia Ijitu, anga ibhua kubhita.

⁵⁴ Anga a mateka ku sambuadi dia mivu ia nzala, kala kia tangele Zuze; ku jixi joso anga ku kala nzala, maji mʼoxi ia Ijitu-phe kudia sai.

⁵⁵ O kia kuata nzala ni mʼoxi ia Ijitu-phe, mundu uoso a dikola kua Falaó, mu bhinga kúdia; Falaó anga u ambela akua Ijitu oso, uixi: Ndenu kua Zuze, o kioso kia mi ambela muene kubhanga, bhangenu-kiu.

⁵⁶ O kioso kiá nzala ki ia bhiti ku jixi joso mu ngongo, Zuze ua jikuisa o inganja ioso mua bhakele o makudia, anga a kala mu a sumbisa ku akua Ijitu, mukonda o nzala ia jiji mʼoxi ia Ijitu.

⁵⁷ Ku jixi joso, anga enda ni kuiza mu Ijitu kua Zuze mu sumba tiliku, kuma nzala ia jiji ue ku jixi joso.