Dimatekenu 40 - O Mikanda Ikola

Zuze mu kalela u jimbulula jinzoji

¹ Mu kubhanga izuua, kia zubha kubhita imʼii, kopelu ia muenexiʼa Ijito, ni padelu iê, a ta kituxi kua ngana iâ, muenexiʼa Ijitu.

² Falaó anga u kala ni njinda ia jifixiiadi jê jiiadʼiji, kopelu ia dikota uala ku pholo, ni padelu ia dikota uala ku pholo.

³ Anga u a kutisa, a a ta mʼonzo ia kabhitangu ka kilangidilu, mu kaleia muoso mua te Zuze.

⁴ O kabhitangu ka kilangidilu anga u a bhana Zuze ku a tambula konda ni ku a sedivila; anga a bhanga izuua ia vulu muʼaleia.

⁵ Anga anjiua nzoji kiiadi kiâ, muthu ni iê usuku umoxi, kala nzoji ni dijimbuluilu diê, ni kopelu ni padelu ia muenexiʼa Ijitu ala ku upelezo mu kaleia.

⁶ Zuze anga uiza kua ene mu kimene, o kia a tongolola, u a mona ene oso a di suuata.

⁷ Anga uibhula o fixiiadi ja Falaó aia-nê kumoxi ku upelezo mʼonzo ia Ngana iê, uixi: Lelu mua di suuatela-hi kiki, pholo jenu ja luuala?

⁸ Anga a mu ambela, exi: Mukonda tuanjiua nzoji, muthu ki tu mu mono ua tena ku tu jimbuluila-iu. Zuze anga u a ambela, uixi: Manhi o kujimbulula ki kuangene kua Nzambi? Ngi tangedienu-iu, nga mi diondo.

⁹ Kopelu ia dikota, anga u tangela Zuze nzoji iê, uixi: Ku nzoji nga mono kixina kia muvide, ngʼemana nakiu kiki;

¹⁰ O ku muvide, anga ku kala thangu jitatu; mu kutala ngi mona kala kuala kubuingita tu mísala, kua bhana ítulu, kua tundu ilende ia ji-uva jabhi kiá;

¹¹ bhu maku-phe nga kuata kopho ia Falaó; anga ngi bhana o kopho kua muene Falaó.

¹² Zuze anga u mu ambela, uixi: Dijimbuluilu diê dienhidi: Thangu jitatu, izuua itatu;

¹³ bhua kà bhitila izuua itatu, Falaó ua-nda ku ku bhetula mútue, (ua-nda ku ku eha), u ku ta dingi ku kijingo kié; ua kala dingi mu kubhana o kopho kua Falaó, kala ki ua kexi kubhanga mʼokulu, ki uala u kopelu iê.

¹⁴ Maji-phe eme u ngi ta muxima, kioso ki ua kà bhanduluka, u ngi kuatele henda, nga ku diondo, u ngi zuelele kua Falaó, phala a ngi katule mʼonzʼumu;

¹⁵ kuma ni kidi kiene, eme a ngi nhana mʼoxi ia Jihebeleu; ni kunu ku ngeza, ki nga bhange-ku kima kia tokala ku ngi ta muʼaleia.

¹⁶ Padelu ia dikota, kia mono kuma dijimbuluilu dia uabha, u ambela ue Zuze, uixi: Eme ku nzoji iami, nga mono mihâmba itatu ia kuambatela jimbolo, i nga te bhu mútue.

¹⁷ O bhu muhâmba ua thandu-phe, bhuala makudia oso kiá a ufunu ua padelu, u ngala kubheka kua Falaó; jinjila hê ji kala mu ku a dia bhu muhâmba u ngʼambata bhu mutúe.

¹⁸ Zuze anga u kumbulula, uixi: Dijimbuluilu diê dienhidi: O mihâmba itatu, izuua itatu.

¹⁹ Bhua kà bhitila izuua itatu, Falaó ua-nda ku katula o mútue ku mukutu, u ku nienga mu muẋi, o xitu ié anga i diua ku jinjila.

²⁰ Mu kubhiẋila-phe bhu kizuua kia katatu, kizuua kia Falaó kubhanga mivu ia ku mu vuala kuê, u bhanga fesa ia jiselevende jê joso; anga u bhetula mútue ua kopelu ia dikota ni padelu ia dikota mu, axaxi ka jiselevende jê.

²¹ Kopelu anga u mu ta dingi ku ufunu uê, u kala mu kubhana o kopho kua Falaó.

²² Padelu ia dikota-phe, u tuma ku mu nhenga, kala kia a jimbuluila Zuze.

²³ Kopelu ia dikota-phe, Zuze, ka mu te dingi muxima, inda ua mu jimbíê kiá muene.