Dimatekenu 4 - O Mikanda Ikola

Kaini u jibha Abele

¹ Adá anga u ijiia mukajiʼê Eva, muene anga u imita, u vuala Kaini, anga u zuela, uixi: Nga kuata diiala, a ngi bhana-nê kuala Ngana.

² Anga u vuala dingi Abele. Abele anga u kala mubidi ua jimbudi, Kaini-phe kidima-kaji.

³ Mu kubhanga izuua, Kaini anga u bheka idima mu bhanga ujitu kua Ngana.

⁴ Abele ue u bheka ku anʼa jimbudi mu kilunga kiê oso a dianga ku a vuala, ni ku misuinhi ianete. Ngana anga u suua Abele ni ujitu uê,

⁵ Kaini-phe, ni ujitu uê, ka mu suu. Kaini anga njinda i mu kuata, u sonoka o pholo.

⁶ Ngana anga u ambela Kaini, uixi: Eie njinda iahi i uala na-iu? ua sonokena-hi o pholo?

⁷ Se u bhanga kia-mbote, manhi ka ku ẋikina? Ki uila-phe u bhanga kiaiibha, kituxi kia ku batamena bhu muelu; kia ku hamena muene, maji eie ua tokala u ki tumina.

⁸ Kaini anga u zuela ni phangʼê Abele, uixi: Tuie ku mukáu. O kioso kiala kiiadi kiâ mu mukáu, anga ki bhita-phe kuila Kaini u lungulukila Abele, phangʼiê, hé u mu jibha.

⁹ Ngana anga u ambela Kaini, uixi: Phangʼié Abele iú kuebhi? Kuala muene, manhí kiá; kifua eme a ngi bhana kuinga phangʼiami?

¹⁰ Kuala Ngana: Eie ihi i ua bhange? Dízui dia manhinga ma phangʼié dia dikola kokuami tundé mu mavu.

¹¹ Kiki-phe lamba dié, tundé ku mavu a bhane mu kanu mu kúnua manhinga ma phangʼié, ma tundu ku lukuaku lué.

¹² Kioso ki ua kà dima jinga o mavu, ene ka-nda ku ku bhana dingi o nguzu iê; eie ua kà kala u munhungani, u lenga-lenga ngó, u muthu ku moneka kididi mu ngongo.

¹³ Kaini anga u ambela Ngana, uixi: Kaxtiku ku ua ngi bhana ka ngi nemena kiavulu. Ki ngi tena kusoka na-ku.

¹⁴ Eie-phe ua ngi kaiʼó kizuua kia lelu, ku mavu a ngongo; bhu pholo ié kifua ki ngi kala-bhu dingi; ngenda jinga ni ku ku suamena, ngà kala ngi munhungani, ngi lenga-lenga ngó, ngi muthu ki ngi moneka kididi mu ngongo; kià kala-phe kuma uoso ió u ngi tuuama, u ngi jibha.

¹⁵ Ngana anga u mu ambela, uixi: Mukonda dia kiki, uoso u jibha Kaini, kaxti-ku kê ka kala mu lusambuadi. Ngana anga u ta kijimbuete kua Kaini, phala uoso u mu tuuama, ka mu jibhe.

¹⁶ Kaini anga u tunda bhu pholo ia Ngana, uia mu tunga mu ixi ia Nole, ku mbandu ia mutundila-kumbi ia Edene.

¹⁷ Kaini anga u ijiia mukajiʼê; anga u imita, u vuala Enoko; anga u tunga mbonge, o mbonge u i luka dijina dia thungunu iê Enoke.

¹⁸ Enoko anga u vuala Iiadi; Iiadi u vuala Mehujaiele; Mehujaiele u vuala Metuzaiele; Metuzaiele u vuala Lameke.

¹⁹ Lameke anga u sakana hongo, u ta akajiʼê kiiadi: muhatu umoxi dijina diê Ada, muhatu ua mukuá dijina diê Zila.

²⁰ Ada anga u vuala Jabale; muene tata ia akua kutunga mu jibalaka, ni kúvua ibhaku.

²¹ Kiubha kiê dijina diê Jubale: muene tata ia akua kuxika mbèndu ni mbànza.

²² Zila ue u vuala Tubale-Kaini; musudi-a-thumba, u sula ima ioso ia ngôndo ni felu; Tubale-Kaini kiubha kiê kia muhatu, dijina diê Nahama.

²³ Lameke anga u ambela akajiʼê kiiadi, uixi: Ni Ada ni Zila, ivenu dízui diami Mu akajiʼa Lameke, eme ngi zuelʼó: Nga jibha muthu mukonda ua ngi kuama, Ni munzangala ua diiala, mukonda ua ngi diota.

²⁴ Mukonda se o mulonga ua Kaini, a u êlesa lusambuadi, Ua Lameke u bhinga makuinhi sambuadi a masambuadi.

²⁵ Adá anga u tona dingi kuijiia mukajiʼê; anga u vuala monʼa diiala, u mu luka dijina dia Sethe; kuma uambe, uixi: Mbutu ia mukuá ia ngi bhana Nzambi, bhu kididi kia Abele, kuma a mu jibha kuala Kaini.

²⁶ Sethe ue ku izuua u vuala monʼa diiala, u mu luka dijina dia Enoxe; muene mu izuua mua-ndeka athu kudikola mu dijina dia Jihova.