Dimatekenu 39 - O Mikanda Ikola

Zuze m ʼonzo ia Potifale

¹ Zuze anga a mu bheka mu Ijito; Potifale, fixiiadi ia Falaó, kabhitangu ka kilangidilu mukua Ijitu, anga u mu sumba bhu maku ma akua Ijimaiele, oso eza-nê muenhomo.

² Jihova anga u kala ni Zuze, katé ioso ia bhanga ienda kiambote; anga u kala mʼonzo ia ngana iê mukua Ijito.

³ O ngana iê anga u mu mona kuma Jihova uala-nê, mukonda Jihova ua bhangesa kuila ioso i bhanga Zuze ienda kiambote.

⁴ Zuze anga u bonga kiadi ku mesu mê, u kala mu ku mu sedivila; muene anga u mu bhana kutambula konda ia dibhata dié dioso, iene ioso iala-naiu ua i bhakula bhu makuʼê.

⁵ Anga ki bhita kuma, tunde mu thembu ia mu bhana kutambula konda ia dibhata diê, ima ioso iú ua mu bhakuila-iu muene, Jihova u kala mu zediuisa o dibhata dia mukua Ijitu, mukonda dia Zuze; dibesá dia Jihova anga di kala ku thandu dia ima ioso iala-naiu, ni ku bhata ni ku mukáu.

⁶ Muene anga u ehela ima ioso bhu maku a Zuze; kejiia dingi kima kiala-nakiu, kala uijiia ngó kudia kuê kuala mu kudia. Zuze anga u kala muthu ua uabha o pholo ni mukutu.

⁷ Kia zubha kubhita imʼiii, mukajiʼa ngana iê u kala mu ku ta mesu kua Zuze; anga u mu ambela, uixi: Ndoko, tu zekietu.

⁸ Muene-phe anga u dituna, u ambela mukajiʼa ngana iê, uixi: Muadiʼami-ze kejiia dingi kima kiala-na-kiu mʼonzo, iene ioso ua i bhana bhu makuʼami;

⁹ o mʼonzʼumu ki muala dingi muthu ua ngi tundu ni kima; kana-ku ue kima kia ngi fudisa, ki kale ngó eie, mukonda eie u muhatuʼê; eme-phe ngi tena kiebhi kubhanga kuiibha kuosʼuku ni kuta kituxi kua Nzambi?

¹⁰ Anga ki bhita kuila, uia ni ku zuelesa Zuze izuua ioso, muene-phe ka ẋikina ku mu ivua phala kuzeka-nê, mba kukala-nê ngó bhua zukama.

¹¹ Kizuua kimoxi-phe, Zuze ueza mʼonzo mu kubhanga kikalakalu kie, o ku iá a tokala mʼonzo ki ku kexile muthu uoso-uoso ua kexile-mu kithangana kienhókio.

¹² Muhatu anga u mu kuata mu divunga diê, uixi: Zá tu zekietu. Muene anga u ẋangumuka, u mu xila o divunga bhu makuʼê, u lenga, u tunda bhu kanga.

¹³ Muhatu-phe kia zubha kumona kuila ua mu xila o divunga bhu maku, muene iú ua lengela bhu kanga,

¹⁴ u ixana mala akua mbèle iê, u a ambela, uixi: Talenu, muadi uami ua tu bhekela hebeleu mʼonzʼumu, phala ku tu sebulula; muene ua bokuene mu ngala phala kuzeka ni eme, emiʼemephe nga di kola ni nguzu;

¹⁵ o kia ngi mono nga suina dízui ni kudikola, ua xisa o divunga diê bhu mba-ndu iami, ua lenge, iú ua tundu bhu kanga.

¹⁶ O divunga anga u di tula bhu mbandu iê, katé ngana ia dibhata kieza mʼonzo.

¹⁷ Anga u zuela-nê kala kia zuelʼiki, uixi: O mubhika ua hebeleu, ua tu bheke-la-nê eie mʼonzo, uejile mu ku ngi sebulula;

¹⁸ mu kuiza-ku-phe, kioso ki nga zangula dízui, eme nga dikola, muene ua xi divunga diê bhu mbandu iami, iú ua lengela bhu kanga.

¹⁹ Bhenhobho ngana iê kia zubha kuívua maka ma tange mukajiʼê, uixi: Kiene ki nga kuambelʼiki, kiene kia ngi bhange mubhikʼê; njinda hé i mu kuata.

²⁰ Ngana ia Zuze anga u tuma ku mu kuata, a mu ta muʼaleia, muene ku kuikila o jipelzo joso ja muenexi.

²¹ Jihova-phe anga u kala ni Zuze, u mu bhanga henda, u mu sangesa ngalasa ku mesu a kasalelu ua tambula konda ia kaleia.

²² O kasalelu anga u bhakula bhu maku a Zuze, o jipelezo joso jala mu kaleia; katé ioso iala mu bhanga momo, Zuze kiá uia ni ku i bhanga.

²³ Kasalelu kala kusuua dingi ima ia bhakuila bhu makuʼa Zuze, mukonda Jihova uala-nê; o ima ioso ia bhanga, Jihova u i zediuisa, ienda kiambote.